Baebol i Talem Wanem
?God i Stap Long Evri Ples?
I STRET nomo blong talem se God i gat olgeta paoa mo hem i save evri samting. Be samfala we oli wantem soem se God i hae olgeta, oli go moa, oli talem se God i stap long evri ples.
Baebol i talem klia se God i gat olgeta paoa mo hem i save evri samting. (Jenesis 17:1; Hibrus 4:13; Revelesen 11:17) Tru ya, i no gat wan man we paoa blong hem i bigwan olsem paoa blong God, mo God i save evri samting from we i no gat wan samting i save haed long fes blong hem. ?Be olsem wanem? ?God i stap long evri ples, no hem i wan man we i gat prapa ples blong hem?
?God i Stap Wea?
Plante vas long Baebol oli talem se “heven” i “hom” blong God. (1 King 8:39, 43, 49; 2 Kronikel 6:33, 39) Be wan vas long Baebol i tokbaot olsem wanem Jeova God i bigwan tumas, i se: “Wol ya i smol tumas. ?Bambae yu yu save kam stap long hem wetem mifala olsem wanem? Heven i bigwan we i bigwan, be olgeta ples long hem i no naf long yu.”—2 Kronikel 6:18.
Baebol i talem se: “God, hem i Spirit.” (Jon 4:24) Taswe, hem i stap long ples blong ol spirit man we i defren long skae mo wol. Taem Baebol i talem se “heven” i hom blong God, hem i stap soemaot se ples we God i stap long hem, i hae we i hae, i defren long wol ya we yumi stap long hem. Bigfala poen we Baebol i soemaot se, ples we God i stap long hem i afsaed long skae mo wol. Nating se i olsem, be hem i wan prapa ples.—Job 2:1-2.
God i Wan Spirit Man
Jisas i toktok long ol disaepol blong hem long saed blong ples we Jeova i stap long hem, i se: “Long haos blong Papa blong mi, i gat plante rum i stap. . . . Bambae mi mi go mekemrere ples blong yufala.” (Jon 14:2) ?Ale Jisas i go wea? Hem i “go insaed long heven stret, mo naoia hem i stap stanap long fes blong God blong toktok long saed blong yumi.” (Hibrus 9:24) Vas ya i tijim yumi long tu impoten trutok long saed blong Jeova God. Faswan, se hem i gat wan prapa ples blong hem. Seken samting, se hem i wan man, hem i no wan paoa nomo we i stap long evri ples.
From samting ya, Jisas i tijim ol man blong hem blong oli prea olsem: “Papa blong mifala. Yu yu stap long heven.” Oli prea i go long wan man, Jeova, we i stap long wan stret ples, hemia heven we i ples blong ol spirit man. (Matiu 6:9; 12:50) Tijing ya i laenap gud wetem fasin blong prea we ol man blong God oli bin lanem long ol 1,500 yia bifo long taem ya. Long ol faswan hanraet we oli kamaot long God, yumi faenem prea ya: “Yu yu stap antap long heven, long tabu ples blong yu. Plis yu lukluk i kamdaon long mifala, yu blesem mifala.”—Dutronome 26:15.
Tabu Spirit Blong God i Save Kasem Evri Ples
Ale, oltaem Baebol i tokbaot God se hem i gat wan prapa ples blong hem. Be plante taem Baebol i tokbaot tabu spirit se hem i stap long evri ples. Deved i askem se: “?Weples bambae mi save go haed long hem . . . ? ?Weples bambae mi save go long hem blong ronwe long yu?” (Ol Sam 139:7) Samfala oli ridim ol vas olsem, nao tingting blong olgeta i fasfas, oli ting se God i stap long evri ples. Be taem yumi ridim ol vas bifo mo afta long hemia wetem sam narafala vas bakegen, yumi luksave se Jeova i stap long ples blong hem, be hem i save sanem tabu spirit—paoa blong hem we i stap wok—i go long eni ples long skae mo wol.
Wan papa i save pusum han blong hem i godaon blong givhan long pikinini blong hem no blong mekem pikinini i haremgud. Long sem fasin, Jeova i save pusum han blong hem—tabu spirit—i go long eni ples long heven mo wol, blong mekem ol tingting blong hem oli kamtru. Taswe, man we i raetem Sam ya i talem se: “Sipos mi ronwe, mi go long is, we mi go bitim ples ya we san i stap kam antap long hem, no mi go longwe long wes, mi go bitim ples ya we san i stap godaon long hem, be bambae yu yu stap long ples ya blong lidim mi, [“han blong yu bambae i lidim mi,” NW ] mo blong givhan long mi.”—Ol Sam 139:9, 10.
Yu Yu Save Kam Fren Blong God
I no gat ol tok we oli save eksplenem Jeova God mo ples blong hem stret. Be from we hem i gat tingting daon mo i lavem yumi, hem i letem yumi blong yumi yusum ol tok we i isi long yumi blong kasem save long olgeta. Long fasin ya mo long plante narafala fasin tu, i olsem we Jeova i “bendaon blong lukluk heven mo wol.” (Ol Sam 113:6, New International Version) Nating se i olsem, yumi ol man yumi no naf nating blong kasem save fulwan long fasin blong God.
Jeova i bigfala tumas, i hae tumas, i gud tumas, ol tok blong man oli no naf blong ekplenem hem fulwan. Taswe, nating we Baebol i talem se God i gat prapa ples blong hem long heven, be ol man oli no naf blong kasem save fulwan long ples ya blong ol spirit man.—Ol Sam 139:6.
Be yumi haremgud blong save smol long saed blong prapa fasin blong Jeova. Yumi luksave se hem i no wan paoa nomo we yumi no save eksplenem, we i defren long man, mo we i stap long evri ples long skae mo wol, nogat. Yumi kasem save se hem i wan man, hem i gat wan prapa ples blong hem, mo hem i gat prapa fasin blong hem, antap moa hem i lavem ol man mo i kaen long olgeta. Save ya i givim wan janis long yumi we i moagud i bitim eni janis we wan man blong wol ya i save kasem—yumi wanwan i save fren blong ful laef blong yumi wetem King ya blong heven mo wol we i gat olgeta paoa.—Jemes 4:8.