?Olsem Wanem Mi Save Pulum Ol Man Blong Lesin?
1 Long taon ya Filipae, ‘i gat wan woman i lesin, nem blong hem Lidia. Hem i gat stoa blong salem flas kaliko. Nao Jeova i openem tingting blong hem blong i bilif long tok blong Pol.’ (Wok 16:14) ?Store ya i tijim yumi long wanem samting? Hemia se, fasin blong lesin i openem rod blong man i kasem trutok. Frut we yumi kasem long wok blong talemaot Kingdom i dipen fastaem long man blong haos, se hem i rere blong lesin no no gat. Sipos hem i glad blong lesin, i no hadwok tumas blong talemaot mesej blong Kingdom. Be i hadwok blong pulum ol man blong lesin. ?Yumi save mekem wanem?
2 Bifo we yumi go long wok blong prij, yumi mas luklukgud long klos mo hea blong yumi, mo ol samting we yumi yusum long wok ya. ?From wanem? From we ol man bambae oli lesin moa long wan man we i klin mo i gat respek long hem wan. ?Ol klos blong yumi oli klin mo naes, be oli no flas tumas? Nating se ol man blong wol oli werem ol klos olbaot nomo, yumi no folem fasin ya, from we yumi ol minista blong talemaot Kingdom blong God. Lukluk blong yumi we i klin mo stret i save pulum ol man blong tinghae long mesej blong Kingdom we yumi stap talemaot.
3 Soem Fasin Fren Mo Respek: Nating se ol tingting blong wol naoia oli stap jenis oltaem, plante man oli tinghae long Baebol yet. Mo bambae oli glad blong lesin long man we i storeyan long saed blong Baebol, sipos i soem fasin fren mo respek. Wan smael we i soem trufala fasin fren i save mekem tingting blong man blong haos i kwaet, mo openem rod blong storeyan gud wetem hem. Yumi mas soem long ol toktok mo fasin blong yumi, se yumi bilif strong long samting we yumi stap tokbaot mo se yumi gat kaen mo gudfala fasin. Samting ya i min se bambae yumi lesin wetem respek long ol tingting blong man blong haos.
4 Plan blong yumi i blong serem hop blong Baebol wetem ol man. From samting ya, yumi mas sua se storeyan blong yumi i pulum man blong haos, i no mekem hem i kros mo agens. Yumi no nid blong westem taem wetem ol man we oli wantem rao nomo. (2 Tim. 2:23-25) Long ol Kingdom Wok Blong Yumi mo Reasoning buk, yumi save jusumaot plante defren rod blong storeyan we oli leftemap tingting mo oli stret long laef blong man. I tru, yumi mas reregud, blong yumi save toktok long fasin we i kaen mo i mekem man i luksave.—1 Pita 3:15.
5 Afta we yumi aot long haos blong ol man, bighaf blong olgeta oli no moa save rimemba ol tok we yumi bin talem. Be, kolosap oltaem oli save rimemba fasin blong yumi blong toktok. Yumi neva mas ting nating long fasin we i kaen mo gud. Hem i gat bigfala paoa. Tru ya, i gat plante man long ples blong yumi we oli olsem sipsip, we bambae oli lesin long trutok, olsem Lidia long faswan handred yia. Sipos yumi lukaotgud long klos mo hea blong yumi mo fasin blong yumi blong toktok, samting ya i save pulum ol man we hat blong olgeta i stret, blong oli lesin long Tok blong God mo blong oli wantem harem moa.—Mak 4:20.