Ansa Long Wan Kwestin
◼ Sipos wan man i wantem se sam long olting blong hem, no olting blong hem evriwan, i go long ogenaesesen blong Jehova taem hem i ded, ?wanem sam samting we hem i mas tingbaot?
Taem man i ded, hem i no moa gat paoa antap long olgeta samting we hem i gat. (Prija 9:5, 6) Taswe plante man oli raetem wan pepa we i olsem las toktok blong olgeta, blong talemaot se olting blong olgeta bambae oli go long hu. (2 King 20:1) Long pepa ya oli mas talem hu man we oli trastem se bambae i mekem las toktok blong olgeta i kamtru. Long plante kantri, sipos wan man i no raetem wan pepa we i olsem las toktok blong hem nao hem i ded, gavman no famle blong hem bambae i mekem desisen se olting blong man ya oli go long hu. Taswe sipos yumi wantem se sam long olting blong yumi, no evri samting blong yumi, i go long ogenaesesen blong Jehova, i impoten tumas we yumi raetem wan pepa folem loa blong talemaot samting ya. Mo yumi mas jusum gud man we bambae i mekem las toktok blong yumi i kamtru. Hem i mas wan man we yumi save trastem hem.
Man we yumi jusum, hem i gat wan bigfala wok blong mekem. Hamas samting we man ya i mas mekem mo hamas taem we bambae hem i spenem blong mekem ol wok ya, i dipen long hamas samting we man we i ded i bin raetem long las toktok blong hem. Antap long hemia, i gat sam loa blong gavman we yumi mas folem. Taswe, i no evriwan long kongregesen we oli save mekem gud wok ya. Yu mas jusum wan man we i naf, we yu trastem hem, mo we i agri blong mekem las toktok blong yu i kamtru.—Plis yu ridim Wekap! blong Disemba 8, 1998, pej 24-27 (Franis mo Inglis).
Sipos Wan Man i Jusum Yu Blong Yu Mekem Las Toktok Blong Hem i Kamtru: Fastaem yu mas “wokemaot praes blong olgeta samting,” i min se yu mas tingting gud se wok ya bambae i tekem hamas taem mo paoa blong yu. Yu mas prea mo tingting gud se bambae yu naf blong mekem wok ya stret olsem we man ya i wantem, no nogat. (Luk 14:28-32) Afta we man ya i ded, yu mas toktok wetem olgeta we nem blong olgeta i stap long pepa ya se oli gat raet blong kasem sam samting blong man ya. Nao bambae yu save seraot olting blong man ya i go long olgeta olsem we loa i talem mo olsem we man ya i raetem i stap long las toktok blong hem. Nating se olting blong man ya i plante no i smol, yu no mas ting nating long ol samting we hem i raetem mo yu no mas folem prapa tingting blong yu. Sipos wan man i mekem desisen blong givim mane blong hem i go long ogenaesesen blong ol Witnes blong Jehova taem hem i ded, mane ya bambae i blong ogenaesesen blong Jehova.—Luk 16:10; 21:1-4.