Yumi Kasem Paoa Blong Winim Enikaen Trabol
“Mi mi naf blong mekem evri samting from we hem i stap givim paoa long mi.”—FIL. 4:13, NW.
1. ?From wanem ol man blong Jehova oli kasem plante trabol?
PLANTE taem, ol man blong Jehova oli stap kasem defdefren trabol. Sam trabol i kamaot from sin we i stap long yumi no from fasin blong wol ya we yumi laef long hem. Sam narafala trabol oli kamaot from we, olgeta we oli no mekem wok blong God oli badfren blong olgeta we oli mekem wok blong God. (Jen. 3:15) Longtaem finis i kam, God i halpem ol gudfala man blong hem blong oli stanap strong taem ol man oli agensem olgeta from bilif blong olgeta, taem ol fren oli traem pulum olgeta mo taem sam narafala trabol bakegen i kasem olgeta. Tabu spirit blong God i givim paoa long yumi tu blong mekem sem mak olsem olgeta ya.
Taem Ol Man Oli Agensem Yumi From Bilif Blong Yumi
2. ?From wanem ol man oli agensem narafala from bilif blong hem, mo wanem ol rod we oli yusum blong mekem olsem?
2 Ol man oli mekem i nogud long ol narafala from bilif blong olgeta. Mak blong ol man ya i blong mekem se ol narafala ya we oli bilif, oli lego bilif blong olgeta. Mo tu, oli mekem olsem from we oli no wantem se plante moa man oli gat sem bilif olsem olgeta ya. I gat plante rod we oli folem blong agensem ol man we bilif blong olgeta i defren. Sam long ol rod ya oli klia be sam oli haed. Baebol i tokbaot ol trik we Setan i mekem blong agensem man se i olsem wan laeon mo wan kobra snek.—Ridim Ol Sam 91:13.
3. ?Wanem ol trik we Setan i yusum blong agensem man we i sem mak olsem laeon mo kobra snek?
3 Taem wan laeon i hanggri tumas, hem i go stret long anamol we hem wantem kakae mo i kilim hem i ded. Setan i mekem sem mak. Plante taem, hem i pulum ol man blong oli kilim ol man blong God stret, oli sakem olgeta long kalabus, mo oli putum tabu long wok blong olgeta. (Sam 94:20) Ol ripot long Yearbook oli tokbaot wok blong ol Witnes blong Jehova tede, mo i gat plante stori we oli soemaot ol trik we Setan i yusum blong agensem olgeta. Long plante ples, ol man we oli kros tumas oli hivap wanples blong mekem i nogud long ol man blong God, mo samtaem ol lida blong skul mo ol man blong politik nao oli lidim ol man ya blong mekem olsem. Ol fasin agens ya we oli kamaot long Setan oli mekem we sam man blong Jehova oli no moa mekem wok blong Jehova. Setan i olsem wan kobra snek tu. Hem i haed long ples we man i no save luk hem, nao wantaem nomo hem i kakae man, mo man i gat kil from posen blong hem. Setan i posenem tingting blong ol man mo i trikim olgeta blong oli mekem samting we hem i wantem. Rod ya we Setan i yusum, i blong mekem man i slak no i mekem we oli lego bilif blong olgeta. Be tabu spirit blong God i save givhan long yumi blong winim tufala rod ya we Setan i yusum blong agensem yumi.
4, 5. ?Wanem beswan rod blong rerem yumi blong fesem fasin agens, mo from wanem? Talem wan eksampol.
4 I nogud blong tingbaot wanem kaen fasin agens we maet i hapen long yumi long fiuja. Hemia i no beswan rod blong rerem yumi blong stanap strong. Yumi no save wanem fasin agens we bambae i hapen long fiuja, taswe sipos yumi wari long ol samting we maet bambae oli neva hapen, hemia i no save givhan long yumi. Be i gat sam samting we yumi save mekem. Bighaf blong ol man we oli winim fasin agens finis, oli mekem samting ya. Hemia se oli tingting dip long ol stori blong Baebol, we oli tokbaot ol gudfala man blong Jehova we oli stanap strong taem ol man oli agensem olgeta. Mo tu, oli tingting dip long ol tijing mo eksampol blong Jisas. Samting ya i halpem olgeta blong mekem lav we oli gat long Jehova i kam strong moa. Ale, lav ya i halpem olgeta blong stanap strong nomata wanem samting i traem olgeta.
5 Yu traem tingbaot tu sista blong yumi long Malawi. Ol man blong wan pati blong politik oli fosem tufala blong pem wan kad blong vot, be tufala i no wantem. Ale ol man ya oli kilim tufala, oli tekemaot ol klos blong tufala mo oli talem se bambae oli repem tufala. Ol rabis man ya oli giaman long tufala se ol memba blong famle blong Betel oli gat kad blong vot blong olgeta finis. ?Tufala sista ya tufala i ansa olsem wanem? “Mitufala i mekem wok blong Jehova God nomo. Taswe, nating sipos ol brata long branj ofis oli pem ol kad, mitufala i no wantem save. !Bambae mitufala i no lego bilif blong mitufala, nating sipos yufala i kilim mitufala!” Taem tufala i soemaot se tufala i no fraet mo tufala i stanap strong long desisen blong tufala, ol man ya oli letem tufala i go.
6, 7. ?Jehova i mekem wanem blong ol man blong hem oli gat paoa blong fesem fasin agens?
6 Aposol Pol i talem klia se taem ol Kristin long Tesalonaeka oli lanem trutok, oli kasem “plante trabol,” be ‘tabu spirit i mekem oli harem gud tumas.’ (1 Tes. 1:6) Yes, plante Kristin bifo mo tede tu, we oli winim fasin agens finis, oli talem se long taem we ol samting oli traem olgeta bitim mak, long taem ya nao, oli gat pis long tingting. Pis ya i kamaot long tabu spirit blong God. (Gal. 5:22) Pis ya i halpem olgeta blong lukaot gud long hat mo tingting blong olgeta. Yes, Jehova i yusum paoa blong hem we i stap wok, blong givim paoa long ol man blong hem blong oli waes gud blong winim ol trabol we i kasem olgeta.a
7 Plante man oli sapraes tumas taem oli luk strong tingting we ol man blong God oli gat, blong holemstrong long God nating se narafala i agensem olgeta. Oli luk olsem se ol Witnes oli kasem wan paoa we i bitim paoa blong man, mo hemia i tru nomo. Aposol Pita i mekem tingting blong yumi i strong taem hem i talem se: “Sipos ol man oli tok nogud long yufala from we yufala i man blong Kraes, yufala i save harem gud. Hemia i min se Spirit ya blong heven, we i Spirit blong God, hem i kamdaon finis, i stap long yufala.” (1 Pita 4:14) Ol man oli stap agensem yumi from we yumi folem ol loa blong God, mo samting ya i soemaot we God i glad long yumi. (Mat. 5:10-12; Jon 15:20) !Yumi glad tumas from we ol samting ya oli pruvum se Jehova i stap blesem yumi!
Taem Ol Fren Oli Traem Pulum Yumi
8. (a) ?Wanem i givhan long Josua mo Kaleb blong tufala i stanap strong taem ol fren blong tufala i traem pulum tufala? (b) ?Yumi lanem wanem long eksampol blong Josua mo Kaleb?
8 Wan narafala fasin agens we i haed, hemia taem wan Kristin i mas holemstrong taem ol fren blong hem oli traem pulum hem blong mekem wan samting we i no stret. Be from we spirit blong Jehova i gat moa paoa i bitim spirit blong wol, yumi save stanap strong nating se ol man oli jikim yumi, oli talem ol giaman toktok long saed blong yumi, mo oli fosem yumi blong folem tingting blong olgeta. Yu traem tingbaot Josua mo Kaleb. Tufala i no agri wetem tingting blong ol ten narafala man we oli go lukluk kantri blong Kenan. ?Stori ya i tijim wanem long yumi? Tufala i letem tabu spirit i lidim tufala, mekem se tufala i gat wan “tingting” we i defren long ol narafala ya.—Ridim Namba 13:30; 14:6-10, 24.
9. ?From wanem ol Kristin oli no fraet blong stap defren long bighaf blong ol man?
9 Tabu spirit i givim paoa long ol aposol blong Jisas blong oli obei long God, i bitim we oli obei long ol man we plante man oli tinghae long olgeta se oli ol tija blong skul we i tru. (Wok 4:21, 31; 5:29, 32) Plante man oli glad blong folem tingting blong bighaf blong ol man, from we oli no wantem man i rao no i agensem olgeta. Be plante taem, ol tru Kristin oli mas tekem desisen blong mekem samting we oli save se i stret. Mo oli talem tangkiu long God from paoa we hem i givim long olgeta blong oli no fraet blong stap defren long ol narafala man. (2 Tim. 1:7) Bambae yumi tokbaot wan samting we maet fren blong yumi i pulum yumi blong mekem, mo wanem samting we bambae yumi mekem long taem olsem.
10. ?Wanem samting we i traem sam Kristin tede?
10 Sam yangfala oli no moa save wanem blong mekem taem oli save se wan fren blong olgeta i mekem wan fasin we Baebol i putum tabu long hem. Oli harem se sipos oli talemaot fren blong olgeta long ol elda, samting ya bambae i save mekem se fren blong olgeta i no moa trastem olgeta. Ale, oli fraet blong talemaot samting ya. Maet hemia we i mekem rong i askem strong long fren blong hem blong i no talemaot sin blong hem. I tru se hemia wan samting we plante yangfala tede oli stap mekem, be i no ol yangfala nomo. Maet sam bigman tu oli harem se i had blong go talemaot long ol elda, wan sin we fren no famle blong olgeta i mekem. ?Be ol tru Kristin oli mekem wanem long taem olsem?
11, 12. ?Wanem beswan samting blong mekem taem wan Kristin brata no sista i strong long yu blong yu no talemaot sin blong hem long ol elda? ?From wanem hemia nao i beswan samting blong mekem?
11 Traem tingbaot wan samting olsem. Wan yangfala brata long kongregesen, we nem blong hem Alex, i save se fren blong hem Steve, i gat fasin ya blong lukluk ol rabis pija blong man mo woman. Ale, Alex i talem long Steve se hem i wari long wanem we Steve i stap mekem. Be Steve i no wantem save long toktok blong Alex. Taem Alex i talem long Steve blong i go tokbaot samting ya long ol elda, Steve i talem se sipos Alex i fren blong hem, ale bambae Alex i no mas go talemaot hem long ol elda. ?Olsem wanem? ?I stret we Alex i fraet blong lusum fren blong hem? Maet Alex i wari se sipos ol elda oli go luk Steve nao Steve i haedem sin blong hem, bambae ol elda oli no moa save se bambae oli bilivim toktok blong hu. Nating se i olsem wanem, be problem ya bambae i no save kamgud sipos Alex i haedem. Problem ya i save mekem se Steve i lusum fasin fren we hem i gat wetem Jehova. Wan gudfala vas we Alex i mas tingbaot, hemia vas ya we i se: “Fasin ya we man i fraet tumas long ol narafala man, hem i olsem trap nomo, mo i nogud yu yu foldaon long hem. Sipos yu stap trastem Hae God, bambae yu save stap gud oltaem.” (Prov. 29:25) ?Alex i save mekem wanem? Maet hem i save toktok gud wetem Steve bakegen mo i save talem stret long Steve se samting we Steve i stap mekem i no stret. Alex i mas gat strong tingting blong mekem olsem. Maet long taem ya nao, Steve i harem se i glad blong talemaot tingting blong hem long saed blong problem ya. Ale, Alex i mas talem bakegen long Steve blong i go luk ol elda mo i mas talem tu se sipos hem i slo blong go luk ol elda, be Alex nao bambae i go talemaot problem ya long ol elda.—Lev. 5:1.
12 Sipos yu mas mekem wan samting olsem, maet fastaem fren blong yu bambae i no glad long wanem we yu mekem blong halpem hem. Be biaen, maet bambae hem i luksave se samting we yu mekem i blong givhan long hem. Sipos fren blong yu i lesin long yu mo i glad we yu halpem hem, bambae hem i talem bigfala tangkiu long yu from we yu gat strong tingting blong givhan long hem mo yu stap tru long Jehova tu. ?Be olsem wanem sipos hem i kros tumas long yu? ?Yu yu wantem wan fren olsem? Stret samting blong mekem hemia blong mekem nambawan Fren blong yu, Jehova, i glad. Taem yu tingbaot Jehova fastaem, ol narafala we oli lavem Jehova bambae oli respektem yu from we yu stap tru long Jehova mo bambae oli kam ol tru fren blong yu tu. Yumi neva mas givim janis long Setan blong i kam insaed long Kristin kongregesen. Sipos yumi mekem olsem, bambae yumi mekem tabu spirit blong Jehova i harem nogud. Defren olgeta, taem yumi traehad blong mekem Kristin kongregesen i klin, i olsem we yumi stap wok folem tabu spirit.—Efes. 4:27, 30.
Taem Sam Narafala Trabol Bakegen i Kasem Yumi
13. ?Wanem kaen trabol we ol man blong Jehova oli stap kasem, mo from wanem i gat ol trabol ya?
13 I gat plante samting we oli mekem trabol long man. Maet problem long saed blong mane, man i lusum wok, wan disasta, wan we yumi lavem tumas i ded, sik mo plante narafala samting olsem. From we yumi stap long wan taem we laef i “strong tumas,” yumi no sapraes we yumi evriwan i mas fesem sam long ol trabol ya. (2 Tim. 3:1) Taem samting ya i hapen long yumi, i impoten we yumi no mas wari bitim mak olsem se yumi lusum hed. Tabu spirit i save givim paoa long yumi blong stanap strong taem yumi kasem wan long ol trabol ya.
14. ?Wanem i givim paoa long Job blong stanap strong taem hem i kasem trabol?
14 Job i kasem plante trabol, wan afta narawan. Hem i lusum olgeta samting blong hem, ol pikinini blong hem, ol fren blong hem, hem i sik, mo waef blong hem i no moa trastem Jehova. (Job 1:13-19; 2:7-9) Nating se i olsem, Elihu i leftemap tingting blong hem. Ol tok we Elihu i talem, mo ol samting we Jehova tu i talem long Job, oli soemaot long hem se hem i mas ‘stap kwaet smoltaem, mo hem i mas lesin. Hem i mas tingbaot ol bigbigfala wok ya we God i stap mekem.’ (Job 37:14) ?Wanem i halpem Job blong stanap strong taem hem i kasem trabol? ?Mo wanem i save halpem yumi blong stanap strong taem yumi kasem trabol? Yumi mas tingbaot ol wok we oli soemaot paoa blong tabu spirit blong Jehova. (Job 38:1-41; 42:1, 2) I gud yumi tingbaot sam samting long laef blong yumi we oli soemaot finis se God i kea long yumi wanwan. Tede, hem i gohed yet blong soemaot se hem i kea long yumi.
15. ?Wanem i givim paoa long Pol blong stanap strong taem hem i kasem trabol?
15 Aposol Pol i kasem plante trabol long laef blong hem from we hem i mekem wok blong God. (2 Kor. 11:23-28) ?Hem i mekem wanem blong holem gudfala tingting mo blong no harem nogud tumas from ol trabol taem ya? Hem i dipen fulwan long Jehova tru long prea. Taem hem i stap gotru long trabol ya we biaen bambae oli kilim hem i ded, Pol i raetem se: “Masta blong yumi, hem i stap wetem mi, mo hem i givim paoa long mi blong mi talemaotgud ol tok blong hem long fes blong ol hiten man, blong oli harem. Mo hem i tekemaot mi long trabol ya, olsem we i tekemaot mi long maot blong laeon.” (2 Tim. 4:17) From we Pol i gotru long ol trabol taem, hem i save talem long ol Kristin se oli no mas “tingting tumas.”—Ridim Filipae 4:6, 7, 13.
16, 17. Talem wan stori we i soemaot se Jehova i stap givim paoa long ol man blong hem tede, taem oli kasem ol trabol long laef.
16 Wan paenia we nem blong hem Roxana, i wan long olgeta ya we i luksave olsem wanem Jehova i givhan long ol man blong hem. Taem hem i askem long bos blong hem se bambae hem i no wok long sam dei from we hem i mas go long wan asembli blong yumi, bos blong hem i kros mo i ansa se sipos hem i go long asembli ya, bambae hem i sakemaot hem long wok. Nating se i olsem, Roxana i go long asembli ya, mo hem i prea plante long Jehova blong bambae hem i no lusum wok blong hem. Afta long hemia, tingting blong hem i kwaet. Ale, long Mande, taem Roxana i gobak long wok, bos blong hem i sakemaot hem. Roxana i wari bigwan. Hem i nidim wok ya blong i givhan long famle blong hem, nating se pei blong hem i smol. Ale, hem i prea long Jehova bakegen, mo hem i stap tingbaot se sipos God i givim ol samting long saed blong spirit we hem i nidim long asembli, God i naf blong givim ol samting we hem i nidim tu long saed blong bodi. Taem hem i stap wokbaot i gobak long haos, Roxana i luk wan saen we i talem se, “Mifala i nidim sam man blong givhan.” Kampani we i putum saen ya i nidim ol man we oli save gud olsem wanem blong yusum masin blong somap klos, ale, Roxana i raet i go blong askem wok long kampani ya. Bos blong kampani ya i luk se Roxana i no gat save nating long saed blong wok ya, be nating, hem i givim wok long Roxana. Antap long hemia, pei we Roxana i kasem i klosap tu taem antap long pei we hem i kasem long wok ya we hem i jes lusum. Roxana i luksave se God i ansa long ol prea blong hem. Be bigfala blesing we hem i kasem hemia se, hem i gat janis blong talemaot gud nius long samfala we oli wok wetem hem. Faef long olgeta ya, we wan long olgeta hem i bos blong hem, oli glad blong lanem trutok mo biaen oli baptaes.
17 Samtaem i luk olsem se yumi no kasem ansa blong ol prea blong yumi. Maet Jehova i no ansa kwiktaem no maet i ansa be long wan rod we yumi no luksave. I mas gat gud risen from wanem Jehova i mekem olsem. Jehova i harem ol prea blong yumi, be maet afta nomo bambae yumi kasem save se Jehova i ansa long prea blong yumi. Wan samting we yumi no mas fogetem, hemia se Jehova bambae i no save lego ol man we oli stap tru long hem.—Hib. 6:10.
Taem i Gat Trabol Mo Ol Samting Oli Traem Yumi
18, 19. (a) ?From wanem yumi no mas sapraes se i gat trabol mo sam samting we oli traem yumi? (b) ?Yumi save winim ol samting ya olsem wanem?
18 Ol man blong Jehova oli no sapraes taem sam samting i traem olgeta, taem tingting blong olgeta i foldaon, taem ol man oli mekem i nogud long olgeta, mo taem ol fren oli traem pulum olgeta. Tru ya, ol man blong wol ya oli no laekem yumi, oli agens long yumi. (Jon 15:17-19) Nating se i olsem, tabu spirit i save givhan long yumi blong winim enikaen trabol we maet i kasem yumi taem yumi stap mekem wok blong God. Jehova bambae i no letem wan trabol i kasem yumi we yumi no naf blong winim. (1 Kor. 10:13) Hem bambae i no save lego yumi samtaem. (Hib. 13:5) Taem yumi obei long ol Tok blong hem, yumi stap gud mo yumi stap strong long saed blong trutok. Mo tu, spirit blong God i save pulum ol Kristin brata sista blong oli kam givhan long yumi taem yumi nidim help.
19 I gud we yumi evriwan i gohed blong lukaot help blong tabu spirit taem yumi prea mo stadi Baebol. Ale, bambae ‘God i mekem yumi strong long bigfala paoa blong heven. Nao bambae yumi save stanap strong long taem blong trabol, we tingting blong yumi i longfala, i no save foldaon. Mo oltaem bambae yumi save harem gud.’—Kol. 1:11.
[Futnot]
a Yufala i save luk ol eksampol long Wajtaoa blong, Mei 1, 2001, pej 16; mo Wekap! blong Februari 8, 1993, pej 21 mo 22 (Franis mo Inglis).
?Bambae Yu Yu Ansa Olsem Wanem?
• ?Yu save mekem wanem blong rerem tingting blong yu blong stanap strong taem ol man oli agensem yu?
• ?Yu mas mekem wanem taem narafala i talem long yu blong yu go talemaot sin blong yu long ol elda?
• ?Nomata wanem kaen trabol we yu kasem, yu save sua fulwan long wanem samting?
[Tok blong pija long pej 30]
?Yumi lanem wanem long stori blong Josua mo Kaleb?
[Tok blong pija long pej 31]
?Yu save mekem wanem blong halpem wan fren blong yu we i mekem wan nogud samting?