Plante Defren Samting i Save Mekem Man i Handikap
LONG wan kantri long Afrika, ol soldia oli bin tekemaot Christian long haos blong hem, mo oli traem fosem hem blong i joen long ami. Be Christian i no wantem mekem samting we oli askem from we tingting blong hem we hem i trenem folem Baebol, i jajem hem. Nao ol soldia oli karem hem i go long wan kamp blong ol ami mo oli kilim hem blong fo dei. Afta, wan soldia i sutum leg blong hem. Biaen Christian i naf blong go long wan hospital, be oli mas katemaot leg blong hem jes aninit long ni. Long wan narafala ples long Afrika, ol rebel soldia oli katemaot han no leg blong plante smolsmol pikinini. Mo tu, stat long Kambodia go kasem ol kantri long Balkan, long Afganistan go kasem Angola, ol bom we oli stap haed long graon oli gohed yet blong spolem bodi blong ol yangfala mo ol olfala tugeta.
I gat ol akseden mo sik tu, olsem sik blong suga, we oli spolem ol man. Ol posen we oli stap long win raonabaot long yumi olgeta tu oli save mekem se man i handikap. Tingbaot wan taon long Is Yurop. Plante pikinini long ples ya, oli bon we oli no gat wan saed han blong olgeta. Han blong olgeta i finis long joen nomo. Oli pruvum se ol kemikol we oli stap long win nao i spolem bodi blong olgeta. I gat plante plante narafala man we han mo leg blong olgeta i gud nomo be oli handikap yet from we wan saed bodi blong olgeta i ded no from wan narafala sik we i kasem olgeta. Yes, i gat plante defren samting we oli save mekem man i handikap.
Nomata wanem samting i mekem man i handikap, be bigfala trabol ya i save mekem tingting i foldaon olgeta. Junior i gat 20 yia nomo taem hem i lusum haf blong lef saed leg blong hem. Biaen hem i talem se: “Mi harem nogud tumas. Mi stap krae nomo, mi tingbaot se neva bambae mi wokbaot long leg ya bakegen. Mi no save wanem samting blong mekem. Tingting blong mi i fasfas.” Be biaen, tingting blong Janero i jenis bigwan. Hem i stat blong stadi Baebol mo hem i lanem plante samting we oli givhan long hem blong harem gud, mo oli givim wan nambawan promes long hem blong wan hapi fiuja long wol. ?Sipos yu yu wan handikap, yu tu yu wantem bilif long promes ya?
Sipos yes, ale plis yu ridim ol nekis pej blong buk ya. I gud tu sipos yu jekem ol vas long prapa Baebol blong yu. Olsem nao yu wan yu save luk wanem samting Man we i Wokem yumi bambae i mekem long olgeta we oli kasem save long stamba tingting blong hem mo we oli mekem laef blong olgeta i laenap wetem save ya.