Tiokratik Skul Blong Yia 2000
1 Tiokratik Skul i bin givim fulap blesing finis long ol man blong Jeova. Bitim 50 yia we i pas, skul ya i halpem plante milian man blong oli kam i naf blong toktok mo tijim gud long pablik ples, ol trutok blong Baebol. (Sam 145:10-12; Mat. 28:19, 20) ?Yu yu luksave, olsem wanem skul ya i halpem yu? Long yia 2000, skul ya bambae i gohed yet blong givhan long yu, sipos yu joen long hem fulwan mo yu folem ol advaes we i kamaot long hem.
2 Ol save long saed blong ol tok mo wanem buk we bambae yumi yusum, i stap long fas pej long program blong Tiokratik Skul blong yia 2000. Program ya i tokbaot taem we oli putum long ol defren tok, ol buk we oli stamba blong ol tok ya, mo sam narafala samting. Plis, tekem taem blong ridim gud ol save ya, mo folem ol advaes ya.
3 Baebol Riding Blong Wik: I gat tu defren program blong ridim Baebol long wik, we oli stap long program blong Skul. Wan hemia, blong ridim Baebol we yumi folem long skul. Program ya i kavremap faef pej blong Baebol. Ol poen blong Baebol riding oli kamaot long program ya. Narafala program blong riding i no blong Tiokratik skul, mo i kavremap ten pej blong Baebol. Sipos yu folem program ya, bambae yu naf blong ridim ful Baebol long tri yia. Be i tru se, samfala maet oli wantem ridim moa i bitim ol pej we oli stap long program ya. Mo ating sam narafala oli no naf blong ridim 10 pej long wik. Nating se i olsem wanem, yu mas glad long mak we yu save kasem, i bitim we yu skelem wok blong yu wetem ol narafala. (Gal. 6 :4) Samting we i moa impoten i blong ridim Tok blong God evri dei.—Sam 1 :1-3.
4 Sipos yu wantem joen long Tiokratik Skul, yu mas storeyan wetem brata we i lukaot long skul. Plis, i gud we yu tinghae long ol tok we yu kasem, mo no mestem blong mekem ol tok ya, sipos yu no gat stret risen blong mekem olsem. Yu mas luksave se skul ya, i wan presen we i kam from Jeova. Yu mas reregud, yu mas save gud ol tok we yu kasem. Toktok wetem ful hat. Sipos yu mekem olsem, bambae yu kasem blesing from nambawan skul ya.