?Fiuja Blong Wol Ya i Stap Long Han Blong Hu?

BUK ya National Geographic blong manis Oktoba 2007, i tokbaot trabol blong win mo solwota we i stap kam hot moa, i se: “Long olgeta trabol we oli kasem man, ating trabol ya se wol i stap kam hot moa, hem i trabol ya we i had moa blong winim i bitim ol narafala trabol.” Buk ya i gohed se sipos yumi wantem winim trabol ya long fasin we i gud, yumi mas “hareap mo yumi mas tekem ol strong desisen, mo yumi mas tingting moa olsem ol bigman, bitim we yumi tingting olsem pikinini, from we, sore tumas, i no plante taem we yumi ol man i soem finis fasin olsem bigman.”

?Ol man bambae oli soemaot se oli naf blong tekem ol desisen we oli waes? I gat plante samting we i save blokem man blong mekem olsem. Long ol samting ya i gat fasin we plante man oli no kea nating long denja we i stap, oli wantem plante tumas samting, oli no gat naf save, oli tingbaot moa ol samting we oli save kasem, olsem mane, i bitim we oli tingbaot envaeronmen, plante man long ol kantri we ekonomi i jes kam antap maet oli ronem mane nomo, mo plante milian man oli no wantem lego ol gudfala samting blong laef we oli gat naoia, we plante taem ol samting ya oli kakae tumas lektrik mo paoa.

Wan profet blong God bifo i soemaot i klia nomo se ol man oli no naf nating blong stretem ol trabol we oli kamaot from defdefren tingting long saed blong wanem fasin i stret blong mekem, mo oli no naf blong blokem ol trabol bitwin ol man, mo ol trabol we i kamaot long gavman. Profet ya i raetem se: “Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” (Jeremaea 10:23) Ol trabol we oli kamaot finis long olgeta yia blong laef blong man long wol ya oli soemaot bigwan se ol tok ya oli tru. Tede, ol man oli gat bigfala save long saed blong saens mo fasin blong wokem olting, be yumi stap fesem sam trabol mo denja we neva man i bin tingbaot bifo. ?I gat samting we i save mekem yumi sua se fiuja blong yumi bambae i gud?

I tru, ol man oli toktok plante long saed blong ol samting we oli save mekem blong winim ol problem we oli kamaot from weta mo sam narafala trabol bakegen, be i no gat plante aksen we i folem ol toktok ya. Tingbaot nius ya we yumi tokbaot finis se long 2007 hemia fastaem we ol sip oli save pas long rod ya we oli kolem Northwest Passage long not blong wol olgeta. ?Olsem wanem taem ol man oli harem nius ya? ?Oli mekem wanem? Wan toktok i kamaot long wan buk (New Scientist) we i talem se taem ol kantri oli luk we aes i ronaot mo i gat niufala graon i stap, “oli hareap blong wantem tekem ol niufala graon ya i blong olgeta blong bambae oli save drilim hol blong traem faenem moa oel mo gas bakegen.“

Klosap 2,000 yia bifo, Baebol i talemaot tru nomo se bambae ol man oli gohed long fasin blong olgeta gogo bambae oli “stap spolem wol.” (Revelesen 11:18) I klia se wol ya i nidim wan lida we i gat waes mo paoa blong mekem ol jenis i kamaot mo i nidim ol sitisen tu we bambae oli glad blong obei long hem. ?I gat wan lida blong politik no wan saentis we i olsem? Baebol i ansa se: “Yufala i no mas trastem ol lida blong wol ya. Olgeta oli no save sevem yufala.”—Ol Sam 146:3.

Fiuja Blong Wol Ya i Stap Long Han Blong Wan Man We Yumi Save Trastem

I gat wan Lida nomo we i naf blong winim ol trabol we oli stap kamaot long wol tede. Baebol i tokbaot Lida ya i se: “Spirit blong Hae God [Jeova] bambae i stap long hem, i mekem hem i waes, mo i mekem hem i man blong save. Spirit ya bambae i givim gudfala toktok long hem, mo i mekem hem i gat paoa. Bambae hem i mekem hem i save ol samting we Hae God i wantem, mo i mekem hem i man blong ona long Hae God. . . . Bambae hem i stretem bisnes blong ol man we trabol i kasem olgeta, mo bambae i mekem long fasin we i stret olgeta. . . . Long ol strong tok ya blong hem, bambae hem i kilim ol man nogud oli ded.”—Aesea 11:2-5.

?Hu ya Lida ya? Hemia Jisas Kraes nomo we lav i pusum hem blong i givim laef blong hem from yumi. (Jon 3:16) Naoia, Jisas i wan spirit man long heven we hem i gat bigfala paoa, mo God i givim raet mo paoa long hem blong i rulum wol.—Daniel 7:13, 14; Revelesen 11:15.

Wan narafala samting we i mekem Jisas i stret blong stap olsem Lida, hemia from we hem i savegud olgeta samting we God i wokem. Bifo we hem i kam long wol, hem i gat save long ol samting ya finis. Tru ya, longlongtaem bifo finis, taem God i wokem heven mo wol, Jisas i “olsem nambawan man blong wok blong hem.” (Ol Proveb 8:22-31, NW) Tingbaot samting ya. Jisas ya we i halpem God blong wokem wol mo olgeta laef samting we i stap, hem nao bambae i tekemaot ol trabol we man i mekem we oli spolem wol.

?Hu ol man we bambae oli sitisen aninit long Kraes? Hemia ol man we oli gat tingting daon mo we oli laekem stret fasin. Ol man ya oli save trufala God, Jeova, mo oli obei long Jisas Kraes olsem King blong olgeta. (Ol Sam 37:11, 29; 2 Tesalonaeka 1:7, 8) Jisas i talem se ol man ya nao we “God bambae i givim wol ya long olgeta.” Bambae oli stap long wol ya we i kam wan naesfala paradaes.—Matiu 5:5, futnot; Aesea 11:6-9; Luk 23:43, NW.

?Yu mas mekem wanem sipos yu tu yu wantem harem gud long ol gudfala promes ya we Baebol i tokbaot? Jisas i ansa se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”—Jon 17:3.

I tru, maet i luk olsem se wol blong yumi i stap long denja, be yumi sua fulwan se bambae hem i no save lus. Bambae hem i stap oltaem olsem hom blong ol man oli laef long hem. Ol man we oli gohed blong spolem ol samting we God i wokem mo we oli no wantem obei long Jisas Kraes, olgeta ya nao oli stap long denja from we olgeta bambae oli lus. Taswe, ol Witnes blong Jeova oli talem gud long yu se yu mas tekem ol save ya we i save lidim yu blong yu gat laef we i no save finis.

[Bokis blong pija long pej 8]

SAENS I NO NAF BLONG WINIM

Plante milian man oli tekem drag blong harem gud nomo, dring alkol bitim mak mo smok tabak. Nating se oli savegud ol denja we bambae i kamaot from ol samting ya, oli gohed nomo blong spolem tingting mo bodi blong olgeta. Oli no tingbaot nating se laef i wan sas presen we i kamaot long God. (Ol Sam 36:9; 2 Korin 7:1) Sore tumas, be from we plante man oli no tingbaot tu se wol i wan presen we i kamaot long God, oli stap mekem samting we i stap spolem wol nomo.

?Wanem nao rod blong winim problem ya? ?Edukesen mo saens i save winim problem ya? !Nogat! Problem i kamaot from we ol man oli no gat tingting blong Jeova long saed blong wol. Taswe blong winim problem ya, man i mas gat moa save long saed blong God. Baebol i talemaot samting ya. Hem i promes se i gat taem i stap kam we “bambae i no moa gat man we i save mekem i nogud long narafala man, mo i no moa gat wan samting we i save spolem” wol ya, from we wol ya “bambae i fulap gud long ol man we oli savegud Hae God, olsem we solwota i fulap gud long ples blong hem.”—Aesea 11:9.

[Tok blong pija long pej 9]

Taem Kraes i rul, ol stret man bambae oli wok tugeta blong mekem fulwol ya i kam wan paradaes