Reregud—Rod Blong Karem Frut
1 Fasin blong reregud blong go prij i givhan blong winim fasin fraet long wok blong prij. Taem yu go long haos blong ol man, bambae yu save wanem samting yu wantem talem long olgeta. Yu no nid blong fraet blong ansa long ol tok blong olgeta. Taem yu kambak long haos blong yu, yu haremgud long tingting blong yu, from yu save se yu bin traehad long wok blong prij. Yes, fasin blong reregud i rod blong kamgud moa long wok blong prij mo tij.
2 Pol i makem fasin ya blong reregud, taem hem i talem long yumi blong ‘holem fasin ya blong rere blong talemaot gud nyus blong pis, we i olsem but blong wokbaot.’ (Efes. 6:15) Samting ya i minim se yumi mas mekem tingting mo hat blong yumi i rere, yumi mas gat strong tingting mo glad blong wok. Taem yumi reregud blong serem trutok wetem ol narafala, wok blong yumi long Kingdom bambae i karem frut, mo bambae yumi hapi from.—Wok 20:35.
3 Olsem Wanem Blong Reregud Blong Prij: Yumi mas jusum wan rod blong storeyan we yumi haremgud blong yusum, maet wan we i kamaot long Reasoning buk no wan long las pej blong Kingdom Wok Blong Yumi. Tingtinggud long vas we yu plan blong yusum, mo jusumgud ol tok we bambae yu yusum blong makem stampa poen. Yu no nidim blong lanem ol tok baehat. I moagud blong gat wan stampa poen long tingting blong yu, ale talemaot long ol prapa tok blong yu, mo long wan fasin we yu ting se bambae i pulum man blong haos blong lesin.
4 Lukluk buk we yu wantem seremaot, mo jusum sam gudfala poen blong tokbaot. Jusum ol poen we yu ting se ol man long ples blong yu oli save intres long olgeta. Tingbaot olsem wanem yu save jenisim storeyan blong yu blong toktok wetem evriwan—man, woman, olfala, mo yangfala.
5 ?Yu yu traem finis blong mekem pleplei long haos blong lanem sam rod blong storeyan? Joen wetem sam narafala long famle no sam narafala pablisa, blong tokbaot rod blong storeyan we maet i wokgud. Nao mekem pleplei tugeta, blong olgeta evriwan oli savegud ol rod ya blong storeyan. Traem blong mekem ol pleplei we oli sem mak long ol samting we oli rili kamaot long wok blong prij, wetem sem tok we ol man long teritori oli stap talem blong traem blokem tok blong yumi. Ol pleplei olsem bambae oli mekem se yu save toktok moa gud, yu karem moa frut long wok blong prij, mo yu no fraet blong toktok.
6 Antap long fasin blong reregud mo mekem pleplei long haos, yu mas askem se: ‘?Ol klos we bambae mi werem, oli stret long wok blong prij? ?Mi mi gat evri samting we mi nidim long basket blong mi, olsem ol buk we mi wantem seremaot? ?Basket mo ol buk ya oli klin mo gud? ?Mi mi gat Reasoning buk, ol traket, ol pepa blong prij, mo wan pensel?’ Sipos yu tingtinggud fastaem, wok blong prij we yu mekem long dei ya bambae i karem moa frut.
7 Afta we yumi reregud, yumi mas prea long Jeova blong askem speret blong hem, blong givhan long yumi blong karem frut long wok blong prij. (1 Jon 5:14, 15) Sipos yumi mekem sua se yumi reregud, bambae yumi kasem moa glad, taem yumi gohed blong ‘finisim olgeta wok we God i givim long yumi blong mekem.’—2 Tim. 4:5.