Yusum Telefon Blong Prij i Karem Gudfala Frut
1. ?From wanem fasin blong yusum telefon blong prij i wan impoten rod blong mekem wok blong prij?
1 ?From wanem i gud blong yusum telefon blong prij? From we hemia wan narafala rod blong halpem ol man blong kasem stret save ya we oli mas gat, blong God i save sevem olgeta. (2 Pita 3:9) I tru, bigfala rod we yumi yusum blong talemaot gud nius blong Kingdom, hemia se yumi prij long olgeta haos wanwan. Be yumi glad blong yusum sam narafala rod tu blong traem toktok long olgeta we yumi no faenem olgeta long haos.—Mat. 24:14, NW; Luk 10:1-7; Rev. 14:6.
2. ?Wanem plan blong wok ya blong yusum telefon blong prij?
2 ?Wanem Plan Blong Wok Ya?: I gat plan i stap long saed blong wok blong prij long olgeta haos wanwan. Long sem fasin, i gat teritori we ol pablisa oli save kasem taem oli yusum telefon blong prij. Wan pablisa i save mekem wok ya hem wan nomo, no maet long wan smol grup blong tu no tri pablisa. Olgeta oli mas yusum telefon long wan kwaet ples we oli save putum tingting blong olgeta fulwan long wok ya. Plante oli luk se i gud blong sidaon long wan tebol, mo putum ol samting we oli stap yusum long wok blong prij oli stap fored long olgeta.
3. ?Wanem samting we yumi mas tingbaot taem yumi yusum telefon blong prij?
3 ?Olsem Wanem Blong Yusum Telefon Blong Prij?: Taem yumi yusum telefon blong prij, yumi mas toktok long fasin we i olsem storian nomo. Taem samfala oli jes stat long wok ya, oli raetem ol tok blong olgeta long wan pepa, nao oli ridim long fasin we i olsem storian. Ol fastok long Reasoning buk, Statem Ol Storian, Kingdom Wok Blong Yumi, mo pepa ya ?Yu Yu Wantem Save Trutok? oli save givhan long yu. Taem yu mekem rere wan storian, tingbaot wanem samting yu wantem tokbaot, wan kwestin we yu save askem long saed ya, mo sam vas we oli save givim ansa. Yu save askem long man we yu toktok wetem hem sipos i wantem wan buk, olsem buk ya we yumi stap seremaot long wok blong prij long ol haos wanwan. Tingbaot advaes ya: No fraet, mo toktok slo. Soem respek, longfala tingting, mo fasin fren. Man we yu toktok wetem hem long telefon, bambae i haremsave ol fasin ya. Lesingud taem man ya i talem tingting blong hem, nao ansa long hem mo talem tangkiu. Lukaotgud blong no tokbaot presen mane, from we maet hem i ting se yu stap yusum telefon blong mekem kleksin.
4. ?Sipos yumi yusum telefon blong prij, yumi save mekem wanem long teritori blong yumi?
4 Maet man we yu toktok long hem long telefon i sik no i handikap nao i no save aot long haos, no maet hem i wok evri dei, mekem se yumi no stap faenem hem long haos. Sam narafala we yumi save toktok long olgeta long telefon oli stap long ol haos we oli lokem get blong olgeta, no long vilej we oli no letem yumi blong prij long hem. Taswe, i gud yumi tingbaot blong yusum telefon blong prij. Long rod ya, yumi save mekem wok blong prij long fasin we yumi finisim gud ples mo yumi no mestem wan man.