Wan Gudfala Rod Blong Mekemrere Wok Blong Prij
1 ?Samtaem yu harem se yu no save gud wanem blong talem taem yu mekem wok blong prij? Sipos yu harem olsem, mifala i save se bambae yu glad long rod ya we Kingdom Wok Blong Yumi i tokbaot.
2 Stat long manis ya, Kingdom Wok Blong Yumi bambae i tokbaot plante defren kaen rod blong givhan long yumi blong talemaot mesej blong Kingdom, maet taem yumi stap go long ol haos wanwan no taem yumi stap mekem visit no taem yumi stap mekem Baebol stadi wetem man. Bambae i wokem tingting blong yu blong tingbaot ol tok we yu wantem yusum long wok blong prij. Taem yu mekemrere long minista wok blong prij, jusum ol tok we oli stret long teritori blong yu. Nekis samting, luk sipos yu save yusum ol tok ya olsem we oli stap long haf ya no yu save jenisim ol tok ya blong i stret long prapa fasin blong toktok blong yu. Bambae tok blong yu i olsem wan gudfala storeyan sipos yu yusum ol prapa wod blong yu. ?Yu yu wantem kamgud moa long sam haf long minista wok blong yu, maet wan haf we yu no mekem bifo? Ol tok we oli stap long Kingdom Wok maet oli samting we yu yu nidim blong yu statem wok ya.
3 Sipos yu stap lukaot ol miting blong prij, yu mas save gud ol haf ya we i stap long Kingdom Wok Blong Yumi. Yu mas stadi gud long hem, mo pulum tingting long ol advaes insaed we oli stret long ples blong yu.
4 Yumi evriwan i glad long ol samting we yumi wok gud long hem. Mifala i hop se ol gudfala rod ya we yumi tokbaot bambae oli givhan long olgeta we oli nyuwan mo olgeta we oli gat ekspiryens finis, blong oli save kamgud moa mo glad long wok blong talemaot Kingdom.