?Wanem Fyuja Blong Ol Sipsip Mo Ol Nani?

“Olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i save seraot ol sipsip blong hem long ol nani blong hem.”​—MATYU 25:32.

1, 2. ?From wanem yumi mas intres long parabol blong ol sipsip mo ol nani?

JISAS KRAES i rili wan Tija we i hae moa long ol narafala tija long wol. (Jon 7:46) Wan long ol fasin we hem i stap yusum blong tij, hemia ol parabol, no ol pijatok. (Matyu 13:​34, 35) Ol parabol we hem i yusum oli isi, be oli gat paoa blong eksplenem ol dip trutok long saed blong speret, mo ol profet tok.

² Long parabol blong ol sipsip mo ol nani, Jisas i makem stret taem we bambae hem i mekem wan spesel wok: “Long taem ya we mi, mi Pikinini blong Man, bambae mi kamtru wetem . . . olgeta paoa blong mi, nao . . .” (Matyu 25:31) Yumi intres tumas long parabol ya, from we hem i laswan parabol we Jisas i yusum blong ansa long kwestin ya: “?Wanem saen bambae i soemaot we yu yu stap finis mo we fasin ya blong wol i kasem en blong hem?” (Matyu 24:3, NW) ?Be samting ya i minim wanem long yumi?

3. ?Long tok blong Jisas, hem i bin talem se wanem bambae i kamaot stret afta we bigfala trabol i stat?

³ Jisas i tokbaot ol bigfala samting we bambae oli kamaot ‘stret afta’ we bigfala trabol i faerap. Hemia ol samting we yumi stap wet long olgeta. Hem i talem se biaen, bambae ol man oli luk “saen blong mi, mi Pikinini blong Man.” Bambae samting ya i gat bigfala paoa long “olgeta laen blong ol man blong wol” we bambae oli ‘luk Pikinini blong Man, i kamaot long ol klaod blong skae, wetem olgeta paoa we hem i gat, mo long bigfala laet we i saenaot raonabaot long hem.’ Bambae Pikinini blong Man i kam wetem ‘ol enjel blong hem.’ (Matyu 24:​21, 29-31)a ?Olsem wanem long parabol blong ol sipsip mo ol nani? Long ol Baebol blong tede, parabol ya i stap long japta 25. Be hem i haf blong ansa blong Jisas, we i givim moa save long saed blong taem ya we bambae hem i kam wetem bigfala paoa blong hem. Mo tu, parabol ya i makem se bambae hem i jajem “olgeta man blong wol.”​—Matyu 25:32.

Olgeta We Parabol Ya i Tokbaot

4. ?Olsem wanem stat blong parabol blong ol sipsip mo ol nani i tokbaot Jisas, mo hu bakegen i stap insaed long parabol ya?

⁴ Jisas i statem parabol ya wetem ol tok ya: “Long taem ya we mi, mi Pikinini blong Man, bambae mi kamtru.” Ating yu yu save finis hu ya “Pikinini blong Man.” Plante taem ol man we oli raetem ol Gospel, oli yusum tok ya blong talem Jisas. Mo tu, Jisas hem wan i mekem olsem. I klia se hem i stap tingbaot drim blong Daniel, long saed blong “wan man we i olsem pikinini blong man” we i kam kolosap long Olfala blong Ol Dei blong kasem “paoa blong rul mo haenem mo kingdom.” (Daniel 7:​13, 14; Matyu 26:​63, 64; Mak 14:​61, 62) I tru se impoten man insaed long parabol ya hemia Jisas, be i no Jisas hem wan. Long tok ya blong Jisas, olsem i stap long Matyu 24:​30, 31, hem i talem finis se taem ‘Pikinini blong Man i kam wetem bigfala paoa mo laet we i saenaot raonabaot long hem,’ ol enjel blong hem bambae oli mekem wan impoten wok. I sem mak, parabol blong ol sipsip mo ol nani i soem se ol enjel oli stap wetem Jisas taem hem i ‘sidaon long bigfala jea blong hem’ blong jajem ol man. (Skelem wetem Matyu 16:27.) Be Jaj ya mo ol enjel blong hem oli stap long heven. ?Olsem wanem long ol man? ?Parabol ya i tokbaot olgeta tu?

5. ?Olsem wanem yumi save makemaot “ol brata” blong Jisas?

⁵ Taem yumi ridim parabol ya, yumi faenem tri grup we yumi mas kasem save long olgeta. Antap long ol sipsip mo ol nani, Pikinini blong Man i ademap namba tri grup. Yumi nidim blong save mining blong olgeta ya, blong yumi save luksave hu ya ol sipsip mo ol nani. Jisas i kolem namba tri grup ya se, ol brata blong hem long saed blong speret. (Matyu 25:​40, 45) Olgeta long grup ya oli mas mekem trufala wosip long God, from we Jisas i talem se: “Man we i stap mekem ol samting we Papa blong mi long heven i wantem, hemia nao i brata blong mi, mo sista blong mi, mo mama blong mi.” (Matyu 12:50; Jon 20:17) Blong talem klia moa, leta we Pol i raetem, i tokbaot ol Kristin we oli haf blong ‘laen blong Ebraham’ mo oli pikinini blong God. Hem i kolem olgeta ya “ol brata” blong Jisas, mo olgeta we “oli joen long hem long gudfala laef blong hem long heven.”​—Hibrus 2:​9 kasem 3:​1; Galesia 3:​26, 29.

6. ?Hu ya ol brata blong Jisas we oli “daon moa”?

⁶ ?From wanem Jisas i tokbaot ol brata blong hem ‘we oli daon moa’ long ol narafala brata blong hem? Ol tok ya oli sem mak long ol tok blong hem we ol aposol oli harem bifo. Jisas i bin tokbaot Jon Baptaes we i gat hop blong laef long wol, from we hem i ded bifo long Jisas. Hem i defren long grup blong ol man we bambae oli go long heven. Jisas i talem se: ‘Long olgeta we i bon long wol ya, i no gat man we i hae moa, i winim Jon Baptaes. Be man we i daon moa long kingdom blong heven, hem i hae moa long Jon.’ (Matyu 11:11) Maet samfala we oli go long heven oli ol impoten man long kongregesen, olsem ol aposol. Maet sam narafala oli no impoten tumas. Be olgeta evriwan oli brata blong Jisas long saed blong speret. (Luk 16:10; 1 Korin 15:9; Efesas 3:8; Hibrus 8:11) Taswe, nating se samfala oli no impoten tumas taem oli stap long wol ya, be oli stil brata blong Jisas. Mo from samting ya, ol man oli mas mekem i gud long olgeta.

?Hu Ya Ol Sipsip Mo Ol Nani?

7, 8. ?Jisas i talem wanem long saed blong ol sipsip, ale yumi save talem wanem long saed blong olgeta?

⁷ Long saed blong jajmen long ol sipsip, yumi ridim se: “[Mi Jisas] bambae mi talem long olgeta long raet saed blong mi, se ‘Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem. Yufala i kam tekem ples ya blong yufala. From we taem we mi mi hanggri, yufala i givim kakae long mi, mo taem we mi mi tosta, yufala i givim wora long mi. Taem we mi mi strenja, yufala i tekem mi mi go long haos blong yufala, mo taem we mi mi neked, yufala i givim klos long mi. Taem we mi mi sik, yufala i kam luk mi, mo taem we mi mi stap long kalabus, yufala i kam storeyan wetem mi.’ Nao ol stret man ya bambae oli ansa long mi se ‘?Masta mifala i luk yu wetaem we yu yu hanggri, nao mifala i givim kakae long yu, no yu yu tosta, nao mifala i givim wora long yu? ?Mifala i luk yu wetaem we yu yu strenja, nao mifala i tekem yu yu kam long haos blong mifala, no yu yu neked, nao mifala i givim klos long yu? ?Mifala i luk yu wetaem we yu yu sik, no yu stap long kalabus, nao mifala i go luk yu?’ Nao mi, mi king, bambae mi ansa long olgeta se ‘Tru mi talem long yufala, taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.’ ”​—Matyu 25:​34-40.

⁸ I klia se ol sipsip ya oli minim wan grup blong man. Oli kasem gudfala jajmen we oli save stap long raet saed blong Jisas, we i min se hem i ona mo i glad long olgeta. (Efesas 1:20; Hibrus 1:3) ?Oli mekem wanem, mo wetaem oli mekem samting ya? Jisas i talem se wetem kaen fasin, respek, mo gladhat, oli givim kakae, wora, mo klos long hem, mo oli givhan long hem taem hem i sik mo i stap long kalabus. Taem ol sipsip oli talem se oli no mekem samting ya stret long Jisas hem wan, hem i talem se oli bin sapotem ol brata blong hem long saed blong speret, hemia smol grup blong ol tabu Kristin long wol ya. Taswe, i olsem we oli mekem samting ya stret long hem.

9. ?From wanem parabol ya bambae i no kamtru long Rul Blong Wan Taosen Yia?

⁹ Bambae parabol ya i no kamtru long Rul blong Wan Taosen Yia, from we long taem ya, ol tabu Kristin bambae oli no moa ol man we oli stap kasem ol trabol, olsem hanggri, tosta, sik mo stap long kalabus. Be, plante long olgeta oli kasem ol trabol ya naoia long ol las dei blong wol ya. Stat long taem we oli sakemaot Setan long heven i kamdaon long wol, hem i makem ol tabu Kristin olsem ol man we hem i kros moa long olgeta. Hem i mekem ol man oli jikim mo laf long olgeta, i mekem oli harem nogud long bodi blong olgeta, mo i kilim olgeta oli ded.​—Revelesen 12:17.

10, 11. (a) ?From wanem i no stret blong ting se ol sipsip i minim olgeta evriwan we oli soem kaen fasin long ol brata blong Jisas? (b) ?Ol sipsip oli pija blong hu?

¹⁰ ?Jisas i minim wanem? ?Hem i min se evri man we i soem wan smol kaen fasin long wan brata blong hem, olsem i givim wan pis bred no wan glas wora, hem i olsem wan sipsip? I tru, fasin kaen olsem i soem se man ya i tingtinggud long olgeta. Be i luk olsem se i gat plante moa samting tu we ol sipsip blong parabol ya oli mas mekem. Eksampel, Jisas i no save minim se, sipos ol man we oli no bilif long God mo ol lida blong skul, oli soem wan kaen fasin long wan brata blong hem, samting ya i min se oli olsem ol sipsip. Defren olgeta, tu taem bakegen, Jisas i kolem ol sipsip se “ol stret man.” (Matyu 25:​37, 46) Taswe ol sipsip oli mas ol man we oli bin givhan long ol brata blong Kraes longtaem lelebet. Oli bin wok strong blong sapotem olgeta. Mo oli bin soem bilif go kasem mak ya we God i luk olgeta olsem ol stret man.

¹¹ Long ol handred yia we oli pas, God i luk plante man olsem we oli stret man, wan long olgeta hemia Ebraham. (Jemes 2:​21-23) Noa, Ebraham, mo sam narafala man we oli fasgud long God, oli sam long “ol narafala sipsip” we bambae oli kasem laef long Paradaes aninit long Kingdom blong God. I no longtaem i pas, plante milyan man oli joen long trufala wosip. Oli kam olsem ol narafala sipsip mo oli joen wetem ol tabu Kristin olsem “wan kampani” nomo. (Jon 10:16; Revelesen 7:9) Ol man ya we oli gat hop blong laef long wol, oli luk ol brata blong Jisas olsem ol ambasada blong Kingdom. From samting ya, oli givhan long olgeta​—long saed blong bodi mo long saed blong speret. Jisas i tingbaot ol samting we ol narafala sipsip oli mekem long ol brata blong hem long wol ya, olsem we oli mekem long hem nomo. Olgeta ya we oli stap mekem olsem taem hem i kam blong jajem olgeta man blong wol, bambae hem i jajem olgeta se oli sipsip.

12. ?From wanem ol sipsip bambae oli askem olsem wanem oli bin soem kaen fasin long Jisas?

¹² Sipos ol narafala sipsip oli stap talemaot gud nyus naoia wetem ol tabu Kristin, mo stap givhan long olgeta, ?from wanem oli askem se: “?Masta mifala i luk yu wetaem we yu yu hanggri, nao mifala i givim kakae long yu, no yu yu tosta, nao mifala i givim wora long yu?” (Matyu 25:37) I save gat plante risen from wanem oli talem olsem. Hemia i wan parabol. Jisas i yusum parabol ya blong soem bigfala fasin kea we hem i gat long ol brata blong hem long saed blong speret. Ol samting we i tajem filing blong olgeta i tajem filing blong hem, mo taem olgeta oli safa hem tu i safa. Bifo finis, Jisas i talem se: “Man we i tekem yufala i go insaed long haos blong hem, i olsem we hem i tekem mi mi go insaed. Mo man we i tekem mi mi go insaed long haos blong hem, i olsem we hem i tekem hemia tu we i sanem mi, i go insaed.” (Matyu 10:40) Long parabol ya, Jisas i mekem rul ya i go moa. Hem i soem se samting we ol man oli mekem (gudfala samting no nogud samting) long ol brata blong hem, i go kasem heven tu. I olsem we oli mekem long hem long heven. Mo tu, long ples ya, Jisas i makem ol rul we Jeova i folem blong jajem ol man. Hem i mekem i klia se jajmen we God i mekem long ol man, se bambae oli kasem laef no bambae oli lus, i stretgud mo i tru nomo. Ol nani oli no save mekem eskyus se, ‘Yes be sipos mifala i bin luk yu stret, bambae mifala i mekem i defren.’

13. ?From wanem ol man we oli olsem nani bambae oli singaot Jisas se “Masta”?

¹³ Taem yumi kasem save wetaem jajmen long parabol ya bambae i kamtru, tingting blong yumi i kam klia moa se hu nao ol nani. Bambae parabol ya i kamtru taem ‘saen blong Pikinini man i kamaot long skae. Nao olgeta laen blong ol man blong wol bambae oli krae, nao bambae oli save luk Pikinini blong man i kam wetem olgeta paoa we hem i gat, mo long bigfala laet we bambae i saenaot raonabaot long hem.’ (Matyu 24:​29, 30) Ol man we oli laef tru long trabol we i spolem Bigfala Babilon, mo we oli bin mekem i nogud long ol brata blong King, maet long taem ya oli singaot Jaj se “Masta,” from we oli wari tumas, mo oli wantem traem sevem laef blong olgeta.​—Matyu 7:​22, 23; skelem wetem Revelesen 6:​15-17.

14. ?Taem Jisas i jajem ol sipsip mo ol nani, jajmen blong hem bambae i stanap long wanem?

¹⁴ Be, ol krae blong ol man we bifo oli go oltaem long skul blong olgeta, mo olgeta we oli no bilif long God, mo sam narafala bakegen, bambae oli no gat paoa long jajmen blong Jisas. (2 Tesalonaeka 1:8) Jaj ya bambae i skelem hat blong ol man, mo ol samting we oli bin mekem long ‘ol brata blong hem we oli daon moa.’ I tru, ol tabu Kristin we oli stap long wol ya, namba blong olgeta i stap godaon. Be oli stap gohed yet blong givim kakae long saed blong speret mo soemaot rod, olsem “slef ya we i stret mo waes.” Taem oli stap gohed blong mekem olsem, olgeta we oli save kam olsem sipsip, oli gat jans yet blong mekem i gud long grup ya we i olsem slef. Hemia sem fasin we ‘bigfala hif blong man we oli kamaot long olgeta laen mo kantri mo lanwis,’ oli mekem finis.​—Revelesen 7:​9, 14.

15. (a) ?Olsem wanem plante man oli stap soem se oli olsem nani? (b) ?From wanem yumi no mas talem sipos wan man i sipsip no i nani?

¹⁵ ?Ol man we oli olsem nani, oli mekem olsem wanem long ol brata blong Kraes mo plante milyan blong ol narafala sipsip we oli joen wetem olgeta olsem wan kampani nomo? Maet plante man oli no agensem stret ol man we oli wok long nem blong Kraes. Be oli no bin soem lav long ol man blong hem tu. Ol man we oli olsem nani oli jusum rabis wol ya. Taswe, oli no wantem mesej blong Kingdom, nating se man i talem stret long olgeta no oli harem long wan narafala rod. (1 Jon 2:​15-17) I tru se, long en blong bisnes ya, Jisas nao i man ya we God i putumap blong i jajem olgeta man. I no yumi we i mas talem hu i sipsip mo hu i nani.​—Mak 2:8; Luk 5:22; Jon 2:​24, 25; Rom 14:​10-12; 1 Korin 4:5.

?Wanem Fyuja Blong Ol Sipsip Mo Ol Nani?

16, 17. ?Bambae ol sipsip oli gat wanem fyuja?

¹⁶ Jisas i jajem ol sipsip se: “Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem.” “Yufala i kam.”​—!hemia ol naesfala tok blong singaot olgeta! ?Kam weples? Blong kasem laef we i no save finis, olsem tok we hem i bin talem se: “Ol stret man bambae oli go blong kasem laef ya we i no save finis.”​—Matyu 25:​34, 46.

¹⁷ Long parabol long saed blong mane, Jisas i soem samting we ol man blong rul wetem hem long heven oli mas mekem. Be long parabol ya blong ol sipsip mo nani, hem i soem samting we ol man blong stap aninit long Kingdom oli mas mekem. (Matyu 25:​14-23) Blong talem long klia fasin: From we ol sipsip oli sapotem ol brata blong Kraes wetem fulhat blong olgeta, bambae oli stap laef long wol ya aninit long rul blong Kingdom blong hem. Bambae oli haremgud long laef long paradaes long wol ya​—wan fyuja we God i rerem finis “taem hem i no mekem wol ya yet,” hemia i minim ol man we hem i pemaot olgeta blong oli save kam fri long sin.​—Luk 11:​50, 51.

18, 19. (a) ?Wanem jajmen we bambae Jisas i mekem long ol nani? (b) ?Olsem wanem yumi save se bambae ol nani oli no save harem nogud blong olwe?

¹⁸ !Jajmen ya i defren olgeta long jajmen we ol nani oli kasem! “Nao biaen, bambae mi talem long olgeta long lef saed blong mi, se ‘Yufala i gowe long mi. God i jajem yufala finis. Yufala i go long faea ya we bambae i no save ded samtaem, we oli mekem i rere finis blong Setan wetem ol enjel blong hem. From we taem we mi mi hanggri, be yufala i no givim kakae long mi, mo taem we mi mi tosta, be yufala i no givim wora long mi. Taem we mi mi strenja, be yufala i no tekem mi mi go long haos blong yufala, mo taem we mi mi neked, be yufala i no givim klos long mi. Mo taem we mi mi sik, no mi stap long kalabus, be yufala i no kam luk mi.’ Nao bambae olgeta ya tu oli ansa long mi se ‘?Masta, mifala i luk yu wetaem we yu yu hanggri, no yu tosta, no yu strenja, no yu neked, no yu sik, no yu stap long kalabus, be mifala i no kam givhan long yu?’ Nao mi, mi king, bambae mi talem long olgeta, se ‘Tru mi talem long yufala, taem we yufala i no go blong mekem olsem long wan brata blong mi we i daon moa long ol narafala brata blong mi, be hemia i olsem we yufala i no mekem long mi.’ ”​—Matyu 25:​41-45.

¹⁹ Olsem ol Baebol studen oli save finis, hemia i no min se ol man we oli olsem nani oli gat sol we i no save ded, we bambae i harem nogud blong olwe long faea. No gat, from we man nao i wan sol. Hem i no gat wan sol we i no save ded. (Jenesis 2:7; Eklesiastis 9:​5, 10; Esikel 18:4) Taem Jaj i talem se ol nani oli go long “faea ya we bambae i no save ded samtaem,” hem i minim se bambae oli ded we oli no moa gat wan hop blong laef long fyuja. Devel Setan wetem ol enjel blong hem tu bambae oli lus blong olwe. (Revelesen 20:​10, 14) Taswe, Jaj blong Jeova i mekem tu defren kaen jajmen. Hem i talem long ol sipsip se “Yufala i kam.” Be, hem i talem long ol nani se “Yufala i gowe long mi.” Ol sipsip bambae oli kasem “laef ya we i no save finis.” Ol nani bambae oli kasem “panis ya we i no save finis.”​—Matyu 25:46.b

?Samting Ya i Minim Wanem Long Yumi?

20, 21. (a) ?Ol Kristin oli gat wanem impoten wok blong mekem? (b) ?Naoia, wanem wok blong seraot ol man i stap gohed? (c) ?Bambae olsem wanem long ol man taem parabol blong ol sipsip mo ol nani i stat blong kamtru?

²⁰ Ol fo aposol we oli harem ansa blong Jisas long saed blong saen we bambae i soemaot taem we hem i stap mo en blong fasin blong wol ya, oli gat plante samting blong tingbaot. Oli mas stap wekapgud oltaem, mo oli mas lukaotgud. (Matyu 24:42) Mo tu, oli mas mekem wok blong prij olsem Mak 13:10 i talem. Tede ol Wetnes blong Jeova oli stap wok strong long wok ya.

²¹ ?Be, nyufala mining blong parabol ya blong ol sipsip mo ol nani i minim wanem long yumi? Yes, ol man oli stap jusum rod blong olgeta finis. Samfala oli stap long ‘bigfala rod ya we i blong go lus.’ Sam narafala oli stap traehad blong folem ‘rod ya we i smol mo i strong, we i blong go kasem laef.’ (Matyu 7:​13, 14) Be taem ya we bambae Jisas i mekem laswan jajmen blong hem long ol sipsip mo nani, olsem parabol ya i tokbaot, i stap yet long fyuja. Taem Pikinini blong man i kamtru blong mekem wok blong Jaj, bambae hem i faenem se plante trufala Kristin​—“wan bigfala hif blong man” we oli olsem sipsip we oli givim laef blong olgeta long God​—bambae oli stret blong pastru long laswan haf blong ‘bigfala trabol,’ mo go insaed long nyufala wol. Hop ya i mas wan stampa blong bigfala glad naoia. (Revelesen 7:​9, 14) Be bambae hem i faenem tu se, wan bigfala namba blong “olgeta man blong wol” oli soem finis se oli olsem ol stronghed nani. Bambae “oli kasem panis ya we i no save finis.” !Bambae i no moa gat rabis man long wol!

22, 23. Parabol ya bambae i jes kamtru long fyuja, taswe ?from wanem wok blong prij we yumi mekem tede i impoten?

²² Jajmen we parabol ya i tokbaot bambae i kamtru i no longtaem long fyuja. Be naoia tu i gat wan impoten samting i stap hapen. Yumi ol Kristin, yumi stap mekem wan wok blong sevem laef blong man. Hemia wok blong talemaot wan mesej we i mekem ol man oli seraot long tu grup. (Matyu 10:​32-39) Pol i raetem se: “ ‘Olgeta we oli singaot long [Jeova], oli talem nem blong hem, hem bambae i sevem olgeta.’ ?Be . . . sipos man man i no go talemaot nyus blong God, bambae ol man oli save harem nyus ya olsem wanem? ?Mo sipos ol man oli no harem nyus ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem?” (Rom 10:​13, 14) Wok blong prij we yumi stap mekem blong talemaot nem blong God mo mesej blong sevem man, i stap gohed long bitim 230 kantri. Ol tabu brata blong Kraes oli stap lidim wok ya yet. Naoia, samwe long faef milyan narafala sipsip oli joenem olgeta. Mo plante man raonabaot long wol oli stap lesin long mesej we ol brata blong Jisas oli stap talemaot.

²³ Plante man oli harem mesej blong yumi taem yumi prij long ol haos wanwan no yumi tekem jans blong prij. Maet sam narafala oli harem nyus long saed blong ol Wetnes blong Jeova mo mesej blong olgeta, long ol narafala rod we yumi no save. ?Olsem wanem long fasin blong jajem wan ful velej wantaem, no jajem ol smol pikinini from disisen blong papa mama blong olgeta? Taem haoa blong jajmen i kam, ?Jisas bambae i yusum ol fasin ya blong jaj, go kasem wanem mak? Yumi no save talem, mo i blong nating nomo sipos yumi traem talem prapa tingting blong yumi. (Skelem wetem 1 Korin 7:14.) Naoia, plante man oli no wantem lesin, oli tok jiki, mo oli ronem ol man blong God. Taswe, naoia i wan impoten taem. Maet ol man olsem oli stap kam ol man ya we bambae Jisas i jajem olgeta se oli nani.​—Matyu 10:22; Jon 15:20; 16:​2, 3; Rom 2:​5, 6.

24. (a) ?From wanem i impoten we ol wanwan man oli akseptem mesej we yumi talem long wok blong prij? (b) ?Stadi ya i halpem yu blong gat wanem tingting long saed blong Kristin minista wok blong yu?

²⁴ Be i gud tumas we plante oli intres, oli stadi long Tok blong God, mo oli kam Wetnes blong Jeova. Samfala we naoia i luk olsem se oli nani, maet oli save jenis mo kam sipsip. Bigfala samting se olgeta we oli lesin mo oli stap wok strong blong sapotem smol grup blong ol tabu brata blong Kraes long wol, naoia oli givim pruf se bambae oli naf blong stap long raet saed blong Jisas taem hem i sidaon long bigfala jea blong hem blong jajem ol man, i no longtaem long fyuja. God i stap blesem olgeta ya mo bambae i gohed blong blesem olgeta. Taswe, parabol ya i mas pulum yumi blong wok strong moa long Kristin minista wok. Bifo we i no moa gat taem, yumi wantem mekem olgeta samting we yumi naf blong mekem, blong talemaot gud nyus blong Kingdom, mo long rod ya, givim jans long ol man blong lesin. Biaen, Jisas nao bambae i jajem olgeta, se oli kasem panis no oli kasem laef.​—Matyu 25:46.

[Ol futnot]

?Yu Yu Tingbaot?

◻ ?Wanem samting long Matyu 24:​29-31 mo Matyu 25:​31-33 we i sem mak, mo i soem se parabol blong ol sipsip mo ol nani bambae i kamtru long fyuja? ?Mo bambae i kamtru long wanem taem stret?

◻ ?Hu ya ol brata blong Jisas ‘we oli daon moa’?

◻ ?Olsem wanem tok ya “ol stret man” we Jisas i yusum i halpem yumi blong luksave olgeta ya we tok ya i stret long olgeta, mo olgeta we tok ya i no stret long olgeta?

◻ ?Nating se parabol ya bambae i kamtru long fyuja, from wanem wok blong prij we yumi mekem i impoten tumas naoia?

[Bokis/Foto blong pija long pej 24]

MAKEM OL SAMTING WE OLI SEM MAK

Matyu 24:​29-31 Matyu 25:​31-33

Afta we bigfala trabol i stat, Pikinini blong man bambae

Pikinini blong man i kamtru i kamtru

Hem i kam wetem bigfala Hem i kamtru wetem bigfala

paoa blong hem paoa mo i sidaon long bigfala

jea blong hem

Ol enjel wetem hem Ol enjel oli kamtru wetem hem

Ol laen blong olgeta man Olgeta nesen oli hivap wanples;

long wol oli luk hem hem i jajem ol nani biaen

(bigfala trabol i finis)

[Credit Line]

Garo Nalbandian