Givhan Long Ol Studen Blong Oli Statem Mo Mekem Ol Baebol Stadi
1 Taem ol Baebol studen blong yumi oli stat blong prij, maet oli fraet blong statem mo mekem wan Baebol stadi. ?Yumi save givhan long olgeta olsem wanem blong oli gat strong tingting long impoten haf ya blong wok blong prij?—Mat. 24:14; 28:19, 20.
2 Taem wan studen i kasem mak ya blong kam wan pablisa we i no baptaes yet, hemia i soemaot se hem i stap gohed gud long Tiokratik Skul. Mo ol trening we hem i kasem taem hem i mekem rere mo i givim ol tok, bambae oli givhan long hem blong i gat gudfala fasin blong tij. Hemia wan samting we hem i nidim blong hem i kam ‘prapa man blong wok we i no gat sem long wok blong hem. Hem i stap tijim ol man long trutok blong God long fasin we i stret gud.’—2 Tim. 2:15.
3 Gudfala Eksampol Blong Yu i Save Tijim Olgeta: Jisas i trenem ol disaepol blong hem taem hem i givim ol klia advaes long olgeta mo i soemaot gudfala eksampol long olgeta. Hem i talem se: ‘Man we i stap lan, mo i tren gogo i finisim trening blong hem, bambae hem i kam sem mak wetem tija blong hem.’ (Luk 6:40) I impoten tumas we yu folem fasin blong Jisas blong soemaot gudfala eksampol long wok blong prij. Taem studen blong yu i luk eksampol blong yu long wok blong prij, samting ya bambae i givhan long hem blong hem i kasemsave se stamba risen blong mekem ol visit i blong statem wan Baebol stadi.
4 Yu eksplenem long studen blong yu se taem yumi askem long wan man blong i stadi Baebol, i no nid blong yumi tokbaot evri smosmol samting long plan blong stadi. Be plante taem i moagud we yumi yusum wan no tu haf long buk blong stadi, blong soemaot olsem wanem blong mekem Baebol stadi. Blong givhan long yumi blong mekem olsem, i gud yumi luk long pej 3 blong Kingdom Wok ya mo long Kingdom Wok Blong Yumi blong Jenuware 2002 long pej 6.
5 Taem yu luk se i stret, yu save askem long studen blong yu blong i folem yu i go long ol stadi blong yu, no hem i folem wan narafala pablisa we i savegud olsem wanem blong mekem Baebol stadi, blong tufala i go long ol stadi blong hem. Long taem blong stadi, yu save askem long hem blong i tokbaot wan haf, no i eksplenem wan stamba vas. Taem hem i luk olsem wanem yu mekem wan Baebol stadi mo yu gohed long hem, samting ya bambae i givhan long hem blong mekem sem mak. (Prov. 27:17; 2 Tim. 2:2) I gud yu talem ol gudfala toktok long hem mo yu tokbaot olsem wanem hem i save kamgud moa.
6 Taem yu trenem ol niufala pablisa blong oli tijim narafala long Tok blong God, samting ya bambae i givhan long olgeta blong oli rere blong mekem “gudfala wok” ya, blong statem mo mekem ol Baebol stadi blong olgeta. (2 Tim. 3:17) I gud tumas blong yumi wok wetem olgeta, blong singaotem ol man wetem lav se: “Yufala i kam tekem wota ya blong laef, we i olsem presen blong yufala.”—Rev. 22:17.