Presem God We i Wokem Olgeta Samting
1 Naesfala hil wetem ol tri, naesfala kala blong san we i godaon, naet we i gat fulap sta, singsing blong ol pijin—?yu save talem tangkyu long hu from ol gudfala samting ya? Yes, yumi save presem God ya we i wokem olgeta samting. Yumi agri wetem hat blong yumi fulwan long tok blong Revelesen 4:11. From we Jeova i wokem olgeta samting, i stret nomo blong Jeova i kasem ol tok blong yumi blong presem hem.
2 Nating se i gat plante pruf blong soemaot se God i wokem olgeta samting, be ol man oli sapotem tingting ya se laef i kamaot long akseden nomo no tru long evolusen we man i no gat pruf long hem nating. Bigfala gyaman ya i daonem ol man mo i brekemdaon ol gudfala fasin blong olgeta, mo i wan nogud tok we i agensem Bigfala Man ya we i Wokem yumi.—Ekles. 12:1; Rom 1:20, 25.
3 Olsem ol man blong wok blong Jeova we yumi holemstrong long hem, long Septemba, yumi gat jans blong talemaot trutok long saed blong Hemia we i Wokem yumi mo ol gudfala wok blong hem. Bambae yumi seremaot buk ya Life—How Did It Get Here? By Evolution or by Creation? long ol man we oli soem trufala intres blong lanem ol samting we oli soemaot olsem wanem laef i stat mo wanem mining blong hem. Buk ya i mekem yumi naf blong pruvum trutok long saed blong olsem wanem laef i stat.
4 Ol Spesel Teritori: Antap long wok blong prij long ol haos wanwan, yumi save traehad moa blong toktok long ol man we oli gat sam spesel intres long saed long poen ya se ol samting oli kamaot from laki nomo no God i wokem, maet yumi save luk olgeta long ples blong wok blong olgeta no long skul. Eksampel, ol yangfala Wetnes oli karem frut taem oli toktok wetem ol tija blong olgeta mo givim Creation buk long ol tija ya. Wan yangfala Wetnes i givim wan Creation buk long tija blong hem mo hem i sapraes blong luk se tija blong hem i no stadi fulwan nomo long buk ya be hem i stat yusum tu blong tijim olgeta long klasrum. (w90 Engglis mo Franis 9/1 pej 32; w86 Engglis mo Franis 10/1 pej 32) From wanem yu no toktok long wanwan tija blong yu mo ol fren blong yu we oli stap long sem klas wetem yu we yu ting se oli save harem glad taem oli ridim gudfala buk ya.
5 Wok strong moa blong kasem ol studen we oli go long ol haeskul mo ol tija we oli stap long teritori blong yufala. Plante man we oli stap wok olsem ol loea mo ol dokta oli soemaot finis se oli glad long ol dip save we oli ridim long Creation buk. (yb87 pej 54) Olgeta man we yufala i toktok wetem olgeta maet oli glad blong gat wan naesfala buk olsem blong yusum taem oli wantem jekemap sam poen long saed blong ‘evolution’ no ‘creation’.
6 Sipos yumi waes bambae yumi soem buk ya Creation long evriwan we yumi faenem olgeta from we plante man oli wantem lanem moa long saed blong stampa blong laef.
7 Gudfala buk ya bambae i no halpem ol man blong luksave nomo olsem wanem tijing blong evolusen i krangke, be tu blong halpem olgeta blong gat fasin tangkyu long presen ya laef. Buk ya bambae i wokem tingting long olgeta blong wantem laef foreva, mo samting ya bambae i givim ona long Hemia we i givim laef, Hemia we i “mekem skae mo graon.”—Sam 146:6.