Yumi Talemaot Trutok
1 Jisas i talem klia se hem i kam long wol blong talemaot ol tok blong leftemap trutok. Hem wan i talem se: “Mi mi bon, mi kam long wol ya blong wan samting nomo, blong mi talemaot ol tok blong leftemap trutok.”—Jon 18:37.
2 Jisas i givim bigfala ona long nem blong Jeova from we hem i wok strong long wok blong prij. Hem i laekem tumas ol man, taswe taem hem i luk se oli slak olgeta long saed blong speret, hem i sore long olgeta. Matyu i tokbaot wok we Jisas i stap mekem nao hem i talem se: “Nao Jisas i stap wokbaot, i stap pas long ol taon mo velej, mo i stap tij insaed long ol haos blong prea blong olgeta . . . Mo taem hem i luk plante man we oli stap, hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we oli no gat man blong lukaot long olgeta.” (Matyu 9:35, 36) Sem mak long Jisas, yumi tu i mas fasgud long Jeova mo yumi mas laekem ol narafala man. Samting ya i mas pusum yumi blong prij moa.
Impoten Wok We Yumi Kasem
3 Yumi evriwan i laekem Jeova mo ol man, taswe yumi mas traehad blong yusum evri rod blong mekem ol man oli save Jeova mo ol nambawan wok blong hem. (Sam 96:2, 3; 145:10-13) Be i gat sam samting oli save spolem gudfala tingting we yumi gat long saed blong wok blong prij: Tede, yumi kasem plante smolsmol trabol we oli kamaot oltaem long las menet, yumi gat plante wari blong laef, i gat moa pleplei we oli stap kamaot, ale olgeta samting ya oli save mekem se man i no moa tingbaot tumas wok blong prij. Be yumi no mas foget se wok blong talemaot gud nyus long saed blong God mo Kingdom blong hem i impoten tumas tede. Yumi mas tinghae long wok ya we God i givim long yumi from we long wei ya nao God bambae i sevem olgeta man blong hem. (Matyu 24:14; 28:19, 20) Wok ya i save protektem yumi mo i save givhan bigwan long olgeta we oli mas harem mesej ya blong trutok.—1 Korin 15:58.
4 ?Olsem wanem long yu, yu ting se yu gat rod blong mekem wok blong haftaem no fultaem paenia? ?From wanem yu no tekem taem blong tingtinggud long kwestin ya? ?Wanem samting yu save mekem blong sapotem ol wok blong Kingdom? ?Yu yu ritae finis? ?From wanem yu yu no spenem moa taem long wok blong prij? Fulap yangfala we oli go long skul yet oli joen oltaem long wok blong haftaem paenia. Oli talem se samting ya i gud long saed blong speret mo long saed blong bodi. Oli talem tu se wok ya i mekem olgeta i glad tumas.
5 Sipos yumi wantem gat gudhan blong talemaot trutok, yumi mas skelemgud taem blong yumi. (Efesas 5:15, 16) Sipos yu agri blong mekem wok blong haftaem paenia, hemia i min se evri dei yu yu mas prij 2 haoa gogo en blong manis. Sam brata sista oli tekem disisin blong girap long eli moning mo oli go prij bifo we oli go long skul no long wok. Fulap kongregesen oli givhan long ol paenia from we oli ogenaesem sam miting blong prij long naet. Ating bambae yufala i kasem sam tok we oli leftemap tingting blong yufala no maet yufala i save storeyan wetem sam narafala Kristin we oli mekem wok blong haftaem paenia. Yufala i save mekem olsem blong save se oli yusum taem blong olgeta olsem wanem.
6 Bifo kam kasem tede, Jeova i soemaot gladhat blong hem long olgeta man blong hem. Olgeta we oli wok strong blong leftemap nem blong Jeova oli kasem plante blesing from. Bambae Jeova i gohed nomo blong soemaot fasin kaengud long olgeta we oli laekem hem tru. Nomata hamas taem yumi spenem long wok blong prij be sipos yumi rili traehad blong mekem ol samting we hem i askem long yumi, Jeova i glad nomo from.—Hibrus 6:10.