Ol Fastok Oli Save Mekem Wan Jenis
1 ?Yu bin yusum sam fastok we oli stap long buk Reasoning no ol fastok we oli stap long Kingdom Wok Blong Yumi? Plante pablisa oli talem se oli karem gudfala frut long ol haos wanwan taem oli yusum ol fastok ya. Sam narafala pablisa oli faenemaot se taem oli tekem taem blong mekemrere wok blong prij, oli save talem ol fastok long prapa tok blong olgeta be oli stap tingbaot ol advaes we oli stap long buk no Kingdom Wok Blong Yumi.
2 Wan samting we i gud se sipos yu stap tingbaot ol fastok blong yu bifo we yu talemaot mesej blong Kingdom long wan man, bambae yu fanem i isi mo yu no fraet blong toktok long man. Ol tok blong yu bambae oli soemaot se yu rili wantem talemaot gud nyus. Taem yu reregud, bambae yu save glad long minista wok blong yu from we yu save karem ol gudfala frut from. Wan impoten samting se yumi mas traehad blong mekem wok olsem we yumi naf blong mekem.—Hib. 13:15; 1 Pita 2:5.
3 Taswe tekem taem blong mekemrere fastok. Tingbaot ol defren kaen man long teritori we yu save toktok wetem olgeta. ?Wanem trabol blong olgeta mo wanem samting oli stap wari from? ?Wanem samting we oli stap hapen tede oli tajem laef blong olgeta? Afta we yu luksave ansa long ol kwestin ya, jekem ol fastok we oli stap long buk Reasoning pej 9-15 no yu jusum wan no tu fastok we oli stap long Kingdom Wok Blong Yumi. Yu save jenisim ol tok blong i isi long yu blong talem long prapa toktok blong yu. Nekis samting blong mekem maet yu save askem narafala pablisa i stap wetem yu taem yu tren long ol fastok blong yu. Maet samting ya bambae i leftemap tingting blong ol narafala pablisa blong oli mekem ol fastok blong olgeta tu i kamgud moa. Long rod ya, bambae yu leftemap tingting blong ol narafala mo yufala i save givgivhan long yufala long gudfala wok ya.
4 Haoa mo fasin traehad we yu spenem blong mekemrere long wok blong prij bambae yu save kasem pei from. Bambae yu kasem blesing taem yu karem frut long nambawan wok ya blong hivimap ol man naoia.