?Yu Yu Stap Holem Jans Blong Prij?
1 Long program blong yumi evri dei, yumi putum sam stret taem we yumi stap yusum blong tokbaot Jeova. Yumi putum ol taem we yumi save prij long ol haos wanwan, mekem ol visit bakegen mo ol Baebol stadi. Be i gat sam narafala taem tu we yumi no mekemrere long hem we yumi save yusum blong talemaot trutok. Yumi kolem fasin ya se holem jans blong prij.
2 Sam pablisa oli faenem plante jans blong joen long kaen fasin ya blong prij. Yumi tu bambae yumi save traehad blong holem olgeta jans we bambae yumi kasem long olgeta manis we oli stap kam.
3 Yumi Mekemrere Fastaem: Bambae yumi gat gudhan long wok blong holem jans blong prij sipos yumi mekemrere fastaem. Blong mekem olsem yumi gat plante buk mo magasin blong givhan long yumi. Antap long ol Wajtaoa mo Wekap! we yumi gat finis, yumi gat ol traket tu we ol stampa tok blong olgeta oli save pulum intres blong man. I gat ol buklet tu we oli stret long olgeta defren man we oli gat defren skul. Yumi gat sam smol buk tu we oli tokbaot ol samting we oli stap hapen long taem blong yumi. ?Yu yu laekem blong yusum wanem buk? Tokbaot samting ya wetem famle blong yu. Talem bakegen ol poen we yufala i save yusum taem bambae yufala i tekem jans blong prij.
4 Ol visit we yumi stap mekem long ol famle mo ol fren blong yumi oli sam stret taem we yumi save holem jans blong prij long hem. ?Olsem wanem, yu yu stap tingting blong visitim famle blong yu? Sipos i olsem, karem wan Baebol no wan long olgeta buk we yumi tokbaot antap wetem yu. Sipos yu stap ron long bas, fasin blong yu blong ridim wan long ol buk ya i save statem wan gudfala storeyan. Sipos yu stap ron long trak, tingbaot samting we yu save talem taem bambae yufala i stop long rod. Yu save tingbaot blong holem sam traket wetem yu blong livim long ol man we oli intres. Sipos yu stap sidaon long wan naesfala sanbij no wan ples blong spel we yu save lukluk ol naesfala hil mo ol naesfala tri, yu save statem storeyan mo askem long man se: “?Bambae i naes tumas sipos olgeta ples long wol oli kam olsem ples ya we yumitu stap luk a?” Yu save yusum fastok we i lelebet sem mak long hemia.
5 Long Taem Blong Distrik Asembli: Yumi save faenem sam taem blong holem ol jans blong prij tu long distrik asembli blong yumi long manis Ogis. Plante oli kasem frut taem oli storeyan wetem ol man we oli save olgeta bifo, taem oli visitim olgeta fren no memba blong famle blong olgeta. I gud blong gat wan baj long taem blong asembli. Sipos yu go long wan stoa, ating wan man bambae i save askem long yu wanem mining blong baj ya. Hemia nao wan stret taem we yu save holem jans blong prij long hem.
6 Yumi neva mas ting nating long ol taem we yumi kasem blong holem jans blong prij. Fasin ya blong prij i karem plante frut, mo olgeta man blong Jeova oli mas joen long hem. !Olsem Jisas, lav we yumi gat long ol narafala i mas pusum yumi blong talemaot gud nyus long olgeta taem yumi gat jans blong mekem!—Mat. 5:14-16.