Wan Kwestin

?Olsem wanem sipos wan jos i wantem mekem bisnes wetem wan Witnes blong Jeova from sam wok long joshaos no long graon blong hem? ?Wanem tingting blong Baebol long saed ya?

Maet sam Kristin we oli rili wantem mekem 1 Timoti 5:8 i wok long laef blong olgeta, oli fesem kwestin ya. Long vas ya, Baebol i soemaot se wok ya blong sapotem famle blong yumi long saed blong mane i impoten tumas. I tru, olgeta Kristin oli mas folem advaes ya, be samting ya i no minim se oli karem enikaen wok blong winim mane. Ol Kristin oli mas tingbaot ol narafala rul tu we God i wantem yumi blong folem. Eksampel, from we wan man i wantem tumas blong sapotem famle blong hem long saed blong mane, samting ya i no minim se i stret blong hem i brekem loa blong Baebol long saed blong kilim man i ded no rabis fasin long saed blong seks. (Skelem wetem Jenesis 39:​4-9; Aesea 2:4; Jon 17:14, 16.) I impoten tu se ol Kristin oli folem oda ya blong aot long Bigfala Babilon, we i minim olgeta giaman skul blong wol.​—Revelesen 18:​4, 5.

Raonabaot long wol, ol man blong God oli fesem plante defren disisen we oli mas mekem long saed blong wok. Mifala i no traem tokbaot olgeta samting we maet olgeta oli fesem long ples blong wok, mo mifala i no gat raet tu blong stanemap fulap rul blong kavremap olgeta samting ya. (2 Korin 1:24) Be i gud mifala i tokbaot sam samting we ol Kristin oli mas tingbaot, taem oli mekem prapa disisen blong olgeta long saed blong wok. Ol samting ya oli stap finis long Wajtaoa blong Julae 15, 1982 we i tokbaot olsem wanem tingting we God i putum insaed long yumi blong jajem yumi, i save givhan long yumi. Long wan bokis we i stap long Wajtaoa ya, i gat tu bigfala kwestin mo sam narafala samting bakegen we oli givhan.

Fasfala kwestin i olsem: ?Wok ya, hem i wan kaen wok we Baebol i agensem? Wajtaoa i tokbaot samting ya i se, Baebol i agensem fasin blong stil, yusum blad long fasin we i no stret, mo fasin blong wosip long aedol. Wan Kristin i no save mekem wan wok blong winim mane, sipos wok ya i leftemap ol samting we God i agensem stret, olsem we yumi jes tokbaot.

Seken kwestin i olsem: ?Taem yumi mekem wok ya, yumi stap sapotem wan fasin we Baebol i agensem? I klia nomo se, sipos wan man i wok long kasino, no long wan hospital we i givhan long woman we i wantem kilim pikinini long bel, no long wan haos blong woman blong rod, hem i sapotem wan fasin we i agensem Baebol stret. Nating se wok blong hem long ples ya i blong klinim floa no blong ansa long telefon nomo, be hem i stap sapotem wan fasin we i agensem tok blong God.

Plante Kristin we oli fesem finis ol disisen long saed blong wok, oli faenem se taem oli tingbaot tufala kwestin ya, samting ya i givhan long olgeta blong mekem prapa disisen blong olgeta.

Eksampel, tufala kwestin ya oli givhan long yumi blong luksave from wanem wan trufala Kristin i no save stap olsem wan wokman we i wok long giaman jos. Oda long Revelesen 18:4 i talem se: “Ol man blong mi, yufala i kam. Yufala i kamaot long hem. I nogud yufala i stap joen wetem hem long ol sin ya we hem i stap mekem.” Wan man we i stap wok oltaem long wan Jos we i tijim giaman wosip, hem i joen long ol wok mo sin blong Bigfala Babilon. Nating se hem i man blong wokem garen, no i man blong fiksimap ol samting blong jos, no hem i man blong lukaot long mane, be wok blong hem i sapotem wan wosip we i agensem trufala skul. Antap long samting ya, ol narafala we oli luk man ya i wok long jos blong mekem i luk naes, no blong fiksimap sam samting, bambae oli ting se man ya i memba blong jos ya.

?Be olsem wanem long wan man we i no stap wok oltaem long jos? Maet jos i singaot hem nomo long taem blong trabol, olsem blong fiksimap wan paep blong wota we i brok. ?Bambae samting ya i defren long man ya we i mekem wan kontrak, olsem kontrak blong putum wan niufala ruf long jos?

Bakegen, i gat plante defren samting we yumi save tingbaot long saed ya. Wajtaoa i tokbaot faef narafala samting. I gud yumi lukluk bakegen long olgeta.

1. ?Wok ya i jes blong givhan long man nomo, mo i no agensem ol rul blong Baebol? Tingbaot eksampel blong man blong postofis. Maet hem i go givimaot ol leta long haos blong ol man long wan eria we i ples blong jos no wan haospetal blong spolem pikinini long bel blong mama. Be samting ya i no min se hem i sapotem wan fasin we Baebol i agensem. God i letem laet blong san i saenaot tru long windo blong evri haos, wetem jos no haospetal olsem tu. (Ol Wok 14:​16, 17) Maet wan Kristin we i mekem wok blong givimaot ol leta i ting se, wok ya we hem i mekem i blong givhan long olgeta man evri dei. Maet samting ya i sem mak long wan brata we i mas kam kwiktaem blong stretem wan problem​—olsem sipos paep blong wota i brok long wan jos mo oli nidim man blong fiksimap, no wan man i foldaon long taem blong miting blong jos nao oli singaot ambulans i kam. Brata ya i save tingbaot samting ya olsem wan wok we hem i no stap mekem oltaem, be hem i mekem long taem ya from we i blong givhan long man.

2. ?Go kasem wanem mak, man ya i bos long samting we hem i mekem? Wan Kristin we i gat wan stoa, ating i no save agri blong odarem mo blong salem ol aedol, no ol ston blong givim laki, tabak, no ol sosis we oli wokem long blad. From we hem i masta, hem i bos. Maet ol man oli pusum hem blong salem tabak no ol aedol blong winim moa mane from, be bambae hem i mekem samting we i laenap wetem bilif blong hem long Baebol. Be samting ya i defren olgeta long wan Kristin we i wok long wan bigfala stoa blong salem kakae, we maet hem i wok long mesin we oli ademap praes, no hem i klinim floa, no i lukaot long kaon blong stoa. Hem i no bos long samting we stoa ya i odarem mo salem, nating se sam long ol samting ya oli no stret, olsem tabak no sam samting long saed blong ol hiten lafet.a (Skelem wetem Luk 7:8; 17:​7, 8.) Poen ya i joengud wetem nekiswan poen.

3. ?Man ya i mas joen bigwan no smol nomo long fasin ya? Yumi tingting bakegen long eksampel blong stoa. Ating wan wokman we i wok long mesin blong karem mane no hem i fulumap ol self, samtaem bambae hem i mas handelem tabak no sam samting blong ol giaman skul. Be hemia wan smol haf nomo blong olgeta wok we hem i mas mekem. !Samting ya i defren olgeta long wan wokman long stoa ya we i wok long ples blong salem tabak! Olgeta wok blong hem, evridei, i joen long wan fasin we i agensem Kristin bilif. (2 Korin 7:1) From samting ya, yumi mas tingbaot sipos long wok blong yumi, yumi mas joen bigwan no smol nomo long wan wok olsem.

4. ?Hu bambae i pem yumi, mo bambae yumi wok weples? Tingbaot tu eksampel. Maet wan klinik we woman i go long hem blong kilim pikinini long bel, i wantem pem wan man blong klinim rod long eria blong hem, jes blong mekem ples i naes. Klinik ya i pem hem, be hem i no wok insaed long ples ya, mo i no gat man i luk hem long klinik ya long ful dei. Ol man oli luk nomo we hem i mekem wan wok blong pablik, wan wok we i no agensem Baebol, nomata hu i pem hem. Nao tingbaot eksampel ya we i narafala. Long wan kantri we loa i agri long wok ya blong woman blong rod, gavman i pem wan nes blong wok long haos blong woman blong rod, blong jekem helt blong olgeta blong traem daonem ol sik we oli kamaot from nogud fasin blong seks. Nating se gavman i pem nes ya, be wok blong hem i stap long ol haos ya blong woman blong rod nomo, blong mekem se nogud fasin blong olgeta i sef moa, nao man i save agri moa long hem. Tufala eksampel ya oli soemaot long yumi from wanem yumi mas tingbaot hu i pem yumi mo ples we yumi wok long hem.

5. ?Wok ya bambae i mekem we tingting blong yumi i stikim yumi, no bambae hem i mekem narafala i foldaon? Yumi mas tingbaot tingting blong yumi wan we i stap jajem yumi, mo tingting blong narafala tu. Nating sipos wan kaen wok i luk olsem se i oraet long bighaf blong ol Kristin, (mo ples blong hem tu, mo hu i givim pei, oli no tingbaot) be maet wan man i harem se wok olsem i stikim tingting blong hem wan. Aposol Pol, we i soem gudfala eksampel long yumi, i talem se: “Mifala i harem se i no gat wan samting nating we i mekem mifala i harem nogud, tingting blong mifala i klin gud nomo. Mo mifala i wantem tumas we oltaem mifala i stap mekem i stret nomo.” (Hibrus 13:18) Yumi no mas mekem wan wok we i mekem tingting blong yumi i trabol from; be long sem taem, yumi no mas tok agensem narafala we tingting blong olgeta i defren long yumi. Defren nao, maet wan Kristin i ting se Baebol i no agensem wan kaen wok we hem i mekem, be hem i luksave se plante long kongregesen mo long eria blong hem oli harem nogud from. Pol i soemaot stret tingting long ol tok blong hem: “Mifala i no wantem we sam man oli save faenem sam rabis poen long ol wok blong mifala. Nao mifala i stap traehad, blong mifala i no mekem sam fasin we narafala man bambae i save foldaon long hem. Long olgeta samting we mifala i mekem, mifala i stap soemaot we mifala i man blong wok blong God.”​—2 Korin 6:3, 4.

Naoia yumi gobak long stamba kwestin ya, blong mekem wan wok long wan joshaos, olsem wok blong putum niufala windo, klinim floa, no fiksimap ruf. ?Olsem wanem olgeta samting ya we yumi tokbaot oli joen long kwestin ya?

Tingting bakegen long bisnes ya se hu i bos. ?Kristin ya hem nao i bos long wok blong hem, mo i gat raet blong mekem disisen blong wok long joshaos ya, no nogat? Ating wan Kristin we i bos, bambae hem i no wantem joen wetem Bigfala Babilon, mo i no wantem mekem kontrak blong wok we i save givhan long wan jos blong leftemap giaman wosip blong hem. Maet desisin ya i klosap sem mak long man we i wantem salem tabak no aedol long stoa blong hem.​—2 Korin 6:​14-16.

Sipos Kristin ya i man blong wok nomo, mo hem i no gat raet blong jusum wanem wok we bambae hem i karem, i gud hem i tingbaot sam narafala samting, olsem ples blong wok ya, mo sipos hem i mas joen bigwan no smol nomo long fasin ya. Maet wok ya i jes blong man i go karem no putum sam niufala jea long wan jos wan taem nomo, no hem i blong givhan long olgeta man, olsem man blong faea we i kam blong putumaot wan faea long joshaos bifo we faea ya i kam bigwan. Long tingting blong plante man, ol wok olsem oli defren long wan wokman no wan bisnes we i spenem plante taem blong pentem joshaos no blong stap wokem garen blong Jos. Wok ya we man i mas mekem oltaem, no blong plante aoa, i save mekem se fulap man oli ting nogud long Kristin ya, from we hem i wok long wan jos we hem i no agri long hem, mo samting ya bambae i save mekem narafala i foldaon.​—Matiu 13:41; 18:​6, 7.

Yumi tokbaot finis plante impoten samting long saed blong wok. Ol poen ya we yumi tokbaot, oli blong ansarem kwestin ya long saed blong giaman skul. Be yumi save yusum ol poen ya tu, long saed blong ol narafala kaen wok. Evri taem we wan kwestin i kamaot long saed blong wan wok, yumi mas prea mo skelemgud olgeta poen ya, mo tingbaot olsem wanem wok ya i defren long eksampel ya we mifala i givim antap​—mo ating hem i defren olgeta. Olgeta samting we yumi tokbaot antap, oli halpem plante trufala Kristin finis blong mekem ol disisen we i soemaot se oli wantem wokbaot stret long fored blong Jeova.​—Ol Proveb 3:​5, 6; Aesea 2:3; Hibrus 12:12-​14.

[Futnot]