Baebol i Talem Wanem

?Yu Yu Save Givhan Long Man We i Ded Finis?

“Taem Jos i jes stat kam kasem naoia, hem i . . . folem fasin ya blong mekem prea blong [ol dedman]. . . . Hemia i blong mekem se ol dedman oli kam klin, nao oli save gat nambawan blesing ya blong luk God.”—“Catechism Blong Katolik.”

OL MAN long evri ples long wol oli tingbaot ol dedman se oli stap olsem wanem. Ating yu tu yu bin harem nogud taem yu bin lusum wan we yu laekem hem tumas. Maet yu wantem save se: ?Ol dedman oli go laef long wan narafala ples bakegen? ?Oli stap safa no oli stap long pis? ?Mi mi save mekem wan samting blong givhan long olgeta?

Plante man we oli strong long jos blong olgeta, oli ting se oli save givhan long ol dedman. Ol Hindu oli ting se, sipos oli karem dedbodi blong famle blong olgeta i go long saed blong Ganges Reva, nao oli bonem dedbodi ya mo sakem asis blong hem i go long reva, ale hemia bambae i mekem se spirit blong dedman ya i haremgud blong olwe. Long sam kantri blong Esia, taem man i ded ol Budis oli wokem ol samting long pepa, olsem ol trak, ol haos, klos, mo mane, nao oli bonem olgeta. Oli ting se dedman i save yusum ol samting ya long nekis laef blong hem. Long Afrika, ol man oli kafsaedem ol strong dring long beregraon blong man. Oli ting se presen ya bambae i givhan long dedman ya.

Tijing blong Katolik, hemia se sipos wan man i ded we hem i no tanem tingting blong hem from sam bigfala sin we hem i minim nomo blong mekem, bambae God i no save glad long hem. Man ya i stap long “helfaea.” Wan narafala tijing blong Katolik, se man we God i glad long hem i save kasem “glad we i fulwan” long heven wetem God, be fastaem hem i mas kam klin olgeta. Blong kam klin, maet hem i mas go long pegatri, nao bambae hem i kasem panis long “faea we i klinim hem” from ol sin we God i no save fogivim. Be taem hem i stap long pegatri, jos i save mekem ol prea mo Lames tu blong givhan long hem. Ol fren mo famle blong dedman oli givim mane long jos blong i mekem samting ya.

Yumi evriwan i wantem mekem evri samting we yumi naf blong mekem blong givhan long ol famle blong yumi we oli ded finis, blong oli no safa. Sipos i gat rod blong givhan long olgeta, God bambae i talemaot rod ya long klia fasin. Bambae yumi luk wanem we Baebol i tijim long saed blong samting we yumi save mekem blong givhan long dedman.

?Dedman i Stap Olsem Wanem?

Olgeta tijing we yumi tokbaot finis oli stanap long bilif ya se spirit blong dedman i no rili ded, be hem i gohed blong laef afta we bodi blong man i ded. ?Hemia i laenap wetem samting we Baebol i talem? Baebol i talem se: “Ol man we oli laef yet oli save se bambae oli ded, be ol man we oli ded finis oli no moa save wan samting. Oli no moa save kasem pei blong ol samting we oli stap mekem, mo ol man oli fogetem olgeta finis. Ol fasin blong olgeta we oli laekem tumas ol man, no oli no laekem olgeta nating oli agens long olgeta, no oli jalus tumas long olgeta, be taem oli ded, ol samting ya oli lus wetem olgeta. Bambae oli no moa save joen bakegen long ol samting ya we oli stap kamtru long wol ya. Wanem samting we yumi stap mekem, yumi mas strong long hem long fulpaoa blong yumi, from we bambae i no gat wok, mo tingting, mo save, mo waes long [“Seol,” NW ], mo hemia nao ples we bambae yumi go long hem.” (Prija 9:​5, 6, 10) Seol hemia wan Hibru tok we i minim beregraon blong ol man.

Long saed blong tingting blong dedman, Ol Sam i talem se: “Spirit blong hem i kamaot long hem, nao man ya i gobak long graon . . . Long sem dei ya ol tingting blong hem oli finis.”​—Ol Sam 146:4, NW.

Ol tok blong Baebol oli klia mo stret. ?Wanem tingting blong yu? ?Wan papa we i lavem ol pikinini blong hem, bambae i save mekem olgeta oli safa from sam slak fasin we oli kasem tru long sin we oli bon wetem? (Jenesis 8:21) Nogat. Taswe, Papa blong yumi long heven, hem tu i no save mekem man i safa. Samfala long Isrel bifo oli folem kastom blong ol hiten man, we oli bonem pikinini blong olgeta long olta olsem wan sakrefaes we i go long ol giaman god. Be Jeova i agensem olgeta, i talem se fasin ya i nogud tumas. ‘Hem i no talem se bambae oli mekem olsem, samting ya i no kamaot long tingting blong hem nating.’​—Jeremaea 7:31.

Sin i mekem se man i kasem ded nomo, i no mekem se bambae hem i go safa long wan narafala ples. Baebol i talem se: “Ol man we oli stap mekem sin, pei blong olgeta, bambae oli ded.” Mo tu: “Taem wan man i ded, man ya i no moa stap aninit long paoa blong fasin blong sin, hem i fri.”​—Rom 5:12; 6:​7, 23.

Ol dedman oli no stap safa. Oli stap olsem we oli slip nomo, oli no filim wan samting, nating se wan gudfala samting no wan nogud samting. Taswe i klia se olgeta samting we ol man oli mekem blong traem givhan long dedman, oli agensem ol tijing blong Baebol.

?Wanem Fiuja Blong Ol Dedman?

Ol famle blong yu we oli ded finis mo oli no save wan samting, bambae oli no stap olsem blong olwe. Olgeta ya oli gat janis blong kasem wan gudfala fiuja.

Taem Jisas i rere blong mekem gudfala fren blong hem Lasaros i laef bakegen, hem i talem se bambae hem i go blong “wekemap hem [long slip].” (Jon 11:11) Long wan narafala taem bakegen, hem i talem se ‘ol dedman bambae oli harem voes blong hem, nao bambae oli aot long beregraon blong olgeta.’ (Jon 5:​28, 29) Taem ol man ya oli laef bakegen, bambae oli fri long ol sin blong olgeta. Oli no nid blong safa from samting we oli bin mekem long laef blong olgeta bifo. Bambae oli gat janis blong lanem blong laef long fasin we i stretgud olgeta. !Hemia i rili wan nambawan janis!

Sipos yu yu wantem laef olsem, yu no mas tektaem. Yu mas jekem ol promes ya blong luk sipos yu rili save trastem olgeta. Ol Witnes blong Jeova oli glad tumas blong givhan long yu.

?YU YU BIN TINGBAOT?

◼ ?Ol dedman oli save samting?​—Ol Sam 146:4; Prija 9:​5, 6, 10.

◼ ?God bambae i letem ol dedman oli safa long helfaea?​—Jeremaea 7:31.

◼ ?Ol dedman oli save gat wan gudfala fiuja?​—Jon 5:​28, 29.