Tingting Blong Hem i Stap Strong, Nating Se Hem i Gat Wan Rabis Sik

Virginia, we i wan Witnes blong Jehova, i gat wan sik we oli kolem locked-in syndrome. Ful bodi blong hem i ded. Hem i save luk mo harem samting, openem mo klosem tufala ae blong hem, mo muvum hed blong hem smol. Be hem i no save toktok mo i no save kakae. Bifo, hem i helti mo i gat paoa blong wok. Be long wan moning long 1997, hem i harem se hed blong hem i soa we i soa. Hasban blong hem i karem hem i go long hospital, mo long naet ya hem i go long wan koma. Tu wik biaen, hem i wekap long rum blong hospital we oli givim spesel kea long sikman. Ful bodi blong hem i ded mo wan masin i mekem se hem i save pulum win. Long plante dei biaen, hem i no save rimemba wan samting, mo hem i no save tu se hem i hu.

Virginia i eksplenem samting we i hapen, i se: “Sloslo memori blong mi i kambak. Mi prea wetem fulhat blong mi. Mi no wantem se mi ded nao smol boe blong mi i no moa gat mama blong hem. Blong mekem tingting blong mi i strong, mi traem blong tingbaot ol vas blong Baebol we mi save olgeta.

“Biaen, ol dokta oli muvumaot mi long rum we oli givim spesel kea long sikman. Mi spenem sikis manis long ol defren hospital mo ol ples blong trenem bodi blong mi. Afta, oli sanem mi mi gobak long haos. Ful bodi blong mi i ded yet, mo mi nidim narafala blong halpem mi wetem evri samting. !Tingting blong mi i foldaon bigwan! Mi harem se mi gud blong nating nomo, mi no save halpem narafala, mo mi no moa save mekem plante samting blong Jehova. Mi wari tu long smol boe blong mi.

“Mi ridim stori blong sam narafala Witnes we oli gat ol strong sik, mo mi sapraes long ol samting we oli save mekem long wok blong Jehova. Blong traem wokem wan positif tingting, mi tingbaot ol samting we mi tu mi naf blong mekem. Bifo we mi sik, mi gat smol taem nomo blong stadi long Tok blong God. Be naoia mi gat fuldei, evri dei. Taswe, mi traehad blong fren gud wetem Jehova, i bitim we mi harem nogud long sik blong mi.

“Mi lanem blong yusum kompiuta. Mi no yusum han blong mi blong taepem ol wod, be mi muvum hed blong mi smosmol, nao kompiuta i taepem. Hemia i mekem mi mi taed tumas, be teknoloji ya i mekem se mi save stadi Baebol mo serem hop blong mi wetem ol narafala long ol leta mo imel. Blong toktok wetem olgeta we oli stap raonabaot long mi, mi gat wan waetbod wetem alfabet long hem. Man we i stap klosap i poen i go long ol leta wanwan. Taem hem i jusum wan leta we i rong, mi openem ae blong mi bigwan. Taem hem i jusum leta we i stret, mi satem ae blong mi. Mitufala i folem fasin ya blong mekem ol wod mo ol sentens. Sam sista we oli spenem plante taem wetem mi, oli save samting we mi wantem talem, taem mi jes stat nomo blong talem. Sipos oli jusum rong wod, mifala i laf tugeta.

“Mi laekem blong joen long ol samting we kongregesen i mekem. Mi lesin long ol miting, mo naoia mi luk long video. Long ol haf blong miting we i gat kwestin mo ansa, mi taepem ansa blong mi mo narafala i ridimaot. Mo tu, evri manis mi joen wetem wan smol grup blong ol Witnes blong wajem JW Brodkasting.a

“Naoia i mekem 23 yia we mi stap sik olsem. Samtaem mi harem nogud. Be mi winim ol nogud filing olsem taem mi prea, mi joen wetem ol brata mo sista, mo mi bisi long wok blong Jehova. Blong talem stret, from help we kongregesen i givim, mi mekem wok blong haftaem paenia sikis yia finis. Mi traehad blong soemaot gudfala eksampol long boe blong mi, Alesandro, we naoia hem i mared mo i wan elda long kongregesen. Mo tu, hem wetem waef blong hem i mekem wok blong fultaem paenia.

“Plante taem mi tingting dip long ol samting we bambae mi mekem long paradaes long fiuja. Fas samting, mi wantem yusum voes blong mi blong tokbaot Jehova. Mi wantem wokbaot long saed blong wan krik mo harem gud long ol naes samting we Jehova i wokem. From we long 20 yia we i pas, mi kasem kakae tru long wan paep we i go stret long bel, mi wantem tumas blong pulum wan apol long tri mo kakae. !Mo tu, from we mi woman Itali, mi wantem mekem mo kakae ol kakae blong Itali we mi laekem tumas, olsem pizza!

“‘Hop ya se God bambae i sevem yumi’ i protektem tingting blong mi. (1 Tesalonaeka 5:8) Taem mi pijarem mi long niufala wol, mi glad tumas, nating se naoia bodi blong mi i nogud. Mi bilif strong se i no longtaem sik ya tu bambae i finis. Yes, mi wantem tumas blong harem gud long ‘laef ya we i prapa wan,’ we Jehova i promes blong givim tru long Kingdom blong hem.”—1 Timoti 6:19; Matiu 6:9, 10.