?Ol Jos Oli Givhan Blong Putum Pis Long Wol?

SAM man oli talem se wan jos haos long Jerusalem we nem blong hem Jos blong Tabu Beregraon (Holy Sepulchre), hem i tabu moa i bitim ol narafala jos haos blong ol skul we oli talem se oli Kristin. Be jos ya i mekem plante raorao mo faet oli kamaot. Oli talem se jos haos ya i stanap long ples “we ol man oli berem Jisas long hem mo we Jisas i laef bakegen long hem.” Be stret long ples we jos ya i stap long hem mo we ol man oli talem se i tabu, i gat plante faet oli kamaot we oli nogud tumas. Ol pris blong sikis defren jos we oli talem se oli Kristin, oli stap faet agensem olgeta from we wan jos i ting se hem i gat raet blong yusum jos haos ya, be ol narafala tu oli talem se oli gat raet. Long ol yia we oli jes pas, fasin agens ya i kam strong moa. Ol polis oli mas yusum masket blong stopem olgeta, mo blokem jos haos ya blong smoltaem.

Longtaem Finis i Kam, Ol Jos Oli Mekem Plante Faet Oli Kamaot

Ol faet we oli hapen long Jos blong Tabu Beregraon, oli wan smol haf nomo blong olgeta bigfala faet we ol jos oli stamba blong olgeta, mo we plante man oli ded from. Wan buk (Violence in God’s Name) i tokbaot ol faet we oli kamaot i no longtaem i pas long ol defren ples long wol, i se: “Stat long Indonesia go kasem Not blong Aealan, long medel Is go kasem Kasmir, long India kasem Naejeria, long Balkan go kasem Sri Lanka, ol Kristin, ol Budis, ol Jiu, ol Hindu, ol Muslim mo ol Sikh oli mekem plante bigfala faet, mo oli talem se ol faet ya oli stret nomo from risen ya se oli stap protektem nem mo wok blong jos.”

Bighaf blong ol jos oli talem se stamba blong bilif blong olgeta hemia pis mo fasin joen gud. Long ol yia we oli pas, ol jos oli mekem plante toktok long saed blong fasin blong tingbaot ol narafala, lavem ol man raonabaot long yumi, mo oli mekem plante toktok tu blong talem se laef i tabu tumas. Taswe, ol jos oli mas lidim ol man blong mekem se pis i stap. Ol man we oli wantem wosipim God long fasin we i stret mo tru, oli mas tingting gud long samting ya.