Stadi 13

?Olsem Wanem Yu Save Faenem Trufala Skul?

?Olgeta skul oli stret long ae blong God, no i gat wan nomo we i stret? (1)

?From wanem i gat plante skul we oli talem se oli Kristin? (2)

?Olsem wanem yu save makemaot ol trufala Kristin? (3-7)

1. Jisas i statem wan trufala Kristin skul nomo. Taswe tede, i mas gat wan grup blong man nomo we oli wosip long Jeova God long trufala fasin. (Jon 4:​23, 24; Efesas 4:​4, 5) Baebol i tijim se smol man nomo oli stap long smol rod we i go kasem laef.​—⁠Matyu 7:​13, 14.

2. Baebol i bin talemaot se, afta long ded blong ol aposol, sloslou, sam rong tijing mo fasin we oli no blong ol Kristin, bambae oli kam insaed long Kristin kongregesen.a Samfala bambae oli pulum sam man blong bilif, blong oli lego Kraes mo folem olgeta. (Matyu 7:​15, 21-23; Ol Wok 20:​29, 30) From samting ya, yumi luk se plante defren skul oli stap talem se oli Kristin. ?Olsem wanem yumi save makemaot ol trufala Kristin?

3. Bigfala mak blong ol trufala Kristin, hemia se oli laeklaekem olgeta long trufala fasin. (Jon 13:​34, 35) Oli no kasem tijing ya se oli gud moa i bitim ol man blong narafala laen mo kala blong skin. Mo oli no lanem blong agensem ol man blong narafala kantri. (Ol Wok 10:​34, 35) Taswe, oli no joen long ol faet. Ol trufala Kristin oli olsem ol brata mo sista nomo.​—⁠1 Jon 4:​20, 21.

4. Wan narafala mak blong trufala skul, hemia se ol memba blong hem oli gat bigfala respek long Baebol. Oli agri se hem i Tok blong God, mo oli bilif long olgeta samting we hem i talem. (Jon 17:17; 2 Timote 3:​16, 17) Oli bilif se Tok blong God i impoten moa i bitim tingting no kastom blong man. (Matyu 15:​1-3, 7-9) Oli traem mekem laef blong olgeta i laenap wetem Baebol evri dei. From samting ya, oli no mekem fasin we i agensem ol tok we oli stap talemaot.​—⁠Taetas 1:​15, 16.

5. Trufala skul i mas ona long nem blong God. (Matyu 6:⁠9) Jisas i talemaot nem blong God, Jeova, long ol narafala man. Ol trufala Kristin oli mas mekem sem mak. (Jon 17:​6, 26; Rom 10:​13, 14) ?Hu ol man long ples blong yu we oli stap talemaot nem blong God long ol narafala man?

6. Ol trufala Kristin oli mas talemaot Kingdom blong God. Jisas i bin mekem olsem. Oltaem nomo hem i tokbaot Kingdom. (Luk 8:⁠1) Hem i givim oda long ol disaepol blong hem blong talemaot sem mesej ya long olgeta ples blong wol. (Matyu 24:14; 28:​19, 20) Ol trufala Kristin oli bilif se Kingdom blong God nomo i save karem trufala pis mo seftaem long wol ya.​—⁠Ol Sam 146:​3-5.

7. Ol disaepol blong Jisas oli no mas joen long rabis wol ya. (Jon 17:16) Oli no joen long ol bisnes blong wol long saed blong politik, mo ol smosmol rao we oli kamaot bitwin ol defren grup blong man. Oli stap longwe long ol nogud fasin, kastom mo tingting we plante man oli stap folem long wol. (Jemes 1:27; 4:⁠4) ?Yu yu luksave wan skul long ples blong yu we i gat ol mak ya blong trufala Kristin skul?

[Futnot]

[Tok blong pija long pej 27]

Ol trufala Kristin oli laeklaekem olgeta, oli gat respek long Baebol, mo oli talemaot Kingdom blong God