Japta 23

Sam Moa Merikel Long Kapaneam

JISAS i singaot fofala disaepol—Pita, mo Andru, mo Jemes, mo Jon—oli biaen long hem. Long nekis Sabat dei, Jisas wetem fofala ya, oli go insaed long haos prea long Kapaneam. Nao Jisas i tijim ol man long ples ya. Mo olgeta we oli harem toktok blong hem oli sek, from we toktok blong hem i gat paoa, i no olsem tok blong ol tija blong Loa.

Long Sabat dei ya, wan man we i gat wan devel i stap long hem, i kam insaed long haos prea. Nao i singaot bigfala, i se: “?Jisas, yu man Nasaret, yu kam blong mekem wanem long mifala? !Ating yu kam blong spolem mifala! Mi mi save yu finis. Yu yu Tabu Man blong God ya.”

Devel ya we i gat paoa long man ya, hem i wan enjel blong Setan. Nao Jisas i tok strong long devel ya, i se: “A, yu no tok, yu aot long man ya.”

Nao devel ya i mekem bodi blong man ya i seksek tumas, mo i sakem hem i godaon long graon. Hem i singaot bigfala, nao hem i aot long man ya be i no spolem hem. Ol man long ples ya oli sapraes tumas. Oli stap asaskem long olgeta se: “?Man, wanem samting ya? Wan nyufala tok ya. !Man ya i gat paoa blong tok long ol devel we oli save harem hem!” Nao nyus blong Jisas i goraon long olgeta ples raonabaot.

Jisas wetem ol disaepol blong hem oli girap, oli goaot long haos blong prea, oli wokbaot i go long haos blong Saemon we narafala nem blong hem Pita. Mama blong woman blong Pita, hem i sik, i fiva tumas. Nao oli kam askem long Jisas se ‘plis yu givhan long hem.’ Ale Jisas i go, i stanap kolosap long bed blong woman ya, i putum han blong hem long han blong woman ya, nao woman ya i girap. Wantaem nomo, fiva blong hem i finis, mo hem i mekemrere kakae blong olgeta.

Nao taem san i godaon, olgeta man we oli stap raonabaot, oli tekem ol sikman oli kam long Jisas long haos blong Pita. I no longtaem, olgeta man long taon ya oli hivap afsaed long haos blong Pita. Nao Jisas i mekem ol sikman oli kamgud bakegen, olgeta evriwan, nomata wanem kaen sik oli gat. Mo tu, hem i ronemaot ol devel long plante man. Taem oli stap goaot, ol rabis devel oli singsingaot bigfala se: “Yu yu Pikinini blong God.” Be Jisas i tok strong long olgeta, i stap blokem olgeta, from we olgeta oli save we hem i Mesaea. Mak 1:21-34; Luk 4:31-41; Matyu 8:14-17.

▪ ?Long Sabat dei afta we Jisas i singaot fofala disaepol oli biaen long hem, wanem i kamaot long haos prea?

▪ ?Taem Jisas i aot long haos prea, hem i go wea? ?Long ples ya, hem i mekem wanem merikel?

▪ ?Taem san i godaon, wanem i hapen?