Ol Yangfala Oli Askem

?Mi Save Mekem Wanem Blong Mi No Stap Harem Nogud Tumas?

“Taem ol fren blong mi oli no save winim wan problem blong olgeta, mi nao mi stretem problem blong olgeta mo mi mekem olgeta oli harem gud bakegen. Be biaen, taem mi gobak long haos blong mi, mi go long rum blong mi mo mi krae. Hemia wan samting we smol man nomo oli save.”—Kellie.a

“Taem mi harem nogud, mi wantem stap mi wan nomo. Sipos ol fren blong mi oli singaot mi blong go joen wetem olgeta, mi traem faenem eskius blong no go. Famle blong mi i no save nating se mi harem nogud, from we mi mi haedem gud long olgeta. Olgeta oli ting se mi mi oraet nomo.”—Rick.

?YU TU yu gat sem tingting olsem Kellie mo Rick? Sipos yes, yu no mas kwik blong ting se i gat wan samting i rong long yu. Yu mas tingbaot se long evri man, i gat sam taem we oli harem nogud. Ol man mo woman long taem blong Baebol tu oli olsem.

Samtaem, maet yu save from wanem yu harem nogud. Be sam narafala taem, maet yu no save. Anna we i gat 19 yia blong hem, i talem se: “Nating se yu no kasem wan bigfala trabol, be yu save harem nogud yet. Yu save harem nogud eni taem, nating se yu stap gud nomo we i no gat trabol long laef blong yu. !I narakaen, be i olsem nao!”

Nating sipos yu save samting we i mekem yu harem nogud no maet yu no save nating, be ?yu save mekem wanem sipos yu harem nogud tumas?

1: I gud blong tokbaot. Baebol i talem se: “Wan tru fren i soemaot lav oltaem nomo, mo hem i olsem wan brata we i rere blong givhan long taem blong trabol.”—Ol Proveb 17:17, NW.

Kellie: “Afta we mi tokbaot problem ya long wan narafala, mi harem gud tumas. Yes, naoia i gat wan narafala we i save wanem we mi stap fesem. !Mi no moa harem nogud, i olsem we oli sakem rop i kam long mi blong pulumaot mi long wan hol!”

Wan tingting: I gud yu raetemdaon nem blong wan “tru fren,” we yu save talemaot olgeta tingting blong yu long hem taem yu harem nogud.

․․․․․

2: I gud blong raetemdaon. Taem yu harem nogud gogo yu no moa gat gudfala tingting long saed blong laef, maet i gud we yu traehad blong raetemdaon ol tingting blong yu long wan pepa. Tabu spirit i pulum Deved blong raetem Ol Sam, mo samtaem Deved i raetemdaon ol tingting blong hem taem hem i harem nogud tumas. (Ol Sam 6:6) Taem yu raetemdaon ol tingting blong yu olsem, samting ya i save halpem yu blong “holemstrong waes ya blong yu, mo fasin ya blong yu we yu save luksave mining blong ol samting we i had, [“fasin blong tingting gud,” NW]—Ol Proveb 3:21.

Heather: “Taem mi raetemdaon ol tingting blong mi, samting ya i halpem mi blong luksave ol tingting we mi mi gat taem mi harem nogud. Taem yu save talemaot ol tingting blong yu mo yu kasem save from wanem yu tingting olsem, bambae yu no harem nogud tumas.”

Wan tingting: Samfala oli gat wan buk we oli raetemdaon ol tingting blong olgeta long hem. ?Sipos yu mekem olsem, bambae yu raetem wanem? Taem yu harem nogud, raetemdaon se yu harem olsem wanem mo wanem samting we yu ting se i mekem yu harem nogud. Afta long wan manis, i gud yu ridim bakegen ol samting we yu raetemdaon. ?Olsem wanem? ?Tingting blong yu long saed blong samting ya i jenis? Sipos yes, yu mas raetemdaon wanem we i givhan long yu blong mekem olsem.

3: I gud blong prea. Baebol i talem se sipos yu prea long saed blong ol wari blong yu, ‘pis we God i givim, we i bigfala moa, i bitim save blong yumi, bambae hem i putum long tingting blong yu, blong lukaot gud long yu.’—Filipae 4:7.

Esther: “Mi traehad blong faenemaot se wanem nao i stap mekem mi mi harem nogud, be mi no save faenem nating. Mi askem Jeova blong i halpem mi blong mi stap glad. Mi taed finis blong stap harem nogud, antap moa taem mi no save risen from wanem i olsem. Afta we sam taem i pas, mi mi no moa harem nogud. !Yumi neva mas ting se prea i no gat paoa!”

Wan tingting: I gud yu tingbaot Ol Sam 139:23, 24 olsem wan eksampol blong ol prea we yu mekem long Jeova. Yu mas talemaot long hem olgeta tingting we oli stap long hat blong yu mo askem long hem blong i halpem yu blong luksave stamba samting we i stap mekem yu yu harem nogud.

Antap long ol samting ya we yumi tokbaot finis, yu save faenem plante gudfala save long Tok blong God. (Ol Sam 119:105) Taem yu fulumap tingting blong yu wetem ol tok blong Baebol, samting ya i save gat bigfala paoa long tingting, hat mo aksen blong yu. (Ol Sam 1:1-3) I gat sam gudfala stori long buk blong Ol Wok long Baebol. Long buk ya, Questions Young People Ask—Answers That Work, buk 2, (Franis/Inglis) we ol Witnes blong Jeova oli wokem, i gat naen pej we oli makem “Role Model” long olgeta. Ol save long ol pej ya, oli save givhan long yu blong mekem se Baebol riding blong yu i karem gudfala frut. Long olgeta stori long ol pej ya, i gat stori blong Josef, Hesekia, Lidia, mo Deved. Long pej 227, bambae yu luk olsem wanem aposol Pol i winim ol nogud tingting we oli stap mekem hem i harem nogud, from sin we i stap long hem.

?Be olsem wanem sipos yu harem nogud yet nating we yu yu traehad blong winim samting ya?

Sipos Yu Harem Nogud Yet Longtaem

Ryan i talem se: “Sam moning, mi harem se i moa gud we mi stap long bed nomo i bitim we mi girap mo harem nogud long dei ya.” Ryan i sik long tingting blong hem. I gat plante narafala tu we oli gat semkaen sik olsem Ryan. Ol stadi oli soemaot se i gat samwe 1 long evri 4 yangfala, we oli harem nogud long tingting blong olgeta bifo we oli kam bigman.

?Olsem wanem yu save luksave se yu gat wan sik long tingting blong yu? Ol saen we oli soemaot se man i gat sik ya, hemia se ol fasin mo aksen blong hem oli jenis, hem i wantem stap hem wan oltaem, hem i no moa glad long evri samting, hem i no moa kakae mo slip gud olsem fastaem, mo hem i gat nogud tingting long saed blong hem wan.

Yes, klosap evri man oli luk sam saen olsem sam samtaem. Be sipos ol saen ya oli stap long yu blong bitim wan wik, i gud we yu toktok wetem papa mama blong yu, nao yufala i save go long dokta blong i mekem sam jekap long yu. Maet dokta i naf blong halpem yu blong faenemaot sipos wan sik nao i stap mekem yu yu harem nogud.b

Sipos yu sik long tingting blong yu, yu no mas sem from. Plante we oli olsem, oli harem gud bakegen afta we oli folem wan tritmen we dokta i givim long olgeta, mo oli harem gud moa tu. Yes, nomata we yu harem nogud from wan sik long tingting no nogat, i gud yu tingbaot ol tok blong Ol Sam 34:18. Vas ya i leftemap tingting se: “[Jeova] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.”

[Ol futnot]

SAM SAMTING BLONG TINGBAOT

● ?Sipos yu krae, hemia i save givhan long yu?

“Mi mi no kaen ya we mi krae isi nomo, be taem mi harem nogud, mi harem se mi mas krae. Taem mi krae, samting ya i givhan bigwan long mi. Mi stat blong tingting gud bakegen mo mi save tingbaot wan gudfala taem, wan hapi taem long fiuja.”—Leanne.

● ?Olsem wanem ol narafala oli save givhan long yu blong yu no moa harem nogud?

“Taem mi harem nogud, mi traehad blong no stap mi wan, be mi joen wetem ol narafala. Yes, maet mi wantem stap mi wan blong mi traem kasem save long ol tingting blong mi mo maet blong krae tu. Be biaen, mi save se mi mas stap wetem ol narafala blong mi save fogetem ol nogud tingting ya we oli stap mekem mi mi harem nogud.”—Christine.

[Bokis/Foto blong pija long pej 27]

SAMTING WE OL NARAFALA YANGFALA OLI TALEM

“Plante taem mi harem nogud taem mi tingting tumas long saed blong mi wan. Be taem mi halpem narafala, ale, mi no moa tingting tumas long mi wan mo mi harem gud bakegen.”

“Taem mi gohed blong mekem eksasaes evri dei, plante taem nogud tingting we mi gat long saed blong mi wan i stap lus, from we mi stat blong harem gud moa long saed blong mi wan. !Mo eksasaes olsem i mekem mi yusum paoa blong mi, ale, mi no moa gat paoa blong harem nogud!”

[Foto]

Drenelle

Rebekah

[Tok blong pija long pej 28]

Taem narafala i givhan long yu mo yu wan yu traehad, bambae yu no moa harem nogud