Traem Savegud Ol Brata Mo Sista Blong Yu
1 Baebol i talem se wan trufala fren, hemia wan man we i stap kolosap moa i bitim wan brata, hem i soem lav oltaem, i stap tru, mo i givhan long ol fren blong hem long taem blong trabol. (Prov. 17:17; 18:24) Bambae yumi gat plante fren olsem long kongregesen sipos yumi traehad blong savegud mo laekem ol narafala.—Jon 13:35.
2 Wan nambawan jans we yumi gat blong save moa ol Kristin brata blong yumi, hemia bifo mo afta long ol miting. Sipos yumi kam eli, mo yumi stap smoltaem afta long ol miting, bambae yumi haremgud long gudfala kampani blong ol narafala. Jusumaot ol defren brata mo sista blong storeyan wetem olgeta. Maet yu save jusum sam olfala we oli stap longtaem finis long trutok, mo sam yangfala no samfala we oli gat fasin blong sem.
3 Statem Storeyan: Yu mas talem moa i bitim wan smol halo long ol brata blong yu. Blong statem wan toktok, yu save storeyan long samting we i hapen long wok blong prij, long wan gudfala poen blong wan nyufala magasin, no yu save tokbaot miting we i jes finis. Yu save lanem plante samting long saed blong ol brata blong yu sipos yu lesin gud long olgeta, pulum olgeta blong talem sam samting we i hapen long laef blong olgeta mo ol samting we oli stap lanem. Samtaem, fasin blong askem nomo se olsem wanem wan brata i kasem save long Jeova, bambae i soemaot plante samting long yumi. Samfala oli pastru long sam hadtaem we oli mekem se bilif blong olgeta i kam strong moa, mo sam narafala oli stap fesem sam trabol naoia we oli strong tumas, i bitim samting we plante oli save tingbaot. Sipos yumi luksave ol samting ya, bambae yumi save kam ol trufala fren, we yumi harem save mo rere oltaem blong halpem narafala we i gat nid.—Skelem wetem 2 Korin 8:8.
4 Kam Fren Blong Ol Narafala: Afta we wan sista i lusum pikinini gel blong hem, hem i harem se i had blong sing ol singsing blong Kingdom we oli tokbaot laef bakegen long ded. Hem i rimemba se: “Wan taem, wan we i stap sidaon long narafala laen blong jea i luk se mi stap krae. Hem i kam kasem mi, hem i putum han blong hem i goraon long mi, mo hem i sing wetem mi gogo singsing i finis. Mi harem se lav blong mi long ol brata mo sista i kam fulap mo mi glad tumas we mifala i stap go long ol miting long Haos Kingdom. Mi luksave se hemia nao ples we yumi save kasem help.” Blong frengud wetem ol Kristin brata blong yumi, yumi mas soem sore wetem kaen fasin taem oli gat trabol, mo leftemap tingting blong olgeta oltaem.—Hib. 10:24, 25.
5 Naoia we olfala wol ya i gohed blong kam strong moa, yumi mas gat strong tingting blong savegud ol brata blong yumi moa. Trufala fasin ya blong leftemap tingting bambae i kam wan blesing long evriwan.—Rom 1:11, 12.