Ansa Long Wan Kwestin
◼ ?Yumi save mekem wanem blong givhan long ol paenia?
Long seves yia blong 2009, klosap 800,000 brata mo sista long fulwol, oli mekem wok blong fultaem paenia mo spesel paenia. Ol paenia ya oli givim taem, paoa, mo olting blong olgeta we oli olsem ol fas kakae blong garen. Oli mekem olsem blong gud nius blong Kingdom i save kasem plante man. (Prov. 3:9) !Jehova i glad tumas we oli traehad olsem! Yumi tu yumi glad long hadwok blong olgeta. ?Be yumi save mekem wanem blong givhan long olgeta, blong oli stap glad mo gohed long wok blong paenia?
Taem yumi jusum gud ol tok blong yumi, yumi save leftemap tingting blong olgeta blong gohed long wok blong paenia. (Prov. 25:11, NW) ?Olsem wanem? ?Yumi save mekem sam jenis long program blong yumi, blong yumi prij wetem olgeta? Nating se oli gat trak, taem yumi prij wetem olgeta, yumi save askem long olgeta blong kam long trak blong yumi. Mo taem yumi go long trak blong olgeta, maet i gud yumi givim smol mane blong halpem olgeta. (1 Kor. 13:5; Fil. 2:4) Mo tu, yumi save soemaot se yumi lavem olgeta taem yumi tekem olgeta oli kam long haos, mo wanwan taem i gud blong askem long olgeta blong oli kam kakae wetem yumi.—1 Pita 4:8, 9.
Baebol i mekem strong promes long ol man we oli putum Kingdom long fasples long laef blong olgeta, se Jehova bambae i givim ol samting we oli nidim. (Sam 37:25; Mat. 6:33, NW) Blong givhan long ol man ya, Jehova i yusum ol Kristin brata mo sista we oli lavlavem olgeta tumas. (1 Jon 3:16-18) I tru, ol paenia oli no gat tingting ya se ol narafala oli mas pem evri samting we oli nidim. Mo maet oli no talemaot long narafala se oli sot long sam samting. Taswe, yumi mas luksave taem ol paenia we oli wok strong “oli sot” long sam samting, mo yumi mas glad blong givhan long olgeta.—2 Kor. 8:14, 15.
Long faswan handred yia, long kongregesen blong Kengkria, i gat wan sista we nem blong hem Fibi. Sista ya i gat strong tingting long wok blong prij. Taem hem i go long Rom, Pol i leftemap tingting blong ol brata long Rom se: “I gud yufala i tekem hem i kam joen long yufala long nem blong Masta blong yumi, olsem we i stret blong ol man blong God oli mekem. Sipos hem i sot long sam samting, i gud yufala i givhan long hem.” (Rom 16:1, 2) Yumi gat janis ya tu blong soemaot se yumi lavem mo sapotem ol fultaem paenia mo spesel paenia long kongregesen blong yumi we oli stap talemaot gud nius oltaem.—Wok 5:42.