“Skul We Man i Wokem Blong Hem Wan” ?Hemia Nao Ansa Blong Problem Ya?

FROM WE ol jos oli stap lusum paoa long ol man, yumi no sapraes we plante man oli stap wokem prapa skul blong olgeta wanwan. Be, tufala kwestin we i stap se: ?Samting ya bambae i givim wanem we ol man ya oli nidim long saed blong spirit? ?“Skul we man i wokem blong hem wan,” hemia nao ansa blong problem ya?

Blong ansa long tufala kwestin ya, i gud we fastaem yumi yusum “paoa blong tingting” blong yumi, bigfala presen ya we God i givim mo we i sas tumas. Bambae yumi skelem sipos wan skul we man i wokem blong hem wan i rili laenap wetem stret tingting.​—⁠Rom 12⁠:​1, NW.

Wan man we i yusumgud paoa blong tingting blong hem i no save agri long ol save we oli no tru. Be, long Swiden, sam man we oli stadi long ol man we oli wokem skul blong olgeta wan, oli faenem se plante man “oli joenem ol bilif we oli defdefren (maet sam bilif oli agensem sam narafala bilif), blong wokem prapa bilif blong olgeta.”

Olsem nao, long ol man we oli talem se oli “Kristin folem prapa bilif blong olgeta nomo,” smol nomo (2 pesen) oli tokbaot Jisas. Mo oli no agri tu se Jisas i wan man we i bin laef samtaem. Be plante long olgeta oli tekem bilif ya se taem man i ded hem i kam wan anamol no wan narafala samting. Nao traem tingbaot: ?I stret we ol man ya oli talem se oli stap folem Jisas Kraes, be oli no bilif long laef mo ol tijing blong hem? ?I stret we oli talem se oli stap folem Jisas, be oli bilif long sam tijing we oli agensem ol tijing blong Kraes?a

Taem yumi yusum paoa blong tingting blong yumi, yumi no glad tu long ol bilif we oli no klia nating mo oli had blong eksplenem. Be taem samfala oli askem long ol man sipos oli bilif long “God no long wan paoa we i strong olsem God,” bighaf blong olgeta oli ansa se maet “Wan Samting Olsem” i stap. Wan man i talem se: “Mi mi bilif long wan bigfala paoa we i bitim paoa blong yumi, be maet hem i no God.” Ol narafala tu we oli talem se oli bilif long God, oli ting se hem i “no wan impoten samting long laef blong olgeta.” Taswe, ripot ya i talem se skul we man i wokem blong hem wan nomo, “i wan bigfala hip blong ol tingting, bilif, mo rul, we oli no klia.” Mo ripot ya i finis wetem wan ansa we bighaf blong ol man oli givim se: “Mi mi bilif long wan samting, be mi no save talem stret se samting ya i olsem wanem.”

Samfala long Kanada tu oli stadi long skul we man i wokem blong hem wan nomo. Mo oli faenemaot ol semfala samting. Niuspepa ya Alberta Report i talem se: “Naoia, mifala i luk we fulap man oli bilif long enikaen samting nomo, nating se tingting ya i stret no nogat. Mo mifala i traem blong luksave olsem wanem ol bilif ya oli lidim ol man ya long laef blong olgeta, be mifala i no faenem wan samting. Oli no gat wan God blong talem long olgeta wanem i gud mo wanem i nogud. Taswe, wan bilif olsem i rili nating nomo.” Niuspepa ya i tokbaot “wan god we oli wokem long plante haf,” from we ol man we oli holem bilif ya oli “jusumaot sam bilif blong ol defdefren jos, we oli joenem tugeta.” ?Yu ting se i stret blong wan man i stanemap bilif mo hop blong hem long ol tingting we oli no klia, we i no gat pruf blong olgeta, mo we oli kamaot long ol defdefren skul?

Yumi Nidim Kampani Blong Ol Man

Longtaem finis i kam, ol man blong skul oli tinghae long fasin blong joen wanples wetem ol narafala, joen olsem wan brata nomo, mo gat wan tingting wetem ol narafala long wan grup. (Ol Wok 2⁠:​42, 46) ?Be skul we man i wokem blong hem wan nomo, i save givim ol samting ya we hem i nidim? ?Olsem wanem skul we i blong wan man nomo i save givim ol samting ya?

Sipos “evri man i wokem skul blong hem wan nomo,” samting ya bambae i save mekem ol man oli raorao moa no seraot moa long saed blong skul. Niuspepa ya Alberta Report i talem se: “Naoia skul i laenap wetem prapa tingting blong ol man wanwan . . . , taswe, long kantri blong yumi, i no gat plante handred defdefren bilif, be i gat plante milian.” From samting ya, yumi no sapraes we samfala oli tokbaot skul we man i wokem blong hem wan nomo se, bilif we i olbaot mo i no gat wan loa insaed long hem.

?Olsem Wanem Long Ol Rul Long Saed Blong Gudfala Fasin?

Wan bisop blong Swiden, nem blong hem Martin Lönnebo, i toktok wetem ol man we oli raetem niuspepa ya Svenska Dagbladet. Hem i talem se, “fasin ya we man i wokem prapa skul blong hem wan i no save mekem wol blong yumi i kam moagud. Mo ol man we oli folem wan bilif olsem, oli faenem i had blong pasem ol gudfala fasin i go long ol pikinini blong olgeta.” Save ya i laenap wetem wan tingting we fulap papa mama long Swiden oli gat, long saed blong tijim pikinini blong olgeta. Niuspepa ya Svenska Dagbladet i tokbaot fasin blong olgeta i se: “!Yu save bilif long wanem samting we yu wantem bilif long hem! Mo yu no mas fosem pikinini blong yu blong tekem wan disisen. Letem pikinini i jus taem hem i kam bigwan lelebet.”

Niuspepa ya i raetem tingting blong hem se, sipos papa mama i pasem ol rul blong jos long saed blong gudfala fasin oli go long ol pikinini blong olgeta, ating oli stap fosem olgeta blong folem rod ya. Be, niuspepa ya i talem tu se: “Taem oli pasem ol rul long saed blong gudfala fasin oli go long ol pikinini blong olgeta, samting ya i save mekem i gud long pikinini. Mo maet hemia nomo samting we pikinini i gat . . . blong givhan long hem blong tekem prapa disisen blong hem.” Tru ya, trabol we ol yangfala oli fesem tede i soem se fasin ya we man i wokem skul blong hem wan nomo i no givhan blong mekem ol famle oli joengud, mo i no givim ol stamba rul long saed blong gudfala fasin we ol papa mama oli save pasem long ol pikinini blong olgeta.

From samting ya, i luk olsem se skul we man i wokem blong hem wan nomo i no save givim ol gudfala ansa we yumi save trastem, long ol kwestin blong laef. Mo tu, hem i no save mekem ol man oli joengud mo givim samting we man i nidim blong lidim hem blong mekem ol gudfala fasin. Niuspepa ya we yumi tokbaot finis, Svenska Dagbladet, i talem wan tingting long saed ya, i se: “Taem ‘bilif’ i kamaot long plante defdefren tingting, hem i no gat mining. Mo taem fasin fri i no gat mak blong hem, man i no rili fri.”

I klia se, fasin ya we man i wokem skul blong hem wan nomo i no save givim ol samting we man i nidim long saed blong spirit. ?Olsem wanem? ?Man i save kasem ol samting ya we hem i nidim sipos hem i jusumaot bilif blong hem long ol defdefren tingting mo kastom? !No gat! Hemia i olsem we man i go long wan lafet, mo i jusumaot ol kakae nomo we hem i wantem. Mo yumi luk se ol jos tu oli no stap givim ol samting we man i nidim long saed blong spirit. ?Ale, yumi save faenem ol samting ya weples?

[Futnot]

[Tok blong pija long pej 8]

?Long saed blong skul, yu ting se i stret we yumi jusum ol bilif nomo we yumi wantem, olsem man we i go long wan lafet, mo i jusum nomo ol kakae we hem i wantem?