Ol Promes Blong God Ya We ‘Hem Nomo i Tru God’
JEOVA GOD i putum faswan man mo woman long paradaes long wol ya—hemia long garen blong Iden. Hem i talem long tufala se tufala i mas gat plante pikinini, mo tufala i mas ‘mekem evri samting long wol ya oli stap aninit long han blong tufala.’ Hemia i min se taem famle blong tufala i stap kam bigwan, tufala i mas mekem Paradaes i kasem plante moa ples long wol. (Jenesis 1:26-28; 2:15) ?Tingting ya blong God se ol man bambae oli stap long paradaes long wol ya, bambae i kamtru samtaem?
!Yes! Profet tok blong Baebol i talem se: “Hem [Jeova] bambae i mekem we ded bambae i go lus olgeta” mo ‘bambae hem i ravemaot wota blong ae blong ol man.’ Long taem ya, “ol man bambae oli talem se, ‘!Hae God [“Jeova,” NW ] i God blong yumi! Yumi stap trastem hem, mo hem i sevem yumi. Oltaem yumi stap trastem hem, mo yumi save harem gud, yumi save glad, from we hem i sevem yumi.’ ”—Aesea 25:8, 9.
Laswan buk blong Baebol i tokbaot taem ya long fiuja we ol rabis fasin blong wol ya we Setan i rulum, bambae oli lus. Baebol i tokbaot “niufala wol” we bambae i fulap long ol man we oli lavem God, i se: “Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.”—Revelesen 21:1-4.
!Hemia ol nambawan promes ya! ?Yumi save putum tingting blong yumi i stap strong long olgeta? Yes. Ded blong Jisas mo ol merikel we hem i mekem oli givim strong tingting long yumi se samting we God i talem bambae i kamtru. Traem tingbaot samting ya.—2 Korin 1:20.
Jisas i Givim Laef Blong Hem Olsem Ransom
Taem Setan i pulum Adam blong no obei long God mo blong mekem sin, olgeta pikinini blong Adam oli kam sinman. Baebol i talem se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” Be Baebol i talem tu se: “From we wan man nomo [Jisas we i stret gud olgeta] i obei long God, God i mekem we plante man oli kam stret man long fes blong hem.” (Rom 5:12, 19) Olsem yumi luk long fas haf blong magasin ya, Jisas i olsem “las Adam.” Hem “i aot long heven i kam,” mo hem i ‘givim laef blong hem [olsem ransom] blong pem rod blong plante man oli go fri.’—1 Korin 15:45, 47; Matiu 20:28.
Taswe olgeta man we oli bilif long Jisas oli save ‘kam friman [fri long sin] from we blad blong Kraes i ron,’ nao oli save kasem laef we i no save finis. (Efesas 1:7; Jon 3:36) !Yumi glad we i glad se Jeova God i lavem ol man tumas nao i givim Pikinini blong hem blong sevem yumi! (Luk 2:10-12; Jon 3:16) Sipos yumi tingting gud long samting we Jisas i mekem long plante sikman long faswan handred yia, yumi save kasem save long samting we bambae i kamaot long fiuja. !Jisas i mekem ol bigbigfala samting blong sapraes!
Pija Blong Niufala Wol
Bifo, Jisas i save tekemaot sik blong eni man we oli karem i kam long hem. I no gat wan sik we hem i no save tekemaot. Mo tu, Jisas i mekem se smol fis mo bred nomo oli kam naf blong givim kakae long plante taosen man. Mo i no wan taem nomo we hem i mekem samting ya.—Matiu 14:14-22; 15:30-38.
Wan dei Jisas i mekem ae blong man we i blaen taem i bon, i kam gud. Ol fren blong man ya mo ol man we oli stap raonabaot long hem oli luksave se hemia wan merikel. Be ol lida blong skul blong ol man Jiu, tingting blong olgeta i hafhaf. Taswe, man ya we ae blong hem i kam gud i traem eksplenem long olgeta, i se: “I stat long taem we God i mekem wol ya, i kam kasem tede, i no gat nius nating blong man we i mekem ae blong man we i blaen taem i bon, i kam gud olsem. Sipos man ya i no kamaot long God, bambae hem i no save mekem wan samting nating.”—Jon 9:32, 33.
Taem Jisas i stap prij, kasen brata blong hem, Jon Baptaes, we i stap long prisen, i sanem tu man i kam long Jisas blong faenemaot sipos ol ripot we hem i stap harem long saed blong wok blong hem oli tru. Baebol i talem se: “Stret long taem ya we tufala i kamtru, Jisas i stap mekem plante sikman oli gud bakegen. Sam long olgeta oli gat sik, mo sam oli gat ol soa, mo sam oli gat devel i stap long olgeta. Mo ol blaenman tu, hem i mekem olgeta oli save lukluk.” Nao Jisas i talem long tufala se: “Yutufala i gobak, yutufala i talemaot long Jon ol samting ya we yutufala i luk, mo we yutufala i harem. Ol blaenman, naoia oli save lukluk, mo ol man we leg blong olgeta i nogud, naoia oli save wokbaot gud. Ol man we oli gat rabis sik blong skin, naoia bodi blong olgeta i klin, mo ol man we sora blong olgeta i fas, naoia sora blong olgeta i open. Ol dedman, naoia oli laef bakegen.”—Luk 7:18-22.
Tingbaot: From we ol gudfala samting ya oli bin kamaot long taem bifo, hemia i mas mekem tingting blong yu i strong se oli save kamaot bakegen. Ol merikel we Jisas i mekem oli soemaot long smol fasin wanem we bambae hem i mekem long bigfala fasin taem hem i rul olsem King long Kingdom blong God. Ol merikel ya oli soemaot klia se God i sanem hem, mo se hem i rili Pikinini blong God.
Aninit long rul blong Kingdom blong God, ol nambawan profet tok blong Baebol bambae oli kamtru. Hemia ol profet tok olsem: ol blaenman bambae oli lukluk, ol man we sora blong olgeta i fas bambae sora blong olgeta i open, man we leg blong hem i nogud bambae i jamjam olsem anamol ya dia, mo bambae i no moa gat wan man we i sik. Pis bambae i stap long ful wol, mo bambae i no moa gat wan samting blong mekem ol man oli fraet. Ol wael anamol tu bambae oli kam kwaet, nao ol man oli no moa save fraet long olgeta.—Aesea 9:6, 7; 11:6-9; 33:24; 35:5, 6; 65:17-25.
?Olsem wanem? ?Yu yu laekem blong laef olwe aninit long rul blong Kingdom blong God we bambae i mekem ol gudfala samting ya oli kamaot long wol? Jisas i soemaot wanem we yu yu mas mekem, taem hem i prea long Papa blong hem se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) I gud yu gohed nomo blong kasem save ya we i save lidim yu blong kasem laef. Yu no mas letem wan samting nating i blokem yu.
[Tok blong pija long pej 10]
Hemia nao samting we God i promes blong mekem long wol