Mekem Moa Tiokratik Wok Long Taem We i Hot
1 Wan tok i se, fyuja i blong ol man we oli rere from. Yumi mas plan fastaem sipos yumi wantem yusum taem blong yumi blong kasem sam mak. Long manis Desemba, yumi kam long wan hot taem mo ol pikinini oli stap wetem yumi long haos, yumi gat moa taem blong mekem ol wok blong yumi wanwan. ?Wanem plan yumi save mekem naoia, blong yusum gud taem blong yumi blong mekem moa tiokratik wok?
2 Plante man we oli intres oli kam long Memoriol long Maj 30. Oli save gru moa long saed blong speret sipos yumi givhan long olgeta. Yumi gat wan gudfala distrik asembli. Yumi save yusum plante samting long saed blong speret we yumi kasem long asembli mo givhan long ol famle blong yumi blong oli lanem sam samting from.
3 Yumi yusum ol nyufala buk we yumi kasem, taswe yumi save prij long ol man we yumi stap mitim olgeta mo mekem moa long wok blong prij.
4 Ol yangfala oli spel long hot taem ya. I tru we sam oli yusum spel blong olgeta long ol pleplei we oli stap harem gud from. ?Be olsem wanem, yumi save yusum sam fri taem blong yumi blong mekem moa long wok blong prij, mekem haftaem paenia? Ol papa mama oli save stat naoia blong givhan long ol pikinini blong olgeta blong oli mekem ol plan. Maet ol pikinini blong ol defren famle oli save mekem plan tugeta blong oli stap prij wanples. Maet sam we oli no save mekem olsem oli save traehad moa long wok ya, long ol dei blong wik.
5 Plante man bambae oli tekem sam dei blong spel long taem ya. Oli mekem ol plan blong visitim ol memba blong famle we oli stap long narafala aelan. Yumi save go wetem paenia blong kongregesen. Taem yumi wok tugeta wetem ol paenia samting ya i save leftemap tingting blong yumi wanwan. Maet yu save go long wan ples we yumi no stap prij long hem plante taem, hemia i wan jans blong save toktok wetem ol man we oli no stap harem mesej blong Kingdom plante taem.
6 Plante yangfala naoia oli finisim skul blong olgeta no bambae i no longtaem oli finisim skul blong olgeta. From samting ya oli wari long fyuja blong olgeta. Ol yangfala we oli mekem plan we i laenap wetem ol tiokratik mak bambae oli kasem blesing from. (1 Jon 2:15-17) Disisin blong mekem wok blong fultaem paenia bambae i save mekem olgeta oli harem gud long laef blong olgeta mo oli save kasem plante gudfala samting.
7 Plante long yumi bambae oli gat moa taem. I gud yumi waes, blong ‘yusum evri jans we yumi kasem blong wokem i gud.’ (Ef. 5:15, 16) Ol plan we oli mekem yumi bisi long wok blong Jeova bambae oli givim ol blesing we i no save finis long yumi wanwan mo ol narafala man tu.—1 Tim. 4:15, 16.