Spesel Kampen Long Novemba Blong Talemaot Kingdom Blong God

Jisas i talemaot “gud nius blong Kingdom blong God.” (Lu 4:43) Hem i tijim ol man tu blong oli prea from Kingdom ya. (Mt 6:9, 10) Long Novemba, bambae yumi mekem spesel traehad blong talemaot Kingdom blong God. (Mt 24:14) Yu mekemrere plan naoia, blong yu save joen fulwan long kampen ya. Olgeta we oli mekem haftaem paenia, oli save jusum blong mekem 30 o 50 aoa long manis ya.

Traem mekem se yu soem wan vas we i tokbaot Kingdom blong God, long plante moa man long teritori blong yu. Taem yu jusum wan vas, tingbaot relijen blong man we yu toktok long hem. Sipos man we yu prij long hem i intres, givim Wajtaoa pablik N. 2 2020 long hem. Biaen yu gobak kwiktaem blong visitim hem, mo traem statem stadi wetem hem long wan buk we i stap long Tijing Tulboks. Smoltaem nomo i stap yet bifo we Kingdom blong God i smasem olgeta gavman we oli agensem hem. (Da 2:44; 1Ko 15:24, 25) !Taswe, i gud yumi yusum fulwan spesel janis ya blong soem se yumi sapotem Jehova mo Kingdom blong hem!