Ol Man Blong Ridim Wekap! Oli Talem

Hariken Mitch Tangkiu long stori ya we i wekemap tingting blong mi “!Sef Long Win Ya We i Kilim Fulap Man i Ded!” (Januware-Maj, 2000) Plante taem mi kasem ol E-mail long kompiuta we oli tokbaot trabol we i stap kasem ol brata blong yumi. Be mi no save sipos ol nius ya we mi kasem i tru no nogat. Stori blong yufala i leftemap tingting mo i mekem man i harem gud. Hem i givim woning long saed blong ol hadtaem we yumi stap long hem.

C. P., Yunaeted Stet

Sore tumas we plante man oli lusum olting blong olgeta long hariken ya, be i gud tumas blong ridim stori blong ol brata blong yumi long fulwol we oli girap mo givhan, nating se oli fesem denja. Pija blong brata ya we i stanap fored long haos blong hem we hariken i flatem, i mekem tingting blong mi i wok. Mi no moa save toktok smosmol from ol trabol we oli kasem mi.

R.C.N., Brasil

Fasin Blong Laef We i Spolem Bodi Long ol laswan manis, mi mi siksik, taswe mi harem gud blong save se i gat rod blong mi kamgud moa long bodi sipos mi jenisim sam fasin long laef blong mi. Stori ya “?Fasin blong Laef blong Yu i Stap Kilim Yu Yu Ded?” (Eprel-Jun, 2000) i mekem mi mi luksave se mi mas katem samkaen kakae, traem kakae smol long evri samting, mo kakae moa frut mo kabej.

E.P.M., Brasil

No Ded Long Presin Mi mi wantem talem tangkiu long yufala from stori ya “Oltaem God i Stap Givhan Long Mifala.” (Jenuware-Maj, 2000) Mi mi glad tumas mo wota i ron long ae blong mi, taem mi luk olsem wanem Francisco Coana i kasem save long trutok, mo i putum wok blong Jeova fastaem long laef blong hem. Bilif blong mi i kam strong moa taem mi ridim stori blong ol Kristin brata long Mosambik mo ol trabol we oli winim.

J. H., Yunaeted Stet

Jusum Man No Woman Blong Mared Wetem Tangkiu long stori ya “Tingting Blong Baebol: ?Olsem Wanem Blong Jusum Man No Woman Blong Mared Wetem?” (Eprel-Jun, 2000) Hem i olsem gudfala advaes we wan papa i givim long yangfala blong hem. Ol yangfala oli no gat bigfala waes, taswe plante taem oli hareap blong mared, oli ting se strong filing blong olgeta hem i trufala lav. Be oli rong. Mi mi ting se i moagud blong stap mi wan i winim we mi mared long wan we i no stret long mi.

S.R.M., Brasil

Mi mi gat 40 yia blong mi be mi no mared yet. Mi prea long Jeova evri dei blong faenem wan man blong mared wetem, mo mi stap traehad blong wokem ol fasin blong gudfala waef. I gud tumas blong ridim ol advaes ya blong lukaot wan man we i strong long bilif, we i gat semfala tingting olsem mi long fiuja, mo we i stap traehad blong wokem ol fasin we tabu spirit blong God i givim. Tangkiu tumas long yufala from se stori ya i mekem tingting blong mi i strong blong wet long Jeova.

E. F., Yunaeted Stet

Toktok Moa Stori ya “Ol Yangfala Oli Askem . . . ?Olsem Wanem Mi Save Toktok Wetem Ol Narafala?” (Julae-Septemba, 2000) i givhan long mi bigwan. Mi mi gat 16 yia nao mo i hadwok long mi blong toktok long ol narafala, speseli long ol Kristin miting. Tangkiu we yufala i tingbaot ol yangfala we oli mas stretem fasin ya. Bambae mi traehad blong folem gudfala advaes we yufala i givim.

I. A., Franis