Toktok Blong Sam Man We Oli No Witnes Blong Jeova

Franis “Ol Witnes blong Jeova, oli respektem ol loa blong gavman. . . . Oli no mekem trabol blong seraotem ol man. Oli wok, oli pem ol takis, oli givhan long kantri blong yumi long saed blong bisnes, mo oli glad blong givim samting long olgeta we oli gat nid. Oli kamaot long ol defdefren kantri mo laen, be oli joen gud wanples mo oli gat pis. Hemia i nambawan tumas. . . . Sipos yumi evriwan i Witnes blong Jeova, bambae mifala ol polis, mifala i no moa gat wok blong mekem.”—Man we i toktok long bihaf blong polis blong Franis.

Yukren “Ol Witnes blong Jeova oli tijim ol pikinini blong olgeta long ol gudfala fasin. I gat ol fasin mo ol tingting we plante man long wol tede oli ting se oli stret nomo, be oli spolem ol pikinini mo ol narafala man tu. Ol Witnes blong Jeova oli tijim ol pikinini blong olgeta blong sakemaot ol tingting mo ol fasin olsem. Oli givim woning long ol pikinini se i nogud blong tekem drag, smok, mo dring bitim mak. Oli luksave se i impoten blong no giaman mo stil, be oli mas wok had. . . . Ol Witnes blong Jeova oli tijim ol pikinini blong olgeta long ol gudfala fasin, blong oli respektem ol haeman blong gavman mo ol narafala man wetem olting blong olgeta tu. Mo oli tijim ol pikinini blong olgeta blong obei long loa blong kantri blong olgeta.”—Wan buk (The History of Religion in Ukraine) we Tija ya Petro Yarotskyi i raetem.

Itali “Olgeta evriwan oli toti taosen man long Olympik Stadium, mo oli sidaon kwaet nomo . . . Oli no sakem doti olbaot long graon, oli no mekem noes mo oli no singsingaot bigwan. Hemia nao samting we i hapen yestede long Olympik Stadium . . . I no gat man i mekem nogud saen long han blong hem from we hem i kros, i no gat wan sigaret, mo i no gat wan tin [limonad] long graon. Ol man oli sidaon nomo mo oli ridim Baebol blong olgeta, oli raetemdaon sam toktok we oli harem, mo ol pikinini oli sidaon kwaet nomo.”—Wan niuspepa (L’Unità) i tokbaot wan asembli blong ol Witnes blong Jeova long Rom.

Briten Long saed blong fasin blong ol Witnes blong go storian long ol man long haos blong olgeta, “wan bigman blong jos blong taon ya Cheltenham i talem se, [Jos blong Inglan] i nidim ol grup blong ol man we oli holemstrong long wosip blong olgeta . . . olsem ol Witnes blong Jeova.”—The Gazette, Gloucester Diocese.

Netalan Long taon ya Leeuwarden, ol man we oli stap klosap long Haos Kingdom no haos wosip blong ol Witnes, oli givim wan leta long ol Witnes. Leta ya i talem se: “Mifala i wantem talem long yufala se yufala i givhan bigwan blong mekem se rod ya, Noorderweg [Noorder Rod], i luk naes. Oltaem ol memba blong skul blong yufala oli putum ol klos we oli stret, mo oli gat kaen fasin long ol narafala. Ol pikinini oli gat gudfala fasin, mo yufala i no putum trak blong yufala long ol ples we i tabu blong putum ol trak long hem, yufala i no sakem ol doti long rod, mo oltaem yad blong Haos Kingdom i klin mo stret gud. Mifala i hop se yufala i stap longtaem long ples ya, from we mifala i glad tumas we yufala i stap klosap long mifala.”

Meksiko Elio Masferrer i wan tija mo wan man blong stadi. Hem i wok long wan skul we i blong stadi long ol man mo histri blong olgeta (National School of Anthropology and History). Hem i talem se ol Witnes oli givhan long plante man we oli “kasem trabol long famle blong olgeta, olsem taem man i repem wan memba blong famle, taem wan long famle i mekem nogud fasin long wan narafala long famle, taem wan i dring bitim mak, mo taem wan i tekem drag oltaem.” Hem i talem tu se ol tijing blong ol Witnes, oli “mekem man we i gat nogud tingting long hem wan, i harem gud moa.” Mo oli givhan long man olsem blong “blokem ol bigfala problem, from we hem i mekem samting we God i glad long hem.”—Niuspepa ya Excélsior.

Brasil Wan niuspepa i talem se: “Ogenaesesen blong ol Witnes blong Jeova i spesel tumas. Ples we oli kam joen long hem i klin oltaem. Evri samting i folem gud wan plan. . . . Taem miting blong olgeta i finis, ples i klin moa i bitim bifo. Taem program i stap gohed mo i gat ol tok, ples i kwaet we i kwaet. Ale taem ol man oli stap wokbaot, i no gat man i pusum narafala no i bangem hem. Oli soemaot kaen fasin. . . . Skul ya i no olbaot, i folem wan stret fasin blong mekem samting. Oli save olsem wanem blong wosipim God long fasin we i stret.”—Comércio da Franca

Ol Witnes blong Jeova oli bilif strong se God ya we i Mekem yumi, hem i save gud moa i bitim eni narafala man ol fasin we man i mas folem long laef blong hem. (Aesea 48:17, 18) Taswe, taem ol man we oli no Witnes oli talem gudfala toktok long olgeta from fasin blong olgeta, ol Witnes ya oli talem se Jeova God nao i givhan long olgeta blong gat ol fasin ya. Jisas i talem se: “Laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.”—Matiu 5:16.

[Tok blong makem poen long pej 4]

“Ol Witnes blong Jeova oli tijim ol pikinini blong olgeta blong oli gat ol gudfala fasin . . . mo blong oli obei long loa”

[Tok blong makem poen long pej 5]

“. . . Oli kamaot long ol defdefren kantri mo laen, be oli joen gud wanples mo oli gat pis . . . ”