“Evri Dei” Yumi Laef Folem Dedikesen Blong Yumi

“Sipos wan man i wantem kam biaen long mi, hem i mas livim ol samting we hem nomo i wantem, nao evri dei hem i mas karem pos ya we i save mekem hem i harem nogud, mo i mas biaen long mi oltaem.”​—LUK 9:23, NW.

1. ?Wanem rod yumi save folem blong soem se yumi rili ol Kristin?

“?YUMI rili ol man we yumi dediketem laef blong yumi?” Ansa blong kwestin ya, olsem John F. Kennedy, namba 35 Presiden blong Yunaeted Stet i talem, i wan rod blong faenemaot olgeta we oli rili wokgud long ol ofis blong gavman. Wetem mining we i dip moa, kwestin ya i save stap olsem wan tes blong luk sipos yumi rili wokgud olsem ol Kristin minista.

2. ?Olsem wanem wan diksonari i givim mining blong wod ya “dedikesen”?

² ?Be, wanem ya dedikesen? Webster’s Ninth New Collegiate Dictionary i eksplenem se, “wan fasin no kastom blong skul we man i givim laef blong hem long wan god, no blong mekem wan tabu wok,” “givim laef no putum i go wansaed blong mekem wan spesel wok,” “wosip we man i lego ol samting we hem nomo i wantem.” I luk olsem se John F. Kennedy i yusum tok ya, blong tokbaot “wosip we man i lego ol samting we hem nomo i wantem.” Long wan Kristin, fasin blong givim laef i no hemia nomo.

3. ?Wanem ya Kristin fasin blong givim laef long Jeova?

³ Jisas Kraes i talem long ol disaepol blong hem se: “Sipos wan man i wantem kam biaen long mi, hem i mas livim ol samting we hem nomo i wantem, nao hem i mas karem pos ya we i save mekem hem harem nogud, mo i mas biaen long mi oltaem.” (Matyu 16:​24, NW) Fasin we man i putum hem wan i go wansaed blong God, i no minim fasin blong mekem wosip long Sande nomo, no blong visitim sam ples blong wosip. Hem i joen wetem fulwan laef blong man. Blong stap olsem wan Kristin, i minim se man i mas blokem ol samting we hem nomo i wantem. Hem i mas talem no long hem wan, taem hem i stap mekem wok blong Jeova, God ya we Jisas Kraes i bin mekem wok blong hem. Antap long samting ya, wan Kristin i stap “karem pos ya we i save mekem hem i harem nogud,” taem hem i safa long eni trabol we hem i kasem from we hem i biaen long Kraes.

Eksampel We i Stretgud Olgeta

4. ?Baptaes blong Jisas i saen blong wanem?

⁴ Taem Jisas i stap long wol, hem i soemaot ol samting we oli joen wetem fasin blong givim laef long Jeova. Tingting blong hem i olsem: “Yu yu no wantem we ol man oli stap kilim anamol, mo we oli stap tekem presen i kam blong givim long yu. Be yu yu mekem wan bodi i stap rere blong mi.” Biaen hem i ademap se: “God, mi mi kam blong mekem [wil blong yu], stret olsem tok ya we i tokbaot mi, we oli raetem finis long buk blong Loa.” (Hibrus 10:​5-7) Olsem wan memba blong nesen blong God, Jisas i blong Jeova finis taem hem i bon. Be, long stat blong minista wok blong hem long wol, hem i tekem baptaes blong soemaot se hem i givim laef blong hem blong mekem wil blong Jeova. Mo long tingting blong hem, samting ya i joen wetem fasin blong givim laef blong hem olsem ransom sakrifaes. Olsem nao, hem i soem wan eksampel long ol Kristin blong mekem wanem samting we Jeova i wantem.

5. ?Olsem wanem Jisas i soem wan stret tingting long saed blong ol samting blong laef?

⁵ Afta we Jisas i tekem baptaes, hem i folem wan rod blong laef we i lidim hem i go blong ded olsem wan sakrifaes. Hem i no intres long fasin blong winim mane no blong gat plante samting long laef. Be, minista wok blong hem i impoten samting long laef blong hem. Hem i givim advaes long ol disaepol blong hem se oli mas “gohed blong lukaot kingdom mo stret fasin blong hem fastaem.” Mo hem wan i folem ol tok ya. (Matyu 6:​33, NW) Yes, wan taem, hem i talem se: “Ol wael dog oli gat ol hol blong slip blong olgeta, mo ol pijin oli gat ol bed blong olgeta. Be mi, mi Pikinini blong Man, mi no gat ples blong mi, blong go slip long hem.” (Matyu 8:20) Hem i save jenisim ol tijing blong hem blong kasem mane long ol man blong hem. From we hem i wan kapenta, maet hem i save lego Kristin minista wok smoltaem blong mekem wan naesfala fanijaa blong salem blong gat sam ekstra mane. Be hem i no yusum save blong hem blong lukaot ol gudfala samting long laef. Yumi, ol man blong wok blong God, we i givim laef long Hem, ?yumi stap folem eksampel blong Jisas? ?Yumi gat stret tingting long ol samting blong laef?​—Matyu 6:​24-34.

6. ?Olsem wanem yumi save folem eksampel blong Jisas, taem yumi blokem ol samting we yumi nomo i wantem, mo givim laef blong yumi long God?

⁶ From we Jisas i putum wok blong God long fasples, hem i no lukaot ol prapa intres blong hem. Long tri mo haf yia we hem i mekem minista wok blong hem, hem i lego ol samting we hem nomo i wantem. Wan taem, afta long wan bisi dei, we hem i no gat taem blong kakae tu, Jisas i glad blong tijim ol man we “oli trabol tumas, oli no moa gat paoa, oli olsem sipsip we oli no gat man blong lukaot long olgeta.” (Matyu 9:36; Mak 6:​31-34) Nating se hem i “taed from we i wokbaot tumas long rod,” hem i mekem disisen blong toktok wetem wan woman Sameria we i kam long wel blong Jekob long Saeka. (Jon 4:​6, 7, 13-15) Oltaem, hem i tingbaot nid blong narafala fastaem, bitim ol nid blong hem wan. (Jon 11:​5-15) Yumi save folem eksampel blong Jisas taem yumi lego ol samting we yumi intres long hem, ale yumi mekem wok blong Jeova mo givhan long ol narafala. (Jon 6:38) Taem yumi tingbaot olsem wanem blong mekem God i glad, bitim we yumi mekem smol nomo long wok blong hem, ale, yumi laef folem dedikesen blong yumi.

7. ?Olsem wanem yumi save folem eksampel blong Jisas blong givim ona long Jeova oltaem?

⁷ Taem Jisas i stap halpem ol man, hem i no traem blong pulum tingting blong olgeta i kam long hem. Hem i givim laef blong hem long God blong mekem wil blong Hem. Ale oltaem, hem i mekem sua se Jeova, Papa blong hem, i kasem ful ona, from olgeta samting we i kamaot. Taem wan lida i kolem hem se ‘Gudfala Tija,’ we hem i yusum wod ya “gudfala” olsem wan taetel nem, Jisas i stretem hem, i talem se: “I no gat man we i gud. God nomo, hem i gud.” (Luk 18:​18, 19; Jon 5:​19, 30) ?Olsem Jisas, yumi kwik blong mekem ol man oli ona long Jeova, be i no long yumi wan?

8. (a) ?Olsem wan man we i givim laef blong hem long Jeova, olsem wanem Jisas i no joen long wol? (b) ?Olsem wanem yumi save folem eksampel blong hem?

⁸ Afta we Jisas i givim laef blong hem long Jeova, olgeta samting we hem i mekem long wol, oli soem se hem i putum hem i go wansaed blong mekem wok blong God. Oltaem hem i stap klin, olsem “wan smol sipsip we i no gat soa long hem, i no gat wan samting i spolem hem.” Ale, hem i save givim laef blong hem olsem ransom sakrifaes. (1 Pita 1:19; Hibrus 7:26) Hem i folem olgeta Loa blong Moses. Olsem nao, hem i mekem Loa ya i kam klia moa. (Matyu 5:17; 2 Korin 1:20) Hem i folem ol fasin we hem i tijim. (Matyu 5:​27, 28) I no gat wan man i save talem se Jisas i gat rabis tingting. Tru ya, hem ‘i no laekem nating ol fasin blong brekem loa.’ (Hibrus 1:9) Olsem ol slef blong God, i gud yumi folem eksampel blong Jisas, taem yumi mekem laef mo tingting blong yumi i klin long fes blong Jeova.

Ol Eksampel We Oli Olsem Woning

9. ?Pol i tokbaot wanem eksampel we i olsem woning, mo from wanem yumi mas luklukgud long eksampel ya?

⁹ I defren long eksampel blong Jisas, yumi gat eksampel blong ol man Isrel we i olsem woning. Nating we oli talem, se bambae oli mekem evri samting we Jeova i talem, oli no mekem wil blong hem. (Daniel 9:11) Aposol Pol i leftemap tingting blong ol Kristin, blong oli lanem lesen long ol trabol we ol man Isrel oli kasem. I gud yumi luk sam samting we Pol i tokbaot long fas leta blong hem long ol Kristin long Korin, mo yumi faenemaot ol trap we ol man blong God long taem blong yumi oli mas lukaot long olgeta.​—1 Korin 10:​1-6, 11.

10. (a) ?Olsem wanem ol man Isrel oli “wantem ol rabis fasin”? (b) ?From wanem Jeova i askem kaon long ol man Isrel long seken taem we oli tok smosmol from kakae, mo yumi save lanem wanem long eksampel ya?

¹⁰ Fastaem, Pol i givim woning long yumi blong no “wantem ol rabis fasin.” (1 Korin 10:6) Maet samting ya i mekem se yu tingbaot taem ya we ol man Isrel oli komplen, from we oli stap kakae mana nomo. Jeova i sanem ol pijin blong oli kakae. Sem samting i bin hapen samwe long wan yia bifo, long draeples blong Sin, jes bifo we ol man Isrel oli talemaot long Jeova se oli givim laef blong olgeta long hem. (Eksodas 16:​1-3, 12, 13) Be ol samting we oli hapen oli no rili sem mak. Long faswan taem we Jeova i givim pijin long ol man Isrel blong oli kakae, hem i no askem kaon long olgeta, taem oli tok smosmol agens long hem. Be naoia, ol samting oli jenis. “Mit i stap yet bitwin long ol tut blong olgeta, bifo we oli kakae, taem kros blong Jeova i kam agens long olgeta, mo Jeova i stat blong kilim plante long olgeta oli ded.” (Namba 11:​4-6, 31-34) ?Wanem samting i jenis? Olsem wan nesen we i blong God, naoia Jeova i mas askem kaon long olgeta from fasin we oli mekem. !Oli no gat fasin tangkyu long ol samting we Jeova i givim! !Biaen, samting ya i mekem se oli komplen agens long Jeova, nating se oli bin promes se bambae oli mekem olgeta samting we hem i talem! Tede, i sem mak, i gat sam man we oli komplen long saed blong tebel blong Jeova. Samfala, oli no gat fasin tangkyu long ol kakae long saed blong speret we Jeova i givim tru long “slef ya we i stret mo waes.” (Matyu 24:​45-47, NW) Be rimemba, taem yumi givim laef blong yumi long Jeova, wetem fasin tangkyu, yumi mas tingbaot ol samting we Jeova i mekem long yumi mo akseptem ol kakae long saed blong speret we Hem i givim.

11. (a) ?Olsem wanem ol man Isrel oli sakem doti long wosip blong Jeova, taem oli wosip long aedol? (b) ?Olsem wanem wan fasin blong wosip long aedol i save spolem yumi?

¹¹ Afta, Pol i givim woning se: “I nogud yumi stap prea long ol narafala God, olsem we sam long olgeta ya bifo oli stap mekem.” (1 Korin 10:7) Long vas ya, i klia se aposol Pol i stap tokbaot fasin blong wosip long buluk, we ol man Isrel oli mekem, stret afta we oli mekem kontrak wetem Jeova long Hil Sinae. Maet yu save talem se, ‘Mi, olsem wan man we mi givim laef blong mi long Jeova, bambae mi neva joen long fasin blong wosip long aedol.’ Be, tingbaot, se long tingting blong ol man Isrel, oli no stop blong wosip long Jeova; be yet, oli tekem fasin ya blong wosip long buluk​—wan samting we i nogud olgeta long fes blong God. ?Fasin blong wosip ya i joen wetem wanem? Yes, afta we oli mekem sakrifaes long fored blong buluk, ‘oli sidaon blong kakae mo dring we oli drong, nao oli stap slip wetem woman olbaot long klia ples nomo.’ (Eksodas 32:​4-6) Tede, maet samfala oli talem se oli wosip long Jeova. Be bigfala samting long laef blong olgeta, i no wosip blong Jeova, be fasin blong haremgud long ol samting blong wol ya. Yes, oli traem faenem wan rod blong mekem wok blong Jeova i joen long ol samting ya. I tru, fasin ya i no sem mak long fasin blong bodaon long wan buluk we oli wokem long gol, be hem i sem mak nomo long fasin blong wosip long aedol. Taem man i mekem ol samting we hem nomo i wantem oli kam olsem wan god, samting ya i soem se hem i no laef folem disisen we hem i mekem blong givim laef blong hem long Jeova.​—Filipae 3:19.

12. ?Long ekspiryens blong ol man Isrel wetem Bal blong Peoro, yumi lanem wanem long fasin blong lego ol samting we yumi nomo i wantem?

¹² I gat wan narafala fasin we i joen wetem nekis eksampel we i olsem woning, we Pol i talem. “I nogud yumi stap mekem ol fasin nogud ya wetem gel olsem we sam long olgeta ya bifo oli stap mekem. Nao long wan dei nomo i gat twantetri taosen blong olgeta oli ded.” (1 Korin 10:8) From we ol man Isrel oli mekem nogud long saed blong seks wetem ol gel blong Moab, samting ya i pulum olgeta blong wosip long Bal blong Peoro long Sitim. (Namba 25:​1-3, 9) Fasin blong blokem ol samting we yumi nomo i wantem, blong mekem wil blong Jeova, i minim se yumi akseptem ol rul blong Hem long ol fasin we i klin. (Matyu 5:​27-30) Naoia, we ol gudfala fasin oli stap lus, yumi kasem advaes, se yumi mas stap klin long ol fasin nogud long saed blong seks. Mo yumi mas putum yumi i stap daon, aninit long paoa blong Jeova, blong save ol fasin we oli stret mo ol fasin we oli no stret.​—1 Korin 6:​9-11.

13. ?Olsem wanem eksampel blong Finehas i halpem yumi blong kasem save long ol samting we oli joen wetem fasin blong givim laef long Jeova?

¹³ Nating se plante oli foldaon long trap blong mekem nogud long saed blong seks long Sitim, samfala oli folem disisen we ful nesen i tekem blong givim laef long Jeova. Long olgeta ya, i gat Finehas we hem i nambawan long fasin blong wok strong. Taem hem i luk wan lida blong ol man Isrel i tekem wan woman Midian i kam insaed long haos tapolen blong hem, wantaem nomo Finehas i tekem wan spia, i sperem tufala i ded. Jeova i talem long Moses se: “Finehas . . . i mekem se mi holembak kros blong mi long ol man Isrel, taem hem i no letem wan samting nating long medel blong olgeta blong i agensem mi. Ale mi no spolem ol man Isrel from fasin ya we oli no wosip long mi nomo.” (Namba 25:11) Taem yumi no letem nating fasin blong agensem Jeova i stap​—hemia nao mining blong fasin ya we yumi givim laef long Jeova. Long hat blong yumi, yumi no save letem eni samting i tekem ples blong dedikesen blong yumi long Jeova. Mo tu, strong tingting blong yumi long Jeova i pusum yumi blong mekem kongregesen i stap klin oltaem, taem yumi talemaot ol bigfala sin long ol elda, yumi no letem i stap.

14. (a) ?Olsem wanem ol man Isrel ol traem Jeova? (b) ?Olsem wanem fasin blong givim ful laef blong yumi long Jeova i halpem yumi blong no “kam slak”?

¹⁴ Pol i tokbaot wan narafala eksampel we i olsem woning: “I nogud yumi stap traem Hae God ya, olsem we sam long olgeta ya bifo oli stap mekem. Nao ol snek oli kilim olgeta oli ded.” (1 Korin 10:9) Long vas ya, Pol i stap tokbaot taem ya we ol man Isrel oli komplen long Moses agens long God, taem oli “stat blong kam taed from we rod i longfala tumas.” (Namba 21:4) ?Samtaem yu yu mekem mastik ya? Taem yu givim laef blong yu long Jeova, ?yu yu ting se Amageden i kolosap nomo? ?Longfala tingting blong Jeova i bitim mak we yu bin putum? Rimemba, yumi no givim laef blong yumi long Jeova jes blong smol taem, no blong kasem Amageden nomo, no gat. Samting ya i blong olwe. Ale, “yumi no kam slak blong mekem ol gudfala fasin, from we sipos yumi no lego, bambae long stret taem blong hem, yumi save kasem kakae from ol hadwok ya blong yumi.”​—Galesia 6:9.

15. (a) ?Ol man Isrel oli tok smosmol agens long hu? (b) ?Olsem wanem fasin blong givim laef blong yumi long Jeova i pusum yumi blong respektem ol man we God i putumap olgeta?

¹⁵ Laswan samting, Pol i givim woning long saed blong fasin blong “tok smosmol” agens long ol man we Jeova i putumap. (1 Korin 10:10) Ol man Isrel oli tok smosmol agens long Moses mo Eron, taem 10 long ol 12 man we oli go blong spae long kantri blong Kenan oli kambak wetem ol nogud ripot. Oli mekem plan tu blong jenisim Moses we i lida blong olgeta mo gobak long Ijip. (Namba 14:​1-4) ?Tede, yumi akseptem ol man we tabu speret blong Jeova i putumap olgeta blong lidim yumi? Taem yumi luk plante kakae long saed blong speret we kampani blong slef we i stret mo waes i givim, i klia nomo se Jisas i stap yusum olgeta blong ‘givim kakae long stret taem blong hem.’ (Matyu 24:45) Fasin ya we yumi givim ful laef blong yumi long Jeova, i minim se yumi mas soem respek long ol man we hem i putumap. Yumi neva mas kam olsem sam man blong tok smosmol long taem blong yumi, we oli tanem olgeta oli go long wan nyufala hed, blong lidim olgeta oli gobak long fasin blong wol.

?Mi Mi Stap Mekem Bes Blong Mi?

16. ?Maet wanwan man we i givim laef blong hem long God i wantem askem wanem kwestin?

¹⁶ Ol man Isrel oli no save foldaon long ol bigfala sin ya sipos oli rimemba se fasin we oli givim laef blong olgeta long Jeova i blong olwe. I defren olgeta long ol man Isrel we oli no stap tru long God, Jisas Kraes i mekem olgeta samting we hem i givim laef blong hem blong mekem, gogo kasem en. Yumi, olsem ol man blong Kraes, yumi mas folem eksampel blong hem, we i mekem wosip long Jeova wetem ful laef blong hem. Mo yumi laef ‘i no moa blong mekem ol samting we tingting blong yumi i wantem, be blong mekem wil blong God.’ (1 Pita 4:2; lukluk 2 Korin 5:15.) Wil blong Jeova tede se, “hem i wantem sevem olgeta man, mo i wantem olgeta man oli faenem trutok.” (1 Timote 2:4) Blong mekem olsem, yumi mas talemaot “gud nyus blong kingdom” bifo we en i kam. (Matyu 24:​14, NW) ?Yumi stap traehad olsem wanem blong mekem wok ya? Maet yumi wantem askem yumi wanwan se, ‘?Mi mi stap mekem bes blong mi?’ (2 Timote 2:15) Ol samting long laef blong yumi oli no sem mak. Be Jeova i glad sipos yumi mekem wok blong hem wetem ‘ol samting nomo we yumi gat. Hem i no save tingbaot ol samting we yumi no gat.’ (2 Korin 8:12; Luk 21:​1-4) Wan man i no mas jajem fasin we narafala i givim hem wan wetem fulhat mo dip filing blong hem. Evri man wanwan i mas skelem mak blong blong wosip we hem i stap mekem long Jeova. (Galesia 6:4) Lav blong yumi long Jeova i mas pusum yumi blong askem se, ‘?Olsem wanem mi save mekem Jeova i glad?’

17. ?Olsem wanem fasin blong wosip i joen long fasin tangkyu? Eksplenem.

¹⁷ Taem fasin tangkyu blong yumi long Jeova i kam bigfala moa, wosip blong yumi i kam dip moa. Long Japan, wan boe we i gat 14 yia i givim laef blong hem long Jeova mo i soemaot samting ya taem hem i tekem baptaes long wora. Biaen, hem i wantem go long hae skul blong kam wan sayentis. Hem i neva tingbaot fultaem Kristin minista wok, be olsem wan man we i givim laef blong hem long Jeova, hem i no wantem lego Jeova mo ogenaesesen blong hem long wol. Blong kasem mak blong hem, hem i go long wan yunivesiti. Long ples ya, hem i luk samfala we oli gat diploma blong yunivesiti, oli givim ful laef blong olgeta long ol kampani no ol stadi blong olgeta. Hem i tingting se, ‘?Mi stap mekem wanem long ples ya? ?Mi rili save folem rod blong laef blong olgeta mo givim laef blong mi long wok blong kasem mane? ?Mi givim laef blong mi finis long Jeova, no?’ Wetem nyufala fasin tangkyu we hem i gat, hem i kam wan fultaem paenia. Save blong hem long fasin blong givim laef long Jeova i kam dip moa. Nao, samting ya i pusum hem blong gat strong tingting blong go long eni ples we oli nidim hem. Hem i go long Ministeriol Trening Skul mo oli sanem hem blong wok olsem wan misinari long narafala kantri.

18. (a) ?Fasin blong yumi blong givim laef long Jeova i kasem wanem mak? (b) ?Yumi save kasem wanem blesing taem yumi givim laef blong yumi long Jeova?

¹⁸ Fasin blong givim laef long Jeova i joen wetem ful laef blong yumi. Yumi mas blokem ol samting we yumi nomo i wantem mo “evri dei,” yumi mas folem nambawan eksampel blong Jisas. (Luk 9:23) Taem yumi mekem olsem, yumi no askem Jeova blong spel long wok blong hem. Laef blong yumi i laenap wetem ol rul we Jeova i givim long ol man blong hem. Samtaem yumi fri blong mekem prapa jus blong yumi long wan samting. Be, i gud blong luk sipos yumi stap traem bes blong yumi, blong laef folem fasin ya we yumi givim laef blong yumi long Jeova. Taem yumi mekem wok blong Jeova evri dei, mo yumi traehad blong mekem hem i glad oltaem, bambae yumi stap oltaem olsem tru Kristin. Mo bambae Jeova, Hemia we i stret blong yumi wosip long hem wetem ful laef blong yumi, bambae i blesem yumi wetem smael, we i soem se hem i glad long yumi.

[Futnot]

?Yu Yu Save Eksplenem?

◻ ?Long saed blong Jisas Kraes, fasin blong givim laef long Jeova i joen wetem wanem?

◻ ?From wanem yumi mas blokem fasin blong tok smosmol agens long Jeova?

◻ ?Long wanem rod yumi save blokem fasin blong wosip long aedol blong i no spolem laef blong yumi?

◻ ?Yumi mas tingbaot wanem we bambae i halpem yumi blong no “kam slak” blong mekem wil blong God?

[Tok blong pija long pej 17]

Ol Kristin we oli givim laef blong olgeta long Jeova, oli no “kam slak blong mekem ol gudfala fasin”