?Yumi Save Mekem Intres Blong Man We i Kolkol Finis i Kam Antap Bakegen?
1 “Olgeta we oli luksave se oli nidim ol samting long saed blong speret, oli save harem gud, from we kingdom blong heven i blong olgeta.” (Mat. 5:3, NW) Ol tok ya we Jisas i talem antap long Hil oli gat fulap mining long olgeta. Smol man nomo oli luksave se oli nidim ol samting long saed blong speret blong mekem laef blong olgeta i glad mo gat mining long hem. I gat sam we fastaem oli bin luksave se oli nidim ol samting long saed blong speret, be afta oli lusum tingting ya. Sam samting i mekem intres blong olgeta i kam kolkol long ol samting long saed blong speret. Oli tanem baksaed long wanem we i save mekem olgeta oli haremgud. ?Kwestin i stap se, ?Yumi save mekem intres blong ol man olsem i kam antap bakegen? Yumi glad, from tingting blong sam i save kam olsem.
2 Ating yu save wan man we i stadi Baebol wetem ol Wetnes blong Jeova sam yia i pas finis, ating taem hem i pikinini yet, be hem i no gohed blong kampani wetem ol man blong God. Sam tijing blong Baebol mo sam stret rul blong hem, maet oli stap long tingting blong hem yet, mo hem i tingbaot olgeta yet. From we fasin blong wol i stap go nogud moa mo fasin blong laef i stap jenis, ol samting we hem i lanem bifo oli stap kambak long tingting blong hem mo man ya i save kambak long God mo reregud blong kasem moa save long Baebol. Sipos yumi go luk ol man olsem wetem tingting blong statem Baebol stadi wetem olgeta bakegen, samting ya i save karem frut.
3 Yumi mas traehad tu blong visitim bakegen plante taem ol man we oli bin kam long lafet blong Memoriol. Mekem olgeta i save se yumi rili tingbaot laef blong olgeta long saed blong speret mo yumi wantem stadi Baebol wetem olgeta. Yumi save wok strong moa tu blong halpem ol man we oli kam long Distrik Asembli “Ol Man Blong Karem Laet” we i jes pas. Samtaem i gud blong wan narafala pablisa i save go luk wan man we wan pablisa i stopem stadi blong hem from we hem i no stap gohedgud.
4 I tru, ol man we yumi stap stadi wetem olgeta oli mas tinghevi long wosip blong olgeta long Jeova mo oli mas soemaot se oli traehad long Baebol stadi blong olgeta. Be long saed blong yumi, yumi wantem mekem sua se yumi wok strong inaf blong halpem olgeta mo we yumi save tingbaot ol narafala olsem aposol Pol taem hem i talem se, “Mi mi klin long blad blong olgeta man.”—Wok 20:26, NW.