Tok Blong Yu i Givim Save Long Ol Man

SIPOS yu wantem se tok blong yu i givim save long ol man, i no naf blong tokbaot ol gudfala save nomo. Yu mas tingbaot se: ‘?From wanem ol man ya oli nidim save ya? ?Bambae mi talem wanem blong ol man oli harem se oli lanem wan gudfala samting?’

Sipos yu mekem wan tok long Tiokratik Skul olsem we yu stap prij, ating bambae yu toktok long wan man nomo. Be long sam narafala taem, maet yu toktok i go long ful kongregesen.

?Ol Man We Yu Toktok Long Olgeta Oli Gat Wanem Save? Yu mas tingbaot se, ‘?Ol man we bambae mi toktok long olgeta, oli gat wanem save long poen ya?’ Samting ya i olsem wan fandesen we yu save bildimap tok blong yu long hem. Sipos yu stap toktok long wan kongregesen we plante long olgeta oli gat fulap save blong Baebol, yu no mas talem ol stamba trutok nomo we bighaf blong olgeta oli save finis. Yu mekem tok blong yu i stanap long ol stamba trutok ya, be yu mas go moa. Mo sipos i gat plante man oli stap we oli jes kasem save long trutok, yu mas tingbaot nid blong olgeta tu.

Yu save jenisim spid blong tok blong yu folem save we ol man oli gat. Sipos yu tokbaot sam smosmol poen we ating bighaf blong ol man oli save finis, yu spid lelebet. Be taem yu tokbaot samting we maet bighaf blong ol man oli no save, yu mas slodaon, blong oli kasem save gud.

?Wanem Kaen Tok Bambae i Givim Save? Sipos yu wantem we tok blong yu i givim save long ol man, i no nid blong gat wan niufala save oltaem blong talem. Sam brata oli talemaot ol trutok we ol man oli save finis, be long fasin we i isi nomo blong oli kasem save long olgeta. Nao sam man we oli lesin oli harem olsem se i wan niufala save we oli lanem.

Long wok blong prij, i no naf blong talem wan nius we i pruvum se yumi stap long ol las dei. Yu mas yusum Baebol blong soemaot mining blong samting ya we i hapen. Sipos yu mekem olsem, bambae yu givim save long man. Samting ya i sem mak taem yu tokbaot ol tri, ol anamol, mo ol samting we God i mekem raonabaot long yumi we oli folem program we Hem i putum long olgeta. Bigfala tingting blong yu i no blong talem wan save blong ol saentis we ol man oli neva harem bifo. Nogat. Bigfala tingting blong yu se yu wantem joenem ol tok blong Baebol wetem ol samting raonabaot long yumi, blong pruvum se i gat wan God i stap we i mekem ol samting ya mo i lavem yumi. Hemia bambae i givhan long man we yu toktok long hem, blong i kasem sam niufala save long saed ya.

Samtaem i no isi blong tokbaot samting we ol man oli harem plante taem finis. Be sipos yu wantem kam wan gudfala tija, yu mas lanem blong mekem samting ya. ?Yu save mekem olsem wanem?

I gud yu lukaot moa save. Long tok blong yu, yu no yusum ol save nomo we i stap finis long tingting blong yu. Yu yusum ol tul we pej 33 kasem 38 blong buk ya i tokbaot, blong yu lukaot moa save. Sipos yu wantem we tok blong yu i givhan long ol man, i gud yu tingbaot ol samting we yu mas traehad blong mekem, folem advaes we i stap long ol pej ya. Taem yu lukaot save, maet yu faenem wan samting we i hapen long taem bifo, we smol man nomo oli save. Nao yu luk se samting ya i stret gud long tok blong yu. Sipos no, maet yu harem wan nius we i soemaot gud poen we bambae yu tokbaot.

Taem yu stap lukluk long ol save ya, i gud yu askem sam kwestin blong mekem tinging blong yu i wok, olsem: ?Wanem? ?From wanem? ?Wetaem? ?Weples? ?Hu? ?Olsem wanem? Maet yu askem se: ‘?From wanem samting ya i tru? ?Mi mi save pruvum olsem wanem? ?Wanem bilif blong plante man we i mekem i had blong olgeta oli kasem save long trutok ya blong Baebol? ?From wanem trutok ya i impoten? ?Hem i mas gat paoa olsem wanem long laef blong ol man? ?I gat wan eksampol blong pruvum se trutok ya i save givhan long man we i folem? ?Trutok ya blong Baebol i givim save long wanem fasin blong Jehova?’ Taem yu tingbaot save we bambae yu tokbaot, yu askem se: ‘?Samting ya i hapen wetaem? ?Tede, yumi save mekem wanem blong folem ol save ya long laef blong yumi?’ Sipos yu askem mo ansarem sam long ol kwestin ya taem yu givim tok blong yu, maet tok ya i laef moa.

Long tok blong yu, ating i gat ol vas we ol man oli save finis. ?Yu save mekem wanem blong ol vas ya oli givim moa save long ol man? Yu no ridim ol vas ya nomo. Yu mas eksplenem olgeta tu.

Maet yu wantem givim moa save long wan vas we man i save gud. Ale, yu tekem ol haf blong vas ya we oli joen wetem stamba tok blong yu, nao yu eksplenem olgeta wanwan. Yu save tingbaot vas ya long Maeka 6:8. ?Wanem “ol fasin we i stret gud”? ?Vas ya i stap tokbaot ol fasin we i stret long tingting blong hu? ?Yu save yusum wanem eksampol blong soemaot mining blong tok ya, “mekem ol fasin we i stret gud,” mo “lavem ol man tumas”? ?Tingting we i stap daon i minim wanem? ?Bambae yu talem wanem blong mekem save ya i stret long wan olfala? Yu no mas fogetem se, yu mas jusum ol save we i stret long stamba tok blong yu, i stret long ol man we oli lesin, mo i stret long samting we yu wantem se ol man oli mekem folem tok blong yu. Save ya i mas stret tu long taem we yu yu gat.

Plante taem i gud yu eksplenem mining blong sam tok long fasin we i isi. Sam man oli sapraes taem oli kasem save long mining blong tok ya “kingdom” long Matiu 6:10 (NW). Nating se wan brata no wan sista i kasem trutok longtaem finis, be taem hem i harem we yu eksplenem mining blong wan tok long fasin we i isi, maet hem i kasem save moa klia long wanem we vas i stap talem. Hemia i save hapen sipos yu ridim 2 Pita 1:5-8, nao yu eksplenem mining blong ol defren fasin long ol vas ya: bilif, ol fasin we i stret, save, blokem ol samting we yumi nomo i wantem, holem wok longtaem, mekem ol samting we God i wantem, lavem ol brata, mo lavem olgeta man. Maet i gat tu wod long wan vas we mining blong tufala i klosap sem mak. Be sipos yu eksplenem mining blong tufala wod ya wanwan, ol man oli save luk olsem wanem wan i defren long narawan. I gat sam wod olsem long Ol Proveb 2:1-6: waes, save, fasin blong haremsave, mo haremsave mining blong ol strong samting.

Sipos yu mekem ol man oli tingting gud long wan vas, maet hemia i givim moa save long olgeta. Plante man oli sapraes taem oli luksave se wol ya we 1 Jon 2:17 i talem se bambae i lus, hemia ol man we oli no obei long God. Mo oli sapraes bakegen taem oli ridim Ol Sam 104:5, we i talem se: “Wol ya i stap strong long fandesen blong hem, we bambae hem i no save muf nating.” Wan taem, Jisas i mekem ol Sadusi oli sapraes. Hem i yusum ol tok blong Eksodas 3:6, we ol Sadusi oli talem se oli bilif long hem. Nao hem i joenem tok ya wetem bilif ya se man i save laef bakegen long ded.—Luk 20:37, 38.

I gat plante rod blong givim save long wan vas. Yu save tokbaot samting we ol vas raonabaot oli talem, ol samting we i hapen long taem ya we oli raetem ol vas ya, hu man we i stap toktok, mo hu man we i stap lesin. Ol Farisi oli save gud ol tok blong Sam 110. Nating se i olsem, Jisas i pulum tingting blong olgeta i go long wan smol save we i impoten, long vas wan blong Sam ya. Jisas i askem long olgeta se: “‘?Wanem tingting blong yufala long Mesaea ya? ?Bambae hem i kamaot long laen blong hu?’ Olgeta oli talem long hem se, ‘Bambae hem i kamaot long laen blong King Deved.’ Nao hem i askem long olgeta se, ‘?Be olsem wanem we Tabu Spirit i givim waes long King Deved blong i singaot Mesaea ya, se Masta blong hem? King Deved i talem se, “Hae God i talem long Masta blong mi se, ‘Yu sidaon long raet saed blong mi yu wet. Bambae mi mekem ol enemi blong yu oli stap aninit long paoa blong yu, oli slef blong yu.’” ?Sipos King Deved i talemaot we Mesaea i Masta blong hem, olsem wanem we Mesaea ya i save kamaot long laen blong hem?’” (Mat. 22:41-45) Taem yu folem fasin ya blong Jisas blong mekem ol man oli tingting gud long ol vas blong Baebol, bambae yu givhan long olgeta blong oli ridim gud Tok blong God.

Maet wan brata i talem long tok blong hem, stret taem we oli raetem wan buk blong Baebol, no stret taem we wan samting i hapen. Sipos i olsem, hem i mas eksplenem sam narafala samting tu we oli hapen long taem ya. Nao ol man bambae oli kasem klia, from wanem buk ya no samting we i hapen, i impoten.

Wan rod blong givim save long ol man, hemia blong skelem wan samting wetem wan narafala samting. Maet yu talem tingting we ol man oli gat long wan samting, nao yu skelem wetem wanem we Baebol i talem. Sipos no, maet yu skelem wan stori long wan buk blong Baebol wetem sem stori long wan narafala buk blong Baebol. ?Olsem wanem? ?I gat sam samting we oli defdefren long tufala stori ya? ?From wanem oli defdefren? ?Tufala stori ya i tijim yumi long wanem samting? Taem yu mekem olsem, ol man we yu toktok long olgeta oli kasem niufala save long ol stori ya.

Long tok blong yu, maet yu mas tokbaot wan haf blong Kristin wok blong prij. Yu save mekem tok blong yu i gud moa, sipos long stat blong hem, yu talemaot ol bigfala tingting long tok ya. Yu tokbaot wok we yumi mas mekem, from wanem yumi mas mekem, mo yu tokbaot se wok ya i joen olsem wanem wetem bigfala tingting we yumi ol Witnes blong Jehova yumi gat. Nao yu eksplenem weples, wetaem, mo long wanem fasin yumi mas mekem wok ya.

Maet yu gat wan tok blong mekem, we i tokbaot “ol tingting blong God we man i no save faenemaot.” (1 Kor. 2:10) I gud yu talem fastaem ol bigfala poen long tok ya mo yu eksplenem olgeta. Sipos yu mekem olsem, bambae i isi moa blong ol man oli kasem save long ol smosmol poen. Long lastok blong yu, i gud yu talem klia ol bigfala tingting bakegen. Sipos yu mekem olsem, ol man bambae oli harem se oli kasem sam niufala save long tok blong yu.

Advaes Long Kristin Fasin Blong Laef. Sipos yu halpem ol man blong oli luksave rod blong yusum ol save long tok blong yu, bambae yu givhan moa long olgeta. Taem yu stap tingting long ol vas long tok blong yu, yu save askem kwestin ya, ‘?From wanem Jehova i meksua se save ya i stap long Baebol kam kasem taem blong yumi?’ (Rom 15:4; 1 Kor. 10:11) Yu save tingbaot ol trabol long laef blong ol man we yu toktok long olgeta. Nao yu tokbaot ol advaes mo ol rul blong Baebol we oli stret long trabol ya. Long tok blong yu, yu mas pulum ol man blong oli tinging gud long ol tok blong Baebol. Nao bambae oli luksave olsem wanem ol tok ya i save givhan long olgeta blong oli winim ol trabol ya. Yu mas toktok long fasin we i klia. Yu mas talem stret, wanem fasin mo tingting we yu stap tokbaot.

Taem yu stat blong wok long poen ya, i gud yu traem folem wan no tu advaes we yumi jes tokbaot, long wan tok we yu stap rerem. Taem yu kam gud moa long advaes ya, yu save folem sam narawan. Sloslo, bambae ol man oli wantem tumas blong harem ol tok blong yu, from we oli save se bambae oli kasem sam save we i givhan gud long olgeta.