Ol Refrens Blong Kristin Wok Mo Laef—Buk Blong Miting

4-10 SEPTEMBA

OL GUDGUDFALA SAMTING LONG BAEBOL | ESIKEL 42-45

“!Tru Wosip i Stanap Bakegen!”

it-2 pej 1082 haf 2

Tempol

Tempol we Esikel i luk long vison. Long yia 593 Bifo Kraes, long namba 14 yia afta we Jerusalem mo tempol blong Solomon i foldaon, profet Esikel i luk wan vison, mo long vison ya God i tekem hem i go long wan ples we i hae we i hae, mo long ples ya Esikel i luk tempol blong Jehova. (Esik 40:1, 2) Vison ya we Esikel i luk, i blong mekem ol man Jiu we oli kalabus oli tanem tingting blong olgeta, mo tu i blong leftemap tingting blong olgeta we oli holemstrong long Jehova. Jehova i talem long Esikel blong i talemaot long “ol laen blong Isrel” evri samting we hem i luk long vison ya. (Esik 40:4; 43:10, 11) Haos tempol ya i gat defdefren mesamen. Blong mesarem tempol ya oli yusum wan “longfala rula” (longfala rula ya i kasem, 3.11 meta; o 10.2 ft) mo ‘kiubit’ blong hem (longfala kiubit, 51.8 sentimeta 20.4 in.). (Esik 40:5) Samfala oli ting se Serubabel i folem ol mesamen blong tempol ya taem hem i wokem tempol bakegen long taem we oli kamfri. Be, i no gat wan pruf we i soemaot se tingting ya i tru.

Traem Faenem Ol Gudfala Samting Ya

it-2 pej 467 haf 4

Nem

Ol man Isrel oli mekem sem long nem blong God, from we oli no moa folem ol stret loa blong God long laef blong olgeta. (Esik 43:8; Am 2:7) Taswe God i panisim olgeta, be hemia i givim janis tu long ol narafala neson blong oli tok nogud long nem blong God. (Skelem wetem Sam 74:10, 18; Aes 52:5.) Ol neson ya oli no luksave se samting we Jehova i mekem i gud nomo, mo hem i wan God we i klin, taswe oli gat rong tingting se ol trabol we i kasem ol man Isrel i soemaot se Jehova i no stap protektem ol man blong hem. Blong Jehova i mekem nem blong hem i stap tabu, hem i tekem aksen taem hem i mekem se sam man Isrel we oli laef yet long ol narafala kantri oli gobak long kantri blong olgeta.—Esik 36:22-24.

it-2 pej 140

Stret Fasin

Be, oltaem Jehova i wantem se ol man blong hem oli save ol fasin we i stret mo oli mekem i wok long laef blong olgeta, olsem nao hem i save glad long olgeta. (Aes 1:17, 18; 10:1, 2; Jer 7:5-7; 21:12; 22:3, 4; Esik 45:9, 10; Am 5:15; Maek 3:9-12; 6:8; Sek 7:9-12)

11-17 SEPTEMBA

OL GUDGUDFALA SAMTING LONG BAEBOL | ESIKEL 46-48

“Ol Man Israel We Oli Gobak Oli Kasem Blesing”

it-2 pej 1001

Man blong wol ya

Long ol Hibrus haf long Baebol tok ya i kamaot plante taem long buk blong Esikel, i gat 90 taem we God i singaotem profet ya se “man blong wol ya” (Esi 2:1, 3, 6, 8)Jehova i yusum tok ya blong soemaot se profet ya i wan man blong wol nomo, maet hem i mekem olsem blong soemaot se hem i Hae moa long man we i stap talemaot mesej blong hem. Hem i talem tok ya tu long profet Daniel long Daniel 8:17

18-24 SEPTEMBA

OL GUDGUDFALA SAMTING LONG BAEBOL | DANIEL 1-3

“Man We i Holemstrong i Kasem Blesing”

Traem Faenem Ol Gudfala Samting Ya

it-2 pej 382

Mesak

I gat tri risen we i mekem se Daniel mo trifala fren blong hem oli talem se ol kakae we king i givim i no ‘klin’: (1) Ol man Babilon oli kakae ol anamol we Loa blong Moses i talem se oli no klin; (2) oli no bin luk sipos oli letem blad blong ol anamol ya i ron aot fastaem, maet oli jokem nek blong samfala nomo; (3) ol hiten man oli stap yusum ol anamol ya blong mekem sakrefaes long ol god blong olgeta fastaem bifo we oli kakae, taswe maet trifala ya oli harem se ol anamol ya oli joen wetem wosip blong ol giaman god ya.—Dan 1:8; skelem wetem 1Ko 10:18-20, 28.

25 SEPTEMBA–1 OKTOBA

OL GUDGUDFALA SAMTING LONG BAEBOL | DANIEL 4-6

“?Yu Stap Gohed Nomo Blong Wosipim Jehova?”

Traem Faenem Ol Gudfala Samting Ya

w88 10/1 pej 30 haf 3-5

Kwestin

Taem king i harem nem blong Daniel, hem i talem bakegen se, oli putum wan flas klos long Daniel, oli karem jen we oli wokem long gol mo oli hangem long nek blong hem, mo oli putum hem i kam namba tri haeman long kingdom blong hem. Be profet ya i talem long king wetem respek se: “King, yu no givim ol samting ya long mi. Sipos yu wantem, yu save givim long narafala man. Be mi bambae mi ridim tok ya we i stap long wol, mo bambae mi talemaot mining blong hem long yu.”—Daniel 5:17.

Taswe Daniel i no nid blong kasem pei, blong hem i talemaot mining blong ol tok we Belsasa i luk. King ya i save holem ol presen ya o i save givim long wan man we hem i wantem givim long hem. Daniel i talem from wanem hem i no save karem ol presen ya, hemia from we Jehova nao i givim paoa long hem blong i talemaot mining blong ol tok ya, mo i no longtaem bambae hem i panisim ol man Babilon.

Yumi ridim long Daniel 5:29 se afta we Daniel i talemaot mining blong ol tok ya, king i talem long ol man blong hem blong oli givim ol presen ya long Daniel. Daniel hem wan i no putum klos o nekles ya. King Belsasa nao i givim oda long ol man blong hem blong oli putum ol samting ya long Daniel. Be samting we oli mekem i no agensem wanem we i stap long Daniel 5:17, from we long vas ya profet ya i soemaot klia se hem i no wantem tekem ol samting ya.

dp pej 109 haf 22

Fo Wod We i Jenisim Wol

²² Daniel i talemaot mining blong ol tok ya. I no longtaem ol man Media mo Pesia bambae oli winim Babilon. Nating se ol samting we Daniel i talem i mekem Belsasa i harem nogud tumas, be yet hem i holem promes blong hem. Hem i talem long ol man blong wok blong hem blong oli putum wan flas klos long Daniel, oli karem jen we oli wokem long gol mo oli hangem long nek blong hem, mo oli putum hem i kam namba tri haeman long kingdom blong hem. (Daniel 5:29) Daniel i no blokem olgeta, from we hem i luksave se samting we oli mekem i soemaot se oli ona long Jehova. Ating Belsasa i mekem olsem long profet ya blong mekem Jehova i glad, be hem i let finis mo samting we hem i mekem i smol tumas.