Trutok i Save Jenisim Laef Blong Yu
MAET yu yu harem no yu bilif long wan long ol giaman tingting ya long saed blong God we ol haf ya oli soemaot. Be maet yu fraet blong tekem desisen blong jenisim ol bilif blong yu, speseli sipos yu holem ol bilif ya longtaem finis.
I tru se i no isi blong mekem desisen olsem. Sam jos oli no pulum ol man blong skelem ol tijing blong olgeta wetem ol samting we Baebol i talem. Sam narafala oli no wantem se man i luksave ol rong tijing we oli stap tijim ol man long hem, ale oli talem se ol tok blong Baebol oli had tumas, i no evri man we bambae oli naf blong kasem save long hem. Bighaf blong ol disaepol blong Jisas oli no gat nem mo oli no skul gud. Nating se i olsem, oli kasem save gud long ol samting we Jisas i tijim olgeta long hem.—Ol Wok 4:13.
Maet samtaem yu no wantem jekem ol tijing blong jos blong yu from we yu ting se fasin ya i soemaot we yu no gat bilif. ?Yu ting se God bambae i kros long yu, sipos yu lukluk long Baebol blong traem save wanem we hem i wantem ol man blong mekem? !Nogat! God i wantem se yu mas stadi gud long tok blong hem. Hem i talem se: ‘Yufala i mas jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.’—Rom 12:2.
I impoten we yu traem save trutok long saed blong God, from we save ya bambae i mekem laef blong yu i kam gud moa. Be yu no traem save trutok ya from we yu wantem lanem wan niu samting nomo. (Jon 8:32) Deanne, we yumi tokbaot hem finis long stat, i mekem bilif blong hem long Tok blong God i kam strong moa. Hem i talem se: “Bifo mi no save se ol tok blong Baebol oli klia, be taem mi stat blong stadi long Baebol mi jes luksave se oli klia nomo. Naoia mi no moa tingbaot Jehova olsem wan God we i stap longwe long mi, be mi tingbaot hem olsem Papa blong mi long heven we i lavem mi. Mi no harem se laef blong mi i blong nating nomo.”
Maet yu stadi finis, be yu no harem se stadi ya i givhan long yu. Sipos i olsem, yu no mas lego. Taem yu gat wan giaman tingting long saed blong God nao yu traem blong kasem save wanem we Baebol i talem, i olsem we yu stap traem blong fiksimap wan masin be yu folem advaes long rong buk. Maet bambae yu save joenem gud sam haf blong hem, be bambae yu no naf blong fiksim gud masin ya. Ale blong fiksim gud masin ya, yu mas folem advaes we i stap long stret buk.
?Olsem wanem? ?Yu yu wantem lanem trutok long saed blong God? Mifala i glad sipos yu toktok wetem ol Witnes blong Jehova long ples blong yu, no yu raet i kam long mifala long wan long ol adres long pej 4 blong magasin ya. Olgeta ya bambae oli glad blong kam luk yu blong mekem Baebol stadi wetem yu we yu no pem.
[Tok blong makem poen long pej 9]
‘Yufala i mas jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.’—ROM 12:2