Fasin Blong Reregud Fastaem i Karem Glad
1 Fasin blong joen long wok blong prij i mekem yumi glad tumas. (Sam 89:15, 16) Be, i tru se, blong kasem glad ya fulwan, yumi mas reregud fastaem. Moa yumi reregud, moa yumi gat wok, mo moa yumi glad.
2 Yusum Ol Tul We Yumi Gat: Taem yumi rere, fastaem yumi mas ridim mo tingting gud long olgeta haf blong Kingdom Wok Blong Yumi. Long ol Kingdom Wok ya yumi save faenem sam gudfala fastok we bambae oli halpem yumi blong talemaot mesej blong Kingdom long fasin we i isi mo i klia. Bambae yumi faenem sam rod blong ansa long ol tok we man i talem blong blokem yumi. Kingdom Wok i givim sam advaes olsem wanem blong mekem visit blong statem Baebol stadi. Yumi save jenisim ol fastok ya blong mekem i isi moa blong talem long prapa tok blong yumi. Antap long hemia, i gat Reasoning buk we i givim plante defren fastok mo i halpem yumi blong faenem rod blong ansa long ol tok we man i talem blong blokem yumi. Long rod ya, buk ya i halpem yumi blong kamgud moa long wok blong prij, nating se i no isi samtaem.
3 Lukluk bakegen ol haf blong magasin no buk we yu wantem serem, mo jusum wan no tu poen we i save pulum intres blong man blong haos. Maet yu harem no yu ridim sam nius we oli pulum tingting blong man, ale yu save yusum ol defren nius ya blong statem wan storeyan. Tingbaot sam tok we maet ol man oli save talem blong blokem yu, mo traem faenem sam tingting we oli save halpem yu blong ansa long olgeta. Biaen, tekem smol taem blong trenem yu long wanem we bambae yu talem long man blong haos.
4 Go Long Olgeta Miting Blong Kingdom Wok: Long ol miting blong Kingdom Wok yumi mas lesingud taem ol brata oli tokbaot ol advaes no taem oli talem bakegen sam impoten poen, mo taem i gat ol pleplei. Makemgud ol tingting we maet yu save yusum long ol fastok blong yu. Tingtingbak long sam samting we oli bin hapen plante taem long wok blong prij, mo tingbaot sam rod we yu save yusum blong prij long wan fasin we i moa gud. Tokbaot ol samting ya wetem ol narafala pablisa, bifo mo afta long ol miting.
5 Yu save sua se, sipos yu “rere blong mekem wanem gudfala wok we i stap,” bambae yu kasem blesing mo yu glad tumas blong halpem ol man blong faenem rod blong laef.—2 Tim. 2:21.