Soem Lav Mo Intres Long ‘Ol Pikinini We Oli No Gat Papa’
1 Jeova i ‘stap lukaot long ol pikinini we oli no gat papa.’ (Sam 68:5) Loa we Jeova i givim long nesen blong Isrel i soemaot se hem i tingbaot ol pikinini olsem. Hem i se: “Bambae yufala i no mas spolem ol widowoman mo ol pikinini we papa blong olgeta i ded. Mi mi Hae God, mo sipos yufala i mekem i strong long olgeta, nao oli krae i kam long mi blong mi givhan long olgeta, bambae mi mi save harem olgeta.” (Eks. 22:22, 23) God i putum sam Loa tu, blong givhan long ol pikinini ya blong kasem ol samting we oli nidim blong laef. (Dut. 24:19-21) Long Kristin kongregesen, ol trufala man blong wosip long Jeova oli kasem advaes se oli mas “givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta.” (Jem. 1:27) ?Olsem wanem yumi save gat fasin olsem Jeova mo soem lav mo intres long ol pikinini we mama nomo i stap lukaot long olgeta no we papa blong olgeta i no stap long trutok?
2 Tijing Long Saed Blong Spirit: Sipos yu yu wan mama we yu wan nomo i stap lukaot long ol pikinini blong yu, no sipos man blong yu i no stap long trutok, ating yu faenem i had blong mekem wan Baebol stadi oltaem wetem ol pikinini blong yu. Be i impoten we yu stadi Baebol wetem olgeta oltaem sipos yu wantem se bambae oli kam ol bigman we oli naf blong skelemgud ol samting long laef mo tekem ol gudfala disisen. (Prov. 22:6) I impoten tu we yu storian evri dei wetem olgeta long ol samting long Baebol. (Dut. 6:6-9) Sam samtaem, tingting blong yu i save kam slak, be yu no mas lego. Askem long Jeova blong givim paoa long yu mo blong lidim yu taem yu gohed blong ‘stretem olgeta, mo tijim olgeta, olsem we Masta blong yumi i stap stretem yumi, i stap tijim yumi.’—Efes. 6:4.
3 Sipos yu nidim help blong mekem ol wok we Baebol i putum long han blong yu, yu mas talemaot samting ya long ol elda. Ating oli save givim sam gudfala advaes long yu mo givhan long yu blong gat wan gudfala program we famle i save folem blong mekem ol samting long saed blong spirit.
4 ?Narafala i Save Givhan Olsem Wanem?: Long faswan handred yia, Timoti i kam wan man blong Jeova we i wok strong, nating se hem i gruap long wan famle we papa i no folem trufala Kristin bilif. I klia se wan risen from wanem hem i gruap gud olsem, hemia from we mama blong hem mo bubu woman blong hem oli tijim hem long ol tok blong Baebol taem hem i pikinini nomo. (Wok 16:1, 2; 2 Tim. 1:5; 3:15) Hem i kasem help taem hem i joen wetem ol narafala Kristin tu, olsem aposol Pol. Pol i tokbaot Timoti olsem: “Long Kristin laef, hem i olsem pikinini blong mi we mi mi lavem hem, mo oltaem hem i strong long wok.”—1 Kor. 4:17.
5 !Tede tu, i gud tumas taem ol brata mo sista we oli bigman long saed blong spirit oli soemaot lav mo intres long ol pikinini long kongregesen we oli no gat papa blong givhan long olgeta! ?Yu yu save stret nem blong ol pikinini ya wanwan? ?Yu yu tektaem blong storian wetem olgeta long ol Kristin miting mo long ol narafala taem? Yu save singaot olgeta blong oli go prij wetem yu. Maet sam samtaem yu save askem olgeta wetem mama blong olgeta we i stap long trutok, blong oli joen long famle stadi blong yufala, no blong pleplei mo spel smol wetem yufala. Taem ol yangfala ya oli luk yu olsem wan fren blong olgeta, bambae oli wantem moa blong folem eksampol blong yu mo lesin long ol tok we yu yu talem blong leftemap tingting blong olgeta.—Fil. 2:4.
6 Jeova i intres bigwan long ol pikinini we oli no gat papa blong olgeta no we papa blong olgeta i no stap long trutok. Mo hem i stap blesem ol traehad we yumi mekem wetem lav blong givhan long olgeta blong folem trutok long prapa laef blong olgeta. Plante we oli gruap long ol famle we mama nomo i lukaot long olgeta no we papa i no stap long trutok, oli bin kasem ol gudfala tok blong leftemap tingting blong olgeta, mo naoia oli stap mekem wok blong paenia, man blong givhan, elda, seket elda, misinari, no memba blong Betel famle. I gud we yumi evriwan i folem fasin blong Papa blong yumi long heven, mo yumi traem lukaot rod blong “go moa” blong soemaot lav long ol pikinini ya we oli no gat papa blong olgeta.—2 Kor. 6:11-13, NW.