Gud Helt Blong Olgeta Man—!Klosap Nao!
WAN niuspepa blong Jemani (Focus) i talem se: “Tingting ya blong no moa wantem sik . . . i stap wetem fulap man naoia.” Be, tingting ya i no jes kamaot naoia nomo. Taem God i wokem faswan man mo woman, hem i no gat tingting se ol man bambae oli sik samtaem. Hem i no gat tingting se bambae “olgeta man blong wol oli helti, nating se maet bodi blong olgeta i no kam gud fulwan.” (Mifala nomo i putum italiks.) !Man we i Wokem yumi i wantem se yumi evriwan i gat wan bodi we i stret gud olgeta!
?Sipos i olsem, from wanem nao yumi stap kasem plante kaen sik? Baebol i talem se Jeova God i mekem faswan papa mama blong yumi, Adam mo Iv, we tufala i stret gud olgeta. Taem God i wokem olgeta samting finis, “hem i luk olgeta wok ya we hem i mekem, hem i luk we oli gud we i gud tumas.” Yes, Man ya we i Wokem yumi wetem lav, hem i neva wantem se laef blong yumi i fulap long sik mo ded. Be Adam mo Iv tufala i jusum blong lego fasin blong laef we God i putum tufala long hem, nao tufala i foldaon long sin. Frut blong sin, hemia ded, we tufala i pasem i kam long yumi evriwan.—Jenesis 1:31; Rom 5:12.
Be, Jeova i no fogetem yumi. Mo hem i no sakemaot faswan tingting blong hem tu, long saed blong ol man mo wol ya. Long Baebol, hem i talemaot tingting blong hem blong givim gud helt bakegen long ol man we oli obei long hem. Taem Jisas Kraes, Pikinini blong God, i stap long wol ya, hem i soemaot se God i gat paoa blong mekem ol sik oli kamgud. Hem i mekem ol sikman oli kamgud, olsem man we i blaen, i gat leprosi, sora i fas, bodi i solsolap, sik ya we i stap mekem man i hafded mo spet i kamaot long maot blong hem olsem sop, mo sik ya we wansaed bodi i ded.—Matiu 4:23, 24; Luk 5:12, 13; 7:22; 14:1-4; Jon 9:1-7.
I no longtaem, God bambae i talem long Mesaea mo King ya, Jisas Kraes, blong mekem ful wol i kam aninit long paoa blong hem. Taem hem i rul antap long wol, profet tok blong Aesea bambae i kamtru: “Bambae i no moa gat man olbaot long kantri ya we i save talem se hem i sik, from we Hae God bambae i fogivim ol man blong ples ya, i tekemaot ol sin blong olgeta.” (Aesea 33:24) ?Olsem wanem samting ya bambae i hapen?
Makemgud tok blong profet ya se bambae hem “i tekemaot ol sin” blong ol man. Olsem nao, sin we yumi bon wetem, mo we i stamba blong sik, bambae i finis. ?Olsem wanem samting ya bambae i kamaot? Sakrefaes blong Jisas bambae i gat paoa long laef blong ol man we oli obei long God, nao bambae i tekemaot stamba blong sik mo ded. Long olgeta ples blong wol, bambae i gat paradaes. Kristin aposol Jon i raetem se: “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” !Taem ya i klosap nomo!—Revelesen 21:3, 4; Matiu, japta 24; 2 Timoti 3:1-5.
No Bitim Mak
Be, go kasem taem ya, plante milian man oli stap sik mo ded. From samting ya, yumi evriwan i stap wari long helt blong yumi mo helt blong olgeta we yumi laekem olgeta tumas.
Ol Kristin tede oli gat bigfala tangkiu from hadwok blong ol dokta mo sayentis. Mo oli traehad blong stap helti. Be, yumi no mas bitim mak long saed ya, from we Baebol i promes se bambae yumi kamfri long sik long fiuja. Go kasem taem we Mesaea mo King i rul fulwan long olgeta man, i no gat rod blong yumi kam stretgud long bodi blong yumi. Olsem yumi tokbaot finis, ol dokta mo sayentis oli faenemaot plante nambawan samting, be oli no save kasem aranis we i stap antap long tri olgeta, hemia gud helt blong olgeta man.
Klosap nao, bambae “olgeta man blong wol oli helti.” Be, i no Yunaeted Nesen no Wol Helt Ogenaesesen no ol man we oli blokem fasin blong spolem wol, no ol man we oli wok blong mekem laef blong man i kamgud moa, no ol dokta, we bambae oli mekem samting ya i kamaot. Jisas Kraes nomo bambae i mekem. !Tingbaot bigfala glad blong olgeta man, taem “oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem”!—Rom 8:21.
[Tok blong pija long pej 10]
Long niufala wol we God i mekem, bambae olgeta man oli gat gud helt