Yusum Ol Save We Oli Raetem Long Pepa Blong Tok

BAEBOL i talem se Kristin kongregesen i olsem bodi blong yumi. Olgeta haf blong hem oli impoten, be “olgeta haf ya oli gat ol naranarafala wok blong olgeta.” From samting ya, yumi mas wok strong long enikaen wok we yumi kasem. Hemia i min se yumi mas kasem save gud long tok we oli givim long yumi, mo yumi mas mekem gud. Yumi no mas ting se sam tok nomo oli impoten, be sam oli no impoten from we ol save long olgeta i no pulum gud tingting blong man. (Rom 12:4-8) Wok blong slef we i stret mo waes i blong givimaot save blong God we i olsem kakae, “long stret taem blong hem.” (Mat. 24:45, NW) Taem yumi wanwan i yusum tingting blong yumi mo ol fasin blong yumi blong mekem ol tok folem ol advaes we yumi kasem, yumi soemaot se yumi tinghae long plan we slef ya i folem blong givimaot kakae. Long rod ya, yumi givhan blong mekem se kongregesen i ron gud.

?Yu Mas Yusum Wanem Save? Taem yu kasem wan tok long Tiokratik Skul, yu mas lukaot gud blong tokbaot poen ya nomo, be i no wan narafala poen. Long bighaf blong ol tok, pepa i talem wanem buk mo wanem pej we yu mas tekemaot save long hem. Sipos pepa blong tok i no talem, yu nao yu mas lukaot save long ol defren buk. Be taem yu mekemrere tok blong yu, yu meksua se olgeta haf blong tok ya oli tokbaot poen ya nomo we i stap long pepa blong tok. Taem yu jusum ol save we bambae yu yusum, i gud tu blong tingbaot ol man we bambae yu toktok long olgeta.

Yu mas stadi gud long ol save long buk we oli raetem long pepa blong tok. Mo yu mas tingting gud long ol vas we oli stap long ol save ya. Nao yu mas tingbaot rod blong yusum gud ol save ya, blong givhan long ol man we bambae yu toktok long olgeta. I gud yu jusumaot tu no tri poen long ol save ya, blong oli kam ol bigfala poen long tok blong yu. Long sem fasin, yu mas jusumaot sam vas we oli stap long save ya, blong yu ridim mo eksplenem olgeta long tok blong yu.

?Yu mas yusum hamas save? Yu yusum save we i naf nomo long tok blong yu. Sipos yu yusum tumas save, bambae yu no gat taem blong tijim gud ol man. Sipos sam long ol save ya i no laenap wetem samting we yu wantem se tok blong yu i mekem long ol man, i moa gud yu no yusum. Yu yusum ol save nomo we i mekem samting we yu wantem se tok blong yu i mekem long ol man. Taem pepa blong tok i talem ol save we yu mas yusum, yu jusumaot ol poen we bambae oli givim moa save long ol man, mo we bambae oli givhan moa long olgeta. Poen ya we yu stap wok long hem, i no blong pulum yu blong yusum fulap save, be i blong pulum yu blong yusum nomo ol save we oli raetem long pepa blong tok.

Tok blong yu i no blong talemaot nomo ol save we oli raetem long pepa blong tok. Yu mas eksplenem sam poen tu. Yu givim sam moa smosmol save long ol poen ya, yu yusum pijatok, mo maet yu givim wan eksampol we i soemaot rod blong yusum save ya. Sipos yu ademap sam save bakegen, hemia i mas givhan blong mekem ol bigfala poen long buk we pepa i talem, oli kamaot klia. Save ya i no mas tekem ples blong samting we buk ya i talem.

Ol brata we oli naf blong tijim gud ol man, maet oli kasem wan tok long Miting Blong Kingdom Wok. Olgeta ya oli kasem save se oli mas yusum gud ol save we i stap long program long Kingdom Wok, be oli no mas yusum ol narafala save blong tekem ples blong hem. Long sem fasin, ol brata we oli givim ol pablik tok, oli kasem wan pepa we ol poen oli stap finis long hem. Maet ol brata ya oli ademap sam smosmol save. Be pepa ya i talem klia ol bigfala poen we brata i mas yusum, ol save we hem i mas yusum blong pruvum ol poen ya, mo ol vas we tok ya i stanap long olgeta. I impoten we ol brata oli lanem blong yusum ol save we i stap long pepa, blong oli tijim gud ol man. Hemia bambae i mekem olgeta oli rere blong givim ol narafala tok we maet oli impoten moa.

Trening ya i save givhan long yu tu blong yu mekem ol Baebol stadi we oli gohed gud. Bambae yu lanem blong tokbaot ol save long buk blong stadi, i bitim we yu tokbaot ol narafala save. Maet narafala save ya i pulum tingting blong man, be i no givhan long hem blong i kasem save long samting we hem i stap stadi long hem. Be sipos yu kasem save long bigfala tingting long ol advaes ya, bambae yu no strong bitim mak tu blong folem nomo wanem we buk blong stadi i talem. Bambae yu rere blong ademap sam narafala save, taem yu luk se i gat nid.