Visitim Ol Man We Oli Intres Wetem Fasin Luksave Long Taem Blong Holidei
1 Desemba i wan manis we plante man we oli soem intres long mesej blong yumi bambae oli bisi long ol wok blong holidei. Taswe, taem yumi visitim bakegen ol man we oli intres, yumi nidim blong gat fasin luksave mo rere blong go stret long poen kwiktaem, be sipos man blong haos i soem se hem i wantem storeyan moa, ale yumi save mekem olsem.
2 Tingrere Long Wanem Bambae Yumi Talem: Oltaem tingting blong yumi i mas klia long wanem yumi wantem talem. Hemia i minim se, yumi mas luk bakegen ol not blong yumi long las visit mo tingbaot bakegen ol poen we yumi storeyan long olgeta mo eni kwestin we yumi livim wetem man blong haos.
3 Sipos yu bin yusum tingting long haf 5 blong haf antap, taem yu gobak yu save talem se:
◼ “Long manis olsem long yia, plante man oli stap tingbaot dei we Kraes i bon long hem. Lastaem we yumi bin storeyan tugeta, mi promes se bambae mi storeyan long yu long saed long taon we Jisas i bon long hem. ?Yu save se Baebol i talem 700 yia bifo se Jisas bambae i bon long Betlehem?” Letem taem blong hem i ansa. Nao, afta we yu ridim Maeka 5:2, yu save talem se: “Hemia wan nambawan profet tok, i tru no? From hemia wan tru store we Baebol i tokbaot, ?nao yu yu save se ol profet tok blong Baebol oli stap kamtru tu long taem blong yumi?” Sipos man i gat taem, yumi save gohed long storeyan, no sipos hem i bisi, yumi save askem blong kambak mo storeyan moa long samting ya wetem hem.
4 Sipos yumi bin livim traket ya ?Wol Ya Bambae i Lus No i Stap? yu save talem samting olsem:
◼ “Makemgud wanem oli raetem long ples ya long pej 3, aninit long stampa tok ya ‘Saen.’ Hemia i stap tokbaot ol profet tok we Jisas i talem se bambae oli makem taem blong las dei. [Tokbaot tu no tri profet tok wetem man blong haos.] ?Yu ting se i gat sam pruf we oli soem se ol profet tok ya oli kamtru long taem blong yumi?” Ating yu wantem pulum hem blong luk long buk Man We i Hae Moa. Soem olsem wanem japta 111 i go moa blong tokbaotgud ol samting long saed long saen we Jisas i givim. Sipos yu jes livim wan traket nomo, long nekis visit yu save pulum storeyan i go long wan narafala traket no wan buklet olsem Gavman Ya We Bambae i Mekem Paradaes no “Look! I Am Making All Things New.”
5 Askem Wan Baebol Stadi: Sipos yumi livim buk Man We i Hae Moa long man blong haos no sipos hem i gat wan kopi blong hem finis, i gud blong soem olsem wanem blong mekem wan Baebol stadi, yusum japta 111. Yumi save yusum wan fasin we i sem mak long Buk Stadi blong kongregesen. Sipos stadi i gohed, yumi save jenisim blong stadi long wan buklet no go stret long Laef Foreva buk.
6 Yumi mas rere oltaem blong visitim ol man we oli intres. Yumi mas gat fasin luksave mo yumi mas rere oltaem blong mekem rod i rere blong nekis visit taem yumi putum wan kwestin long en blong storeyan blong yumi. Samting ya bambae i halpem yumi blong “gat evri samting blong mekem ol gudfala wok we i stap.”—2 Tim. 3: 17.