?Fiuja i Kliagud Mo i Naes?

Plante man oli intres bigwan long fiuja. Ating plante long yumi i wantem tumas blong save wanem we bambae yumi mekem nekis manis, nekis yia, mo maet long 10 yia. ?Wol ya bambae i olsem wanem long 10, 20, no 30 yia?

?YU YU gat gudfala tingting long saed blong fiuja? Plante milian man oli gat gudfala tingting olsem. Sam long olgeta ya oli talem se i gat strong risen blong bilif se bambae fiuja i gud. Mo ol narafala oli traem holem gudfala tingting ya from we oli no wantem letem ol trabol long wol ya i mekem oli wari bitim mak.

Be i gat sam man we oli gat tingting se fiuja bambae i nogud olgeta. Oli talemaot trabol nomo, mo i luk olsem se oli glad blong talem se wantaem nomo graon ya we yumi stanap long hem bambae i lus fulwan wantaem. Long tingting blong olgeta ya i olsem se bambae i gat smol man, no bambae i no gat man nating, we i save laef tru long trabol ya.

?Olsem wanem long yu? ?Yu tingbaot se fiuja bambae i olsem wanem? ?Yu ting se fiuja bambae i fulap long trabol mo ded nomo, no bambae i gat pis mo gudfala laef blong evri man? ?Sipos yu ting se laef long fiuja bambae i gud, ale, gudfala tingting ya blong yu i stanap long wanem? ?Hem i jes from we yu wantem nomo, no i gat sam pruf we oli mekem yu yu ting olsem?

Olgeta we oli raetem Wekap! ya oli no gat tingting ya se fulwol i stap long rod blong ded mo bambae i lus fulwan. Nogat. Baebol i givim sam strongfala risen blong bilif se beswan taem I stap fored long yumi yet.

[Foto Credit Line blong pija long pej 5]

U.S. Department of Energy photograph