?From Wanem Ol Witnes Blong Jehova Oli Gobak Long Ol Man We Oli Bin Talem Se “Mi Mi No Intres”?
Ol Witnes blong Jehova oli lavem God mo oli lavem ol man raonabaot long olgeta, taswe oli wantem serem ol gudfala tok blong Baebol wetem ol man, hemia olgeta tu we oli bin talem se “Mi mi no intres.” (Matiu 22:37-39) Lav we mifala i gat long God i pusum mifala blong obei long tok we Pikinini blong hem i talem, se mifala i mas “givim witnes long olgeta ples.” (Ol Wok 10:42; 1 Jon 5:3) Blong obei long oda ya, mifala i karem tok blong God i go long ol man, i no wan taem nomo, be plante taem, olsem ol profet bifo. (Jeremaea 25:4) Mo from we mifala i lavem ol man raonabaot long mifala, mifala i traem blong serem wetem evriwan, “gud nius ya blong Kingdom” we i save sevem laef blong olgeta, hemia olgeta tu we fastaem oli bin talem se oli no intres.—Matiu 24:14.
Plante taem mifala i faenem man we i intres, long haos we bifo man i bin talem se hem i no intres. Traem tingbaot trifala risen ya:
Man i muvaot i go stap long defren ples.
Sam narafala long haos oli intres.
Man i save jenisim tingting blong hem. Ol samting we i hapen long wol mo long laef blong wanwan man, oli save mekem olgeta oli “harem save se oli nidim God long laef blong olgeta,” nao oli intres long Baebol. (Matiu 5:3) Samfala we oli bin agensem mifala tu oli jenis, olsem aposol Pol.—1 Timoti 1:13.
Nating se i olsem, mifala i no fosem eni man blong lesin long mifala. (1 Pita 3:15) Mifala i bilif se evri man i mas mekem prapa desisen blong hem long saed blong wosip.—Dutronome 30:19, 20.