Wok Blong Paenia—Wan Rod Blong Soem Lav
1 Sipos yumi joen moa long wok blong prij, hem i from lav blong yumi long Jeova mo long ol narafala man. Sloslou taem lav blong yumi long Jeova mo long ol narafala man i stap gru moa, yumi wantem stretem olgeta samting long laef blong yumi blong yumi save prij moa. Lav blong yumi i stap kam bigwan taem yumi “kam waes moa” long Tok blong God. (Fil. 1:9, 10) Moa yumi lanem long saed long wil blong Jeova, moa yumi luksave impoten taem we yumi stap long hem naoia. Samting ya i mekem intres blong yumi long ol narafala man i kam bigwan moa. Plante oli soemaot intres ya we i fulap long fasin lav taem oli joen long wok blong paenia.
2 ?Olsem wanem, yumi wantem stretem olgeta samting long laef blong yumi blong bambae yumi save kam haftaem no fultaem paenia? I tru tumas, evriwan long yumi i no gat jans blong kam paenia. Be yumi evriwan yumi save luklukgud long laef blong yumi long prea.
3 Sam Kristin nomo oli gat plante fri taem blong mekem paenia. I min se oli mas ‘yusum evri jans we oli kasem’ oli save mekem olsem taem oli lego sam wok we oli kakae plante taem blong olgeta. (Efes. 5:15-17) From lav blong yumi long God mo long ol narafala man, yumi mas rere blong livim sam samting we yumi laekem mo sam samting we yumi gat, blong soemaot lav ya moa. (Mak 12:33) Sam long ol gudfala samting we yumi gat, mo we long tingting blong yumi, yumi ting se i oraet nomo blong gat, long sam kantri ol man oli luk samting ya olsem oli flas tumas.
4 ?Ol papa mama oli save mekem wanem blong givhan long ol yangfala blong olgeta blong oli gat semkaen tingting olsem God? Ol papa mama oli save tokbaot sam tiokratik mak long ol pikinini blong olgeta taem oli yangfala yet. Taem bambae oli finis skul, ?oli gat mak blong kasem ol samting long saed blong wol no ol samting long saed blong speret? Yumi wantem givhan long ol yangfala blong yumi blong oli save haremgud long ol blesing we oli save kasem sipos oli mekem wok blong paenia taem oli yangfala nomo. Long fasin ya oli stap hivimap ol gudgudfala samting blong olgeta long heven. (Mat. 6:19-21) Jus ya i mekem God i haremgud mo i pruvum fasin blong yumi blong stap holemstrong long hem oltaem. Antap moa, wok ya i stap sevem laef blong ol narafala man.
5 God i wantem “sevem olgeta man.” (1 Tim. 2:4) ?Olsem wanem yumi save soemaot se yumi tu yumi wantem mekem olsem? Yumi save soemaot samting ya taem yumi putum olgeta samting long saed blong Kingdom long fas ples long laef blong yumi. Yumi save soemaot tu taem yumi trastem se Jeova bambae i save givim olgeta samting we yumi nidim long laef. (Mat. 6:21-33) Ekonomi bambae i save foldaon, be Jeova bambae i no save jenisim nating promes blong hem blong lukaot long yumi.—Sam 37:25.
6 Yumi stap soemaot lav blong yumi taem yumi joen bigwan long wok blong prij. Long samfala, samting ya i minim kam fultaem paenia. ?Yu wantem statem wok ya long Septemba 1, 1992?