?Yumi Stap Wekap We i No Gat Ol Narafala Samting Oli Pulum Yumi?
1 Jisas i givim wan woning i se: ‘Oltaem, yufala i mas stap wekap . . . blong bambae yufala i gat paoa blong ronwe’ long olgeta trabol we bambae oli sua blong kam. (Luk 21:36) Yumi stap laef long taem ya we i gat moa denja long hem i bitim ol narafala taem bifo. Bigfala trabol bambae i kasem olgeta we oli slip long saed blong speret. Hemia i mekem se yumi evriwan i fesem wan denja. Jisas i tokbaot kakae, dring, mo ol wari blong laef evri dei. ?From wanem? From we yumi save bisi tumas long ol samting ya, mo oli save pulum yumi tumas, mekem se yumi kasem wan denja we yumi no stap wekapgud long saed blong speret.
2 Ol Samting We Oli Save Pulum Yumi Tumas: Samfala oli bisi wetem tumas pleplei no pleplei we i no stret, mo samfala oli kam olsem slef blong televisin. I tru, taem yumi putum Kingdom long fasples, samting ya i no min se yumi no save spel mo pleplei nating. Taem yumi yusum fasin blong skelemgud mo no bitim mak, ol pleplei oli save givhan long yumi. (Ridim 1 Timote 4:8.) Be taem oli kam wan impoten haf blong laef blong yumi, oli save pulum yumi tumas, we oli tekem tumas taem mo mane, mo oli mekem se yumi no joen plante long wok blong talemaot Kingdom.
3 Wan narafala samting we i save pulum yumi tumas mo mekem yumi slip long saed blong speret, hemia fasin blong wantem plante tumas samting we yumi no nidim. Blong kasem ol samting ya, wan man i mas spenem moa taem long wok blong hem, mo hem i no moa gat taem blong mekem ol wok blong hem long saed blong speret. Samfala oli no moa traem kasem ol mak long saed blong speret, from we oli bisi tumas blong traehad blong kasem ol samting long saed blong bodi, blong gat wan laef we i moa isi mo gud. I tru se yumi nidim ‘kakae mo klos,’ be yumi mas lukaot se yumi no laekem mane tumas, from we fasin ya i save lidim yumi blong gowe long fasin blong bilif. (1 Tim. 6:8-10) Sipos yumi no putum ae blong yumi i stap strong long ol intres blong Kingdom nomo, yumi save kam slak blong lukaot long ol nid blong famle blong yumi long saed blong speret, mo maet yumi no save finisim olgeta wok we God i givim long yumi blong mekem.—1 Tim. 5:8; 2 Tim. 4:5.
4 Sam narafala oli letem ‘tingting blong olgeta i kam slak, from we oli stap tingting tumas long ol trabol blong laef,’ gogo oli slip long saed blong speret. (Luk 21:34) Samtaem, oli wari from we oli kasem wan sik no ol trabol long famle. Be yumi no mas letem ol prapa wari blong yumi oli mekem yumi slak blong tingbaot en blong rabis fasin blong wol ya we i stap kam kwik.—Mak 13:33.
5 I no gat samting we i save mekem Setan i moa glad bitim we hem i mekem yumi slip long saed blong speret, nao yumi ronem ol gyaman drim blong wol ya. Yumi mas faet blong stap wekap long saed blong speret. Yumi save se ‘Dei blong Jeova bambae i mekem ol man oli sek, olsem wan man blong stil.’ Taswe, i impoten tumas blong “yumi wekap, we hed blong yumi i klia gud.” (1 Tes. 5:2, 6) Sipos yumi luk ol saen we oli soem se yumi stap kam slak, kwiktaem nomo yumi mas “lego long ol fasin we oli blong tudak nomo.”—Rom 13:11-13.
6 Ol Samting Blong Givhan Long Yumi Blong Stap Wekap: ?Wanem ol samting ya blong halpem yumi? Prea i impoten. Yumi mas prea oltaem. (1 Tes. 5:17) Fasin blong joengud wetem Kristin kongregesen bambae i “mekem yumi strong blong laekem ol man, mo blong mekem ol gudfala fasin.” (Hib. 10:24) Oltaem yumi mas skelemgud yumi long trufala fasin. Samting ya i save halpem yumi blong luksave oltaem se yumi nidim blong winim ol slak fasin. (2 Kor. 13:5) From gudfala fasin blong stadi wanwan, bambae yumi ‘kam strong long ol tok blong fasin blong bilif, olsem we ol tok ya oli gudfala kakae blong yumi.’ (1 Tim. 4:6) Sipos yumi traehad, yumi save sua se bambae yumi winim ol samting we oli save pulum yumi tumas, mo bambae yumi ‘no slip, be yumi stanap strong long bilif.’—1 Kor. 16:13.