!Yumi Neva Bin Haremgud Olsemia Long Saed Blong Speret!
1 Bighaf blong ol man oli wantem tumas se dei i kam we oli save talem se, “!Neva mifala i bin haremgud olsemia!” Long tingting blong olgeta, dei ya bambae i kam taem oli gat plante samting, nao oli save ‘spel, kakae, dring, mo gat hapi taem olwe nomo.’ (Luk 12:19) Ol samting oli defren long saed blong yumi, from we, yumi save talem se naoia nomo, yumi no sot long wan gudfala samting nating long saed blong speret. (Sam 34:10) ?From wanem i olsem?
2 Proveb 10:22 i talem se, “blesing blong Jeova, hemia nao samting we i mekem man i rij.” Yumi we yumi kasem blesing ya, yumi save talem tru se God i “stap givim plante samting tumas long yumi, blong yumi harem gud long olgeta.” (1 Tim. 6:17) !Samting ya i mekem se yumi rij moa bitim ol narafala man long wol!
3 Luksave Ol Blesing: Smol nomo blong yumi i gat plante samting. Be, yumi gat blesing, from we yumi no wari tumas long ol samting we yumi nidim evri dei. Jeova i save ol samting we yumi nidim, mo hem i promes blong givim ol samting ya long yumi. (Mat. 6:31-33) Promes blong hem i givim pis long tingting blong yumi, mo pis ya i sas tumas.
4 Be, ol blesing we yumi kasem long saed blong speret, oli bigwan moa yet. Laef blong yumi i dipen long ol kakae long saed blong speret we Jeova i stap givim. (Mat. 4:4) Olgeta we oli lukluk i go long wol blong kasem kakae long saed blong speret, oli hanggri, be yumi haremgud long plante kakae mo dring we yumi kasem. (Aes. 65:13) ‘Slef we i stret’ i mekem se yumi gat plante save oltaem, we i stap lidim yumi i go kasem laef blong olwe.—Mat. 24:45; Jon 17:3.
5 Bigfala kampani blong ol brata mo sista blong yumi raon long wol we oli gat lav, i mekem se yumi gat ol gudfala fren long olgeta ples blong wol. (Jon 13:35) Kongregesen blong yumi i wan ples blong pis, we i givim spel long tingting blong yumi, mo i mekem yumi haremgud. Ol elda oli stap lukaotgud long laef blong yumi, mo oli givhan long yumi blong winim ol defren kaen trabol. (Hib. 13:17) Taem yumi frengud wetem ol brata blong yumi, samting ya i leftemap tingting blong yumi evriwan, mo i givim paoa long yumi blong gohed oltaem.—Rom 1:11, 12.
6 Wok blong yumi tu i wan blesing. Plante man oli mekem ol wok we i no gat mining, mo oli save les long hem. Taem yumi seremaot gud nyus, yumi karem glad long ol narafala mo yumi haremgud tu. (Wok 20:35) Yumi rili save luk gudfala frut blong hadwok blong yumi.—Ekles. 2:24.
7 Samting we i gud tumas, se yumi gat wan nambawan hop blong fyuja. (Rom 12:12) !Yumi stap lukluk i go long nyufala wol ya we stret fasin bambae i stap long hem! !Long ples ya, bambae i gat pis mo glad blong olwe, mo bambae yumi stap olwe wetem olgeta we yumi laekem olgeta tumas! Hop ya i wan samting we i sas moa i bitim olgeta narafala samting.—1 Tim. 6:19.
8 ?Olsem Wanem Yumi Save Soem Tangkyu? Yumi no save pembak Jeova from ol samting we hem i mekem blong yumi. Yumi save soem tangkyu taem yumi (1) talem tangkyu long hem evri dei from kaengud fasin blong hem (Efes. 5:20), (2) soem lav blong yumi tru long fasin obei (1 Jon 5:3), (3) mekem nem blong hem i tabu tru long wok blong talemaot gud nyus (Sam 83:18), mo (4) sapotem Kristin kongregesen tru long fasin blong wokgud tugeta wetem fulhat blong yumi.—1 Tim. 3:15.
9 Yumi gat fulap risen blong stap olsem ol man we oli glad moa bitim ol narafala man long wol. (Sam 144:15b) Tingting, fasin, mo wok blong yumi i mas soemaot glad ya we yumi harem insaed long paradaes long saed blong speret—!yumi neva bin haremgud olsemia!