Stadi 14

Makem Gud Ol Bigfala Poen

Hibrus 8:1

?I MINIM WANEM? Givhan long ol man blong oli folem gud tok blong yu, mo soemaot klia olsem wanem ol bigfala poen oli joen wetem taetel blong tok mo risen from wanem yu mekem tok ya.

?OLSEM WANEM BLONG MEKEM?

Tingbaot from wanem yu mekem tok ya. Tingbaot sipos tok blong yu i blong givim save, o pulum ol man blong oli bilif, o pulum olgeta blong oli wok. Meksua se ol bigfala poen oli givhan long yu blong kasem mak ya.

Tingbaot: ‘?Wanem ol kwestin o nogud tingting we ol man oli save gat? ?Bambae oli askem wanem kwestin fastaem, mo taem oli kasem ansa, wanem nekis kwestin blong olgeta?’ Nao putum ol poen long stret oda folem ol kwestin ya, hemia bambae i givhan long ol man blong oli lesin gud, kasem save, mo bilivim.
Makem gud taetel blong tok. Taem yu gohed long tok blong yu, talem bakegen ol impoten wod long taetel o yusum ol wod we oli gat sem mining.
Mekem ol bigfala poen i klia mo isi blong kasem save. Jusum nomo ol bigfala poen we oli stret long taetel blong tok, mo we yu gat taem blong tokbaot. Yu no jusum plante tumas. Talem klia wan bigfala poen, spel smol bifo we yu go long nekiswan, mo joenem gud.

Long fastok blong yu, maet yu talem ol bigfala poen blong givhan long ol man blong folem tok ya, o long lastok blong yu, maet yu talem bakegen ol poen ya blong ol man oli no fogetem.