!Yumi Harem Samting Ya Finis!
1 !Yes i tru ya! Jeova i talem bakegen mo bakegen plante defren samting long Baebol blong halpem ol man blong hem. Plante taem Jisas i talem bakegen ol tijing blong hem long saed blong Kingdom. Oltaem ol aposol blong hem oli tokbaot ol save long saed blong spirit wetem olgeta we oli stanap strong finis long trutok.—Rom 15:15; 2 Pita 1:12, 13; 3:1, 2.
2 Long taem blong yumi, ogenaesesen blong Jeova i plan blong mekem se ol impoten poen oli kamaot bakegen mo bakegen long ol miting blong kongregesen. I gat sam buk we yumi stadi plante taem finis. !Yes, i impoten tumas blong harem bakegen ol samting we yumi harem finis!
3 I Nidim Blong Talem Samting Bakegen Mo Bakegen: Ol tok we Jeova i talem bakegen mo bakegen oli mekem save blong yumi i go dip moa, hem i mekem tingting blong yumi i luksave moa samting mo yumi strong moa blong stap long gudfala rod. (Sam 119:129) Taem yumi lukluk bakegen ol rul mo loa blong God i olsem we yumi stap lukluk fes blong yumi long wan glas. Samting ya i save halpem yumi blong luklukgud long yumi wan mo blokem fasin ya we man i stap “fogetem ol samting we loa ya i talem.”—Jem. 1:22-25.
4 Sipos trutok i no wan samting we yumi stap harem bakegen mo bakegen, bambae i gat sam narafala samting oli stat gat paoa long hat blong yumi. Ol tok we God i talem bakegen oli mekem yumi strong naf blong faet agensem ol nogud fasin blong wol blong Setan. (Sam 119:2, 3, 99, 133; Fil. 3:1) Ol tok we yumi kasem oltaem long saed blong ol stamba tingting blong God oli pulum yumi blong “lukaot gud.” (Mak 13:32-37) Fasin blong talem ol trutok blong Baebol bakegen mo bakegen, i givhan long yumi blong no lego rod ya we i blong go kasem laef we i no save finis.—Sam 119:144.
5 Olsem Wanem Yumi Wanwan i Save Karem Blesing From: Yumi mas ‘wantem moa blong obei long ol rul blong God.’ (Sam 119:36) Taem yumi save se bambae yumi harem semfala poen bakegen long wan miting blong kongregesen, yumi mas rere gud fastaem, jekemap ol vas blong Baebol we oli laenap wetem tok ya, mo tingbaot olsem wanem yumi save mekem advaes ya i wok long laef blong yumi. Yumi no mas mestem ol kwestin blong tingtingbak long Tiokratik Skul. Yumi no mas gat tingting ya se yumi no nidim blong mekem samting ya. (Luk 8:18) I nogud blong ting nating long ol tok we oli kamaot, from we yumi talem se yumi harem ol tijing ya plante taem finis long ol miting.—Hib. 5:11.
6 Yumi mas gat sem tingting wetem man blong raetem Sam taem hem i talem se: “Mi mi glad blong folem ol rul we yu yu mekem, i winim we mi mi glad from we mi rijman.” (Sam 119:14) Yes, yumi harem ol nambawan tok ya finis, mo ating bambae yumi harem olgeta bakegen. ?From wanem? !From we Jeova i save se yumi nidim blong harem ol tok ya!