Haf 7
?Wanem Ol Frut Blong Fasin Blong Agensem God?
1-3. ?Olsem wanem ol yia we oli pas oli pruvum se Jeova i tru?
LONG saed blong kwestin ya long raet blong God blong rul, ?wanem ol frut we oli kamaot long ol handred yia we oli pas finis long rul blong man we i no dipen long God? ?Ol man oli gat ol gudfala man blong rulum man i bitim God? Sipos yumi tingbaot ol trabol we i nogud bitim mak we man i mekem long man long olgeta yia we oli pas finis, yumi mas ansa se ‘no gat.’
2 Fasin blong faswan papa mama blong yumi blong sakemaot rul blong God i lidim tufala i go long trabol. Samting ya i mekem tufala i kasem plante trabol mo famle blong man we oli kamaot biaen long tufala, oli kasem trabol tu. Tufala i no save talem se i fol blong narafala man, i blong tufala nomo. Baebol i talem se: “Olgeta nomo oli jusum blong mekem ol nogud fasin; olgeta oli no pikinini blong hem [God], olgeta nomo oli mekem sin.”—Dutronome 32:5.
3 God i talemaot finis long Adam mo Iv se sipos tufala i no moa dipen long hem bambae tufala i kasem trabol mo bambae tufala i mas ded from. Histri i soemaot gud woning ya we God i givim. (Jenesis 2:17; 3:19) Tufala i lego rul blong God mo sloslou tufala i kasem trabol mo biaen tufala i ded.
4. ?From wanem taem yumi bon be yumi no stretgud olgeta, nao yumi stap sik mo yumi stap ded?
4 Rom 5:12 i soemaot wanem i hapen long ol man we oli kam biaen long tufala: “Wan man nomo [Adam, papa blong famle blong man] i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” Olsemia nao, taem tufala i agensem God we i stap lukaot long tufala, faswan papa mama blong yumi oli kam sinman from oli mestem mak. Folem fasin blong bodi blong man blong pasem ol fasin blong hem oli go long pikinini blong hem tufala i mekem ol man we oli bon biaen long tufala oli no stretgud olgeta. From samting ya taem yumi bon yumi sinman, yumi stap sik mo yumi stap ded.
5, 6. ?Histri i soemaot wanem long saed blong ol hadwok blong man blong putum trufala pis mo mekem ol man oli sefgud?
5 Plante handred yia oli pas finis long taem ya. Ol bigfala nesen oli bin stanap mo naoia oli lus finis. Oli bin traem plante defren gavman. Oltaem, famle blong man i fesem plante samting we i nogud. Yumi save ting se long sikis taosen yia we i pas finis, ol man oli mas putum pis, mo stret fasin long wol, mo mekem wol ya i sefgud. Mo yumi save ting se long ol yia ya oli save wokem ol gudfala fasin olsem kaen fasin, fasin sore, mo fasin blong wokgud tugeta.
6 Be wanem we i kamtru i defren olgeta. I no gat wan gavman blong man we i naf blong karem trufala pis long evriwan mo mekem evriwan oli sefgud. Long laswan handred yia nomo, yumi luk we plante milyan man oli ded long han blong ol Nasi mo i gat moa long 100 milyan man oli ded long ol faet. Long taem blong yumi, oli kilim nogud plante man mo oli kilim i ded plante narafala mo plante oli go long presin from we oli no folem tingting blong ol narafala long saed blong politik.
Ol Samting Long Taem Blong Yumi
7. ?Yumi save talem wanem long laef blong famle blong man long taem blong yumi?
7 Yumi traem lukluk long laef blong famle blong man long taem blong yumi. Fasin blong brekem loa mo raf fasin oli stap long evri ples. Fasin blong yusum drag i kasem plante man. Ol sik we oli kamaot from rabis fasin long saed blong seks oli kam antap bitim mak. Plante milyan man oli kasem rabis sik ya AIDS (SIDA). Ten milyan man oli ded from kakae i sot no long ol sik evri yia, be long semtaem sam man long wol oli rij tumas. Ol man oli sakem doti long win mo oli spolem graon tu. Long evri ples, laef blong famle mo ol gudfala fasin oli brokdaon. I tru nomo, laef blong naoia i soemaot klia nogud rul blong “god blong wol ya,” Setan. Wol we hem i lidim i kolkol, i no gat fasin sore mo i nogud olgeta.—2 Korin 4:4.
8. ?From wanem yumi no save talem se ol mak we ol man oli kasem oli moa gud?
8 God i letem taem long ol man blong oli kasem ol hae mak long saed blong sayens mo ol samting long saed blong bodi. ?Be yumi save talem se ol samting oli stap kam moa gud taem mesin gan, trak blong faet, ol plen blong sakem bom mo ol nyuklia bomb oli tekem ples blong bonara mo spia? ?Ol samting oli kam moa gud taem ol man oli naf blong go long ol sta long ol roket be oli no save joengud long pis long graon ya? ?Wehem nao ol samting we oli kam moa gud taem ol man oli fraet blong wokbaot long rod long naet, mo long sam narafala ples tu, long dei nomo?
Samting We Taem i Soemaot
9, 10. (a) ?Ol yia we oli pas finis oli soemaot wanem long yumi? (b) ?From wanem God i no save tekemaot fasin fri blong jus?
9 Ol yia we oli pas finis oli soemaot se ol man oli no naf blong lidim olgeta long wan fasin we i gud sipos oli no wantem luksave rul blong God. Oli no naf ya, sem mak sipos oli no kakae, oli no dring, mo oli no pulum win, ale oli no save laef. Ol pruf oli klia: God i wokem yumi blong yumi nidim Hem blong lidim yumi, sem mak nomo God i mekem yumi blong yumi dipen long kakae, wora mo win blong laef.
10 Taem hem i letem fasin nogud i stap, God i pruvum blong olwe se ol nogud frut oli kamaot taem man i no yusumgud fasin fri blong jus. Fasin fri blong jus i wan gudfala presen taswe God i no tekemaot fasin ya blong jus be hem i letem olgeta man oli faenemaot ol frut we oli kamaot taem oli no yusumgud fasin fri ya. Tok blong God i tru nomo: “Man i no naf blong jusum wanem rod hem i mas wokbaot long hem.” Hem i tru tumas taem i se: “Man i rulum ol man blong spolem olgeta nomo.”—Jeremaea 10:23; Eklesiastis 8:9.
11. ?I gat wan rul blong man we i naf blong finisim ol trabol?
11 Taem God i letem ol man oli rul blong sikis taosen yia finis, samting ya i soemaot we man i no naf blong finisim ol trabol. Long ol yia ya i no gat wan taem we i no gat trabol long wol. Sipos yumi tekem eksampel blong Solomon, king blong Isrel, nating we hem i waes, i rij mo i gat paoa be hem i no naf blong finisim ol trabol we oli kamaot from rul blong man long taem blong hem. (Eklesiastis 4:1-3) Sem mak long taem blong yumi, nating we ol man oli wokem ol nyufala teknik, be ol man blong rulum man oli no naf blong finisim ol trabol. I nogud moa, histri i soemaot we ol man we oli no wantem rul blong God oli kasem moa trabol bitim we oli save finisim.
God i Luksave Fyuja Finis
12-14. ?Wanem gudfala frut bambae i kamaot long fyuja from we God i letem fasin nogud i stap yet?
12 Yumi kasem trabol taem God i letem fasin nogud i stap. Be God i no tingbaot naoia nomo, hem i lukluk i go long fyuja from we hem i save ol gudfala frut we bambae oli kamaot. Rod we God i yusum bambae i givhan long ol samting we hem i mekem, i no blong sam yia nomo no blong sam taosen yia nomo, be i blong ol milyan yia, yes blong olwe.
13 Sipos wan dei wan man i no yusumgud fasin fri blong hem blong jus nao hem i putumap kwestin long saed blong rul blong God, God i no nidim blong letem taem blong man ya i pruvum tingting blong hem. Long plante taosen yia finis, God i letem ol man we oli agensem hem, mo from samting ya God i stanemap wan rul we i stret we ol man oli save folem blong olwe, long evri ples long heven mo wol.
14 From we Jeova i letem ol fasin nogud mo ol trabol oli stap kasem tede, samting ya i soemaot bigwan we ol man we oli agensem hem oli no save win. Bambae hem i soemaot klia se i no save gat wan plan we ol man no ol speret man we oli no dipen long God oli stanemap we i save mekem ol man oli haremgud longtaem. Taswe, i stret nomo we God bambae i finisim kwiktaem eni man we i stanap agens long hem. “Bambae hem i spolem olgeta we oli stap mekem i nogud.”—Ol Sam 145:20; Rom 3:4.
[Tok blong pija long pej 15]
Taem tufala faswan papa mama blong yumi tufala i jusum blong no moa dipen long God, tufala i stat blong kam olfala mo tufala i ded
[Tok blong pija long pej 16]
Rul blong man we i no dipen long God i karem nogud frut
[Credit Line]
U.S. Coast Guard photo