Japta 26

Long Ples Blong Hem Long Kapaneam

NAOIA fulap man long ol ples olbaot oli save ol bigbigfala wok we Jisas i stap mekem. Plante man oli stap longwe, be oli wokbaot i kam blong luk Jisas. Sam dei i pas finis, nao Jisas i kambak long Kapaneam we i stap kolosap long bigfala lugun blong Galili. Kwiktaem nomo, ol man oli harem nyus ya se hem i kamhom. Ale plante man oli kam long haos blong hem. Mo tu, i gat ol Farisi mo ol tija blong Loa oli kam. Sam long olgeta oli aot long Jerusalem, oli kam long ples ya we i longwe tumas.

Be haos i smol tumas. I no gat ples blong olgeta oli kam insaed, mo haf oli no save kam kolosap long doa. Oraet, evri samting i rere nao blong Jisas i mekem wan bigfala merikel. Samting we i hapen long taem ya i impoten tumas. Hem i givhan long yumi blong bilif we sipos Jisas i wantem, paoa blong hem i naf blong tekemaot ol sik wetem stampa blong olgeta tu.

Nao Jisas i stap talemaot tok blong hem long olgeta. Gogo, fo man oli kam, oli karem wan sikman, we haf bodi blong hem i ded. Oli wantem se Jisas i mekem bodi blong hem i gud bakegen. Be oli no save kam kolosap long Jisas, from we haos ya i fulap gud long ol man. Oli harem nogud. Be oli no les. Oli klaemap antap long haos ya we ruf blong hem i flat. Ale oli tekemaot haf ruf, stret antap long ples we Jisas i stap long hem. Taem oli mekem hol finis, oli tekem sikman ya wetem bed blong hem we i stap slip long hem, nao oli slakem i godaon insaed long haos, long ples blong Jisas.

?Olsem wanem? ?Jisas i kros long olgeta from we oli blokem toktok blong hem? !No gat! Jisas i gat narafala tingting. Hem i luk bigfala bilif blong olgeta, mo hem i glad, ale hem i talem long sikman ya se: “Ol sin blong yu, mi mi tekemaot finis.” ?Be Jisas i gat paoa blong tekemaot sin? Ol tija blong Loa wetem ol Farisi oli ting se hem i no save mekem. Olgeta oli stap mekem kwestin long tingting blong olgeta, se: “?Weswe man ya i stap tok olsem? Tok ya i nogud ya. God nomo i save tekemaot ol sin blong man. ?Hu moa i save tekemaot?”

Be Jisas i save ol kwestin ya we oli stap tingbaot, nao hem i talem long olgeta, i se: “?From wanem yufala i stap mekem kwestin olsem long tingting blong yufala? ?Wanem wok i strong moa blong mekem? ?I strong blong mi talem long sikman ya se ‘Ol sin blong yu mi mi tekemaot finis’? ?No i strong blong mi talem se ‘Yu stanap, yu tekem bed blong yu, yu wokbaot’?”

Nao Jisas i letem ol man ya mo ol man we oli tok agens long hem tu oli luk wan bigfala merikel we i soemaot se hem i gat paoa long wol blong tekemaot sin blong man. Neva oli luk wan man samtaem we hem i gat paoa olsem Jisas. Hem i talem long sikman ya, i se: “Mi mi talem long yu, yu stanap, yu tekem bed blong yu, yu wokbaot yu gohom.” Wantaem nomo, man ya i stanap, i tekem bed blong hem, nao stret long fes blong olgeta, hem i goaot, i gohom. Olgeta man oli sapraes tumas, nao oli presem God, oli talem se: “Neva yumi luk wan samting olsem hemia.”

Long tok blong Jisas, hem i soemaot se sin i mekem we man i save kam sik. Mo fogif blong sin i save mekem we bodi blong hem i kamgud bakegen. Baebol i talem se faswan papa blong yumi Adam i sin. From samting ya, yumi evriwan i sinman, ale yumi kasem ol frut blong sin, hemia sik mo ded. Be taem yumi stap aninit long rul blong Kingdom blong God, Jisas bambae i fogivim ol sin blong olgeta we oli laekem God mo oli mekem wok blong hem. Ale long taem ya nao, bambae ol sik oli finis. !Wan nambawan taem ya! Mak 2:1-12; Luk 5:17-26; Matyu 9:1-8; Rom 5:12, 17-19.

▪ ?Wanem i hapen bifo we Jisas i mekem wan bigfala merikel?

▪ ?Olsem wanem man ya we haf bodi blong hem i ded, i kam long ples blong Jisas?

▪ ?From wanem yumi evriwan i sinman? ?Be olsem wanem Jisas i soemaot se hem i save tekemaot ol sin mo sik long bodi blong yumi?